The Definitive Guide to Living in the Capital , Cairo , Egypt

في قلب منطقة شعبية في شبرا، وتحديدًا في المظلات، فيه مبنى ضخم وشكله مميز ممكن تكون عديت من قدامه قبل كده من غير ما تعرف حكايته كاملة، وهو مسجد الرحمن، والحقيقة إنه مش مجرد مبنى، ده حكاية بدأت من أكتر من 40 سنة.. بدأت بجهود أهلية، وانتهت تحت مظلة الأزهر الشريف.

مؤخرًا، احتفت صفحة الأزهر الشريف على فيسبوك، بانضمام مسجد الرحمن إلى الرواق الأزهري، علشان يكون جزء من رسالة تعليم القرآن وعلوم الدين واللغة العربية.

المسجد ممتد على مساحة حوالي 4 آلاف متر، وله أربع مآذن شاهقة، طول الواحدة بيوصل لـ110 أمتار، تخلي شكله مميز وسط عمران المنطقة، بقدرة استيعابية بتوصل لقرابة 15 ألف مصلي.

لكن اللي بيميز مسجد الرحمن أكثر هو قصته.

أساسات المسجد ظهرت سنة 1980، ومن وقتها والبناء ماشي على مراحل، بجهود أهلية وتبرعات مصرية خالصة. كان حلم إنه يبقى صرح مختلف في حجمه وطرازه وزخارفه، علشان كده اختاروا تفاصيل خاصة في الرخام والأخشاب والنقوش، وده خلى التنفيذ ياخد سنين طويلة.

سنين البناء خلت المسجد وهو تحت الإنشاء مشهد مألوف لأهالي المنطقة.. كبر قدام عيونهم، واتحول من خرسانة لعلامة بصرية، ومن مشروع خيري لفكرة صمود.

دلوقتي، ومع انضمامه للرواق الأزهري، المسجد مبقاش مجرد مبنى ضخم، لكنه بقى مساحة علم.. مكان هيحتضن دروس قرآن، وتعليم لغة عربية، وأنشطة دينية، في قلب منطقة شعبية محتاجة وجود زي ده.

صور المسجد بتكشف جمال التفاصيل، من الزجاج الملون واتساع المساحة، لامتداد الأعمدة وارتفاع المآذن اللي بتخترق السما.. تحس إنك قدام تحفة اتبنت بحلم طويل النفس.

في القاهرة، مدينة “الألف مئذنة”، لسه فيه مآذن جديدة بتطلع.. ولسه فيه حكايات أماكن بتتكتب.