The Definitive Guide to Living in the Capital , Cairo , Egypt

مركز الحرف اليدوية في الفسطاط بيعتمد على الشغل اليدوي للموهوبين، عملته وزارة الثقافة، وكان الهدف منه إحياء الماضي وصناعاته للتعريف به وبجمال المشغولات اليدوية، وفي السطور الجاية هنقولكم على كل اللي محتاجين تعرفوه عن المركز.

بيتيح مركز الفسطاط للحرف، فرصة كبيرة للفنانين والحرفيين علشان يبدعوا ويقدموا قيمة فنية مميزة، وبيعتبر المركز مصدر أمل لإحياء الصناعات الحرفية وإعادة تكوين وتأهيل وتطوير الحرفيين والفنانين، وهو موجود بمنطقة الفسطاط في مصر القديمة، وبيتبع صندوق التنمية الثقافية، وهو من الجهات اللي بتعتمد على إنتاجها بمساعدة حرفيين بيقدموا التراث وبيبتكروا ويصمموا وينفذوا كل الحاجات الجميلة المصنوعة من الهاند ميد، وبيتكون من مراكز تعليمية مختلفة.

الخزف

أسسه شيخ الخزافين سعيد الصدر، بمنطقة الفخرانية – مصر القديمة سنة 1958، وكان عبارة عن أتيليه صغير، وكان فيه فرن واحد بيحرقوا فيها الخزف، ونجح في انهم يعملوا شغل متميز، وفي سنة 1995 تم تطويره وإضافة معدات وأجهزة له، وبدء العمل بالفعل سنة 1996 باعادة بناء المكان اللي صممه المعماري الدكتور حسن فتحي، وتم افتتاحه عام 2001.

الـحرف التـقليـدية

تم وضع حجر الأساس لبناء مركز الحرف في الفسطاط  عام 2001، وتم افتتاحه عام 2005، وفيه أكتر من قسم متخصص وبيعتمدوا على المهارات الحرفية زي (الـنجـارة – خرط اليدوى العربى –  التطعيم بالصدف – فن التطعيم – الحفر على الخشب –  الـزجـاج الـمـعـشق بالـجـبس – صناعة الحلى – الخيامية – والـنـحـاس).

المدرسة الأميرية

دي مدرسة متخصصة لتطوير الحرفيين والللي بيشتغلوا شغل يدوي، واتأسست سنة 2006، تحت رعاية الأمير تشارلز آرثر، ولي العهد الإنجليزي، وبدأت تدريباتها بورشة عمل مشتركة بين المصريين والإنجليز، وكانت عن “الزخرفة الإسلامية”، وكل فترة بيكون عندهم تدريب مختلف بينموا بيه مهارات أصحاب الحرف، وهي من أهم المدارس اللي مهتمة بالحرف اليدوية على  مستوى العالم.

مهرجان الحلى

كل فترة بينظم مركز الفسطاط مهرجان فن الحلى واللي بيكون من أهم المعارض والمهرجانات اللي بيتعرض فيها مجموعة كبيرة من صناعات الحرف اليدوية والتراثية، وبيكون تحت شعار “التراث والمعاصرة “.

العنوان: الفسطاط – خلف جامع عمرو بن العاص

رقم التليفون: 23643103

صفحة الفيسبوك من هنا