The Definitive Guide to Living in the Capital , Cairo , Egypt

التطبيقات الذكية للمواصلات بقت كتير في القاهرة وكمان انتشرت في باقي المحافظات وحاليًا بيتم الاعتماد عليها بشكل كبير من المواطنين علشان سهولة وجودتها والأمان والسرعة ونظافة العربية والمنافسة أصبحت قوية بين أكتر من شركة، ولكن تخيل رحلة يومك في القاهرة صامتة وفاخرة بعيداً عن ضجيج محركات الوقود التقليدية، ده بالظبط اللي بيقدمه تطبيق Jtny واللي بيعتمد في المواصلات على السيارات الكهربائية وخلال السطور اللي جاية هنقولكم على كل اللي محتاجين تعرفوه عنهم.

Jtny هو تطبيق متخصص للنقل الذكي مرخص رسميًا عن طريق وزارة النقل وبدء العمل من شهر مايو 2025 بعد حصوله على ترخيص 100 سيارة كهربائية صديقة للبيئة لتقديم خدمة نقل آمنة وفاخرة للركاب، وده بيخلي الرحلة أهدى وأكثر رفاهية وكمان مستوى نظافة ممتاز، وبه مستويات مختلفة ويمكن الحجز لرحلات قصيرة أو من مدينة لأخرى.

يوفر التطبيق سبل أمان مميزة حيث أن الرحلة بالكامل مراقبة بالكاميرات مع تأكيد الشركة على توفير سائقين على مستوى عالي من الكفاءة والتعهد بتوفير الراحة في كل رحلة.

ممكن تطلبوا رحلة فورية أو الحجز قبلها بكام يوم أو كام ساعة، وللأسف مفيش تسعيرة ثابتة لسعر الكيلو عندهم ولكن بيكون حسب عدد الكيلوهات والوقت وبيتم احتساب دقيقة الانتظار بـ5 جنيهات، وبعد تواصلنا مع خدمة العملاء لمعرفة سعر الكيلو وبداية الرحلة مكنش عندهم المعلومة ولكن عرفنا أن أقل سعر للرحلة 100 جنيه، وده مقابل الهدوء والراحة وسبل الأمان ونعتقد أن التطبيق بيستهدف الفئة A وB+، وكمان توفير سيارات جديدة كهرباء وسائقين على مستوى عالي ومراقبة الكاميرات له أثر على السعر، ولكن خلال محاولة طلبنا للتطبيق وجدنا أن حجز سيارة مسافة 3.5 كيلو سعر الرحلة 250 جنيه، والدفع بيكون عن طريق البطاقة البنكية أو من خلال محفظة التطبيق اللي ممكن تشحنوها بداية من 250 جنيه.

أما من مدينة لمدينة بيكون حسب المسافة والوقت وكمثال لو من القاهرة لاسكندرية سعر الذهاب فقط 4167 جنيه وسعر الذهاب والعودة 6250 جنيه، والخدمة دي نقدر نقول أنها ضمن رحلات الـ ‘Intercity Luxury’ أو الرفاهية خلال التنقل بين المدن، وهي بتنافس أسعار الليموزين الخاص، مع ميزة إنها سيارة كهربائية جديدة تماماً وكاملة الأمان، وده اللي بيخليها خيار مثالي لرحلات البزنس أو السفر الفاخر.

أما مناطق التشغيل المتاخة حاليًا حسب التطبيق فهي “وسط البلد – الدقي – ألماظة – الرحاب – مصر الجديدة – المعادي – المهندسين – العجوزة – 6 أكتوبر – القاهرة الجديدة – الشروق – مدينتي – المنيل – الشيخ زايد – مدينة نصر – مدينتي – شيراتون”، وبيسعوا أنهم يغطوا مناطق أكتر خلال الفترة القادمة علشان يغطوا القاهرة الكبرى.

المؤكد إن الطلب على الخدمة دي عالي جداً لدرجة إن السيارات المتاحة بتخلص بسرعة، وللأسف مقدرناش نجرب التطبيق قبل ما نكتب المقال ده، ولكن تفتكروا الأمان المراقب بالكاميرات، وفخامة التنقل بسيارات حديثة وصديقة للبيئة يستاهلوا السعر والتجربة؟! فلو انتوا جربتوا تطبيق Jtny شاركونا رأيكم فيه.

تقدروا تحملوا تطبيق Jtny لمستخدمي نظام iOS من هنا.

ولمستخدمي نظام Android من هنا.

وعلشان تعرفوا أكتر عنهم تقدروا تزوروا صفحتهم على فيسبوك من هنا.