طقس خامس أيام رمضان 2026 في مصر.. انخفاض درجات الحرارة وأمطار هتوصل للقاهرة
أخبار مصر أمطار الأرصاد الجوية القاهرة الكبرى حالة الطقس درجات الحرارة رمضان 2026 رياح شبورة مائية طقس
Cairo 360
الصورة الرئيسية: Roaming Pictures on Unsplash
في خامس أيام رمضان 2026، الجو قرر يفاجئنا، فبعد أجواء مائلة للدفء خلت ناس كتير تخفف ملابسها الشتوية، الأرصاد بتحذر حاليًا من حالة سريعة من عدم الاستقرار، وانخفاض ملحوظ في درجات الحرارة، مع فرص أمطار ممكن توصل للقاهرة الكبرى.
لو هتنزل الشغل النهارده أو بكرة، أو عندك عزومة بعد الفطار، خلينا نقولك التفاصيل قبل ما تختار تلبس إيه.
الهيئة العامة للأرصاد الجوية أعلنت إن يوم الاثنين 5 رمضان هيشهد حالة سريعة من عدم الاستقرار في الأحوال الجوية على مناطق واسعة من البلاد، بداية من شمال مصر لحد القاهرة الكبرى وشمال الصعيد.
درجة الحرارة في القاهرة الكبرى والوجه البحري هتوصل لـ20 درجة مئوية بالنهار، وهيكون فيه نشاط ملحوظ للرياح على أغلب أنحاء البلاد، وده هيزود الإحساس بانخفاض الحرارة، خصوصًا في فترات المساء وبعد التراويح.
أمطار ممكن توصل القاهرة
الأرصاد أوضحت إن فيه فرص لسقوط أمطار خفيفة إلى متوسطة مساءً على مناطق من القاهرة الكبرى، ومدن القناة، وشمال الصعيد، ووسط سيناء، وكمان أجزاء من الفيوم وبني سويف. وفي بعض المناطق ممكن الأمطار تكون أغزر ورعدية أحيانًا، بنسبة حدوث تقارب 30%، حسب بيان الهيئة.
وبشكل عام، الأسبوع الأول من رمضان 2026 شهد طقس شديد البرودة في الصباح الباكر، مائل للدفء نهارًا على أغلب الأنحاء، وشديد البرودة ليلًا.
كمان فيه شبورة مائية من الساعة 4 لحد 9 صباحًا على بعض الطرق المؤدية من وإلى شمال البلاد، وحتى القاهرة الكبرى ووسط سيناء وشمال الصعيد، فلو عندك مشوار بدري، خليك حذر على الطرق.
الرياح كمان حاضرة على فترات متقطعة في مناطق مختلفة، وده بيخلي الإحساس الفعلي بالحرارة أقل من المعلن.
نلبس إيه في خامس أيام رمضان؟
اختار لبس متوسط، بطبقات خفيفة تقدر تزودها بالليل، وخلي معاك جاكيت خفيف لو خارج بعد المغرب، ولو سايق بدري، راقب الشبورة وخفف السرعة.
رمضان كريم يا أبناء القاهرة.. وخلي بالك من الجو قبل ما تنزل.
مقترح
فن وثقافة
إعلانات رمضان في القاهرة زمان.. بقالة صليب ومصنع الطرابيش وشاي بيحارب العطش!
أرشيف الصحف إعلانات قديمة +8
الحياة في كايرو
