دليل كايرو 360 لأفضل أماكن الخروج في التجمع الخامس
Mariam Al Attar
لحد النهارده لسه فيه ناس مابتروحش التجمع الخامس علشان متخيل أنه صحرا ومافيهوش أماكن للخروج، ده غير اللي لما بييجي "الصحرا" مابيبقاش عارف إيه أحسن مكان ممكن يروحه، علشان كده إحنا جمعنا لك أهم أماكن ممكن تروحها في التجمع الخامس حسب احتياجاتك. إحنا بقينا بنسبة كبيرة بنخرج لهدف من تلاتة؛ إما علشان ناكل، أو نعمل شوبنج، أو علشان ناكل! طيب فيه أماكن تقدر تضرب فيها عصفورين الأكل والشوبنج بحجر مشوار واحد ؟ طبعًا!
كايرو فيستيفال سيتي مول
ودا في تقاطع الدائري مع شارع التسعين في جنوب الأكاديمية. كايرو فيستيفال هو تقريبا أشهر مجمع تجاري في التجمع الخامس، لو محتاج تعمل شوبنج هتلاقي فيه مول مجمّع نسبة كبيرة جداَ من براندات اللبس زي ( زارا، ماسيمو دوتي، مانجو، برشكا، وغيرهم ..) وكمان في الميك اب ومستخدمات التجميل بشكل عام ، زي ( مزايا، باث اند بودي ووركس، ذا بودي شوب ..الخ )
وطبعاَ ( go sport ) اللي هتلاقي فيه أي حاجة محتاجها للرياضة من أول مضرب التنس لحد الكوتشي. وعشان الشوبنج محتاج فلوس ومحتاج تصبيرة، هتلاقي في المول فرع للبنك الأهلي المصري، ومنطقة مجمعة شوية مطاعم للفاست فود، وكمان في فرع (سينابون) ودا هتعرف مكانه من ريحته.
ايه تاني في كايروفيستيفال غير المول ؟
باقي 3 أماكن بس قبلهم ماتنساش إن المول فيه فرع كبير لكارفور، وأماكن تانية حواليه تقدر تدلّع فيها الموبايل أو اللاب توب. أما لو محتاج أي حاجة تخص الأثاث أو اللأكسيسوريز بتاعته، فهتلاقي برا المول فرع ( أيكيا ) كبير، وقريب منه هتلاقي ( كيدزانيا )، ودا عبارة عن مكان مخصص للأطفال يلعبوا فيه أو بالأدق يشتغلوا فيه بس بشكل آمن وفي بيئة واقعية. وأخيراً "النافورة الراقصة"، والنافورة دي حواليها مدرج كدا شبه الاستاد وعدد كبير من المطاعم والكافيهات اللي تقدر تقعد فيها في الهواء الطلق وانت بتشوف النافورة وبتسمع مزيكا.
في مولات تانية في التجمع بس غالب عليها الأكل أكتر من الشوبنج، زي ايه؟
داون تاون مول
القطعة A ، شارع التسعين، التجمع الخامس، ودا أكل كتير شوبنج خفيف، والأهم انك هتتبسط لو صحيت بدري فطرت في فرع (PAUL) اللي هناك.
كونكورد بلازا
في شارع التسعين (محور الحرية). وأشهر مكان فيه هو " باب توما " ودا مطعم وكافيه لبناني، أكله لذيذ وأحسن وقت تروحه فيه هو بالليل.
أمريكانا بلازا
ودا كمان في التسعين، قدام الجامعة الأمريكية، المكان دا لو ليك في السمك، ننصحك تروح ( فيش ماركت ) اللي هناك، ولو حبيت تشتغل أو تذاكر على خفيف في هناك ( كوستا كوفي ) ودا يعتبر من أروق فروع كوستا في القاهرة. طبعاً بعد كل أماكن الأكل دي هتحتاج تروح "جولدز جيم " في كونكورد بلازا .
وأخيرًا ماينقصش خروجات التجمع غير سينما، ودي تلاقيها فين ؟
سينما (POINT 90)
في شارع العبور (متفرع من التسعين) ، قصاد الجامعة الأمريكية ودي أشهر من النار على العلم يعني ماتتوّهش !
ودي طبعًا مش كل الأماكن اللي في التجمع لكن نقدر نقول لك إن دي أهمها، لو محتاج تعرف أماكن تانية " اللي يسأل كايرو 360 مايتوهش!".
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
