Cairo 360
وأنت بتتمشى في مولات القاهرة أو حتى بتتسوق أونلاين، أكيد عينيك بتقع على أسماء براندات بقت جزء من يومنا، زي H&M، Zara، LC Waikiki، وغيرهم.. بنلبس من البراندات دي، وبنتصور بيهم، وبنرشحهم لبعض.. لكن هل سألت نفسك، اسم ماركة لبسك معناه إيه؟
الحقيقة إن ورا كل اسم حكاية، فيه اللي جاي من لغة تانية، وفيه اللي وراه شخص حقيقي، وفيه اللي اتعمل كده وخلاص بس نجح ووصل للعالم كله.
في السطور الجاية، هناخدك في جولة سريعة جوه أشهر براندات اللبس الموجودة في القاهرة، علشان نفهم الحكاية اللي ورا كل اسم في دولابنا.
H&M.. حكاية محل حريمي بقى عالمي
اسم H&M هو اختصار لـ Hennes & Mauritz. كلمة “Hennes” بالسويدي معناها “خاص بالنساء”، وده لأن البراند بدأ فعلًا كمحل ملابس حريمي بس. بعد كده الشركة اشترت متجر تاني اسمه Mauritz، وبدأت تبيع ملابس رجالي، فجمعوا الاسمين مع بعض.
LC Waikiki.. صداقة فرنسية على شط هاواي
الاسم ده من أغرب وألطف الأسماء في نفس الوقت. LC جاية من Les Copains، يعني “الأصدقاء” بالفرنسي، وWaikiki هو اسم شاطئ شهير في هاواي. يعني الاسم مزيج غريب فعلًا؛ صداقة أوروبية مع روح مصيف أمريكي.
وده مقصود عشان يدي إحساس بالراحة والبساطة، كأنك دايمًا في إجازة حتى لو نازل تشتري تيشيرت.
DeFacto.. لبس الحياة الحقيقية
اسم DeFacto أصله لاتيني، ومعناه “في الواقع” أو “الأمر الواقع”. البراند هنا بيقدم نفسه من الاسم: ملابس عملية، يومية، مناسبة للحياة العادية.
الاسم بيقولك: ده لبس يتعاش بيه مش تتفرج عليه.
Zara.. اسم طلع بالصدفة
رغم إن Zara اسم بسيط وسهل، لكنه في الحقيقة مالوش معنى محدد. الاسم الأصلي كان “Zorba”، لكن بسبب وجود مكان تاني بنفس الاسم، الشركة اضطرت تغيره بسرعة، فاختاروا “Zara”.
يعني واحد من أشهر البراندات في العالم، اسمه مجرد حل سريع لمشكلة!
Bershka.. اسم معمول علشان يحسسك بالموضة
Bershka من البراندات اللي اسمها مجرد افتكاسة، يعني مالوش أصل لغوي واضح. الهدف كان اختيار اسم شبابي، خفيف، وسهل الحفظ.
وده اتجاه واضح في براندات كتير بتؤمن إن الاسم مش لازم يكون له معنى، المهم الإحساس اللي بيوصله.
Lacoste.. تمساح بدأ من لاعب تنس
اسم Lacoste جاي من اسم مؤسس البراند، لاعب التنس الفرنسي René Lacoste. واللي كان معروف بلقب التمساح، ومن هنا جه اللوجو الشهير.
القصة هنا مختلفة، يعني ده مش مجرد اسم، ده شخص حقيقي اتحول لبراند عالمي.
Polo Ralph Lauren.. اسم رياضة بقى أسلوب حياة
كلمة “Polo” جاية من رياضة البولو، واللي دايمًا مرتبطة بالطبقات الراقية. والمؤسس Ralph Lauren اختار الاسم ده علشان يعكس الفخامة والستايل الكلاسيك.
المثير إن البراند بدأ بمنتج بسيط جدًا وهو ربطات عنق بس.. لكن بمرور السنين الاسم والصورة الذهنية قدروا يبنوا إمبراطورية.
وأخيرًا..
مافيش قاعدة واحدة لاختيار أسماء البراندات، فيه أسماء جاية من لغات، وأسماء مرتبطة بأشخاص، وأسماء معمول حسابها بعناية، وأسماء تانية اتولدت بالصدفة. بس في كل الحالات، الاسم مش مجرد حروف على يافطة، ده أول انطباع، وأحيانًا أول خطوة في نجاح براند كامل.
المرة الجاية وإنت شايل شنط بلاستيكية أو ورقية فيها ملابس من المول.. بص للاسم بشكل مختلف شوية.
