The Definitive Guide to Living in the Capital , Cairo , Egypt

الصور: الصفحة الرسمية لمحافظة القاهرة على فيسبوك

في خطوة جديدة لتقنين أوضاع السياس ومنع أي استغلال للمواطنين، أعلنت محافظة القاهرة عن الزي الموحد الرسمي اللي هيكون إجباري لكل سايس مرخص في شوارع وساحات القاهرة. المنظومة الجديدة بدأت تتطبق بالفعل من يوم الخميس 19 يونيو 2025 في أحياء المنطقة الغربية للعاصمة، وده تمهيدًا لتعميمها على كل أحياء المحافظة الفترة الجاية.

الدكتور إبراهيم صابر، نائب محافظ القاهرة، قال إن المنظومة دي استجابة لمطالب الناس اللي اشتكت من عشوائية السياس واستغلال البعض منهم، وعشان كده كان لازم يكون فيه تقنين وتنظيم يضمن للمواطن حقه.

الزي الجديد للسايس عبارة عن جاكت مميز باللون الأزرق الفاتح، نفس لون شعار محافظة القاهرة، وعليه بادج نحاسي تراثي عليه كود بيعبر عن المحافظة والمنطقة والحي المرخص فيه، وكمان باركود تقدر تمسحه بالموبايل يطلعلك كل بيانات السايس والشركة المتعاقدة وموقع ساحة الانتظار وأسعار الركنة سواء للساعة الأولى أو الثانية.

ومش بس كده، كمان رقم الخط الساخن لغرفة عمليات المحافظة مطبوع على ظهر الجاكت، عشان لو عندك أي شكوى تقدر تتواصل فورًا. والمنظومة دي هدفها الأساسي منع أي محاولات تزوير أو استغلال، وضمان إن كل سايس في الشارع بيشتغل بشكل رسمي وموثق.

تابعونا في كايرو 360 لمعرفة كل جديد عن تطبيق المنظومة دي في باقي الأحياء، وإزاي تقدر تضمن لنفسك ركنة آمنة وسعر عادل في شوارع القاهرة.