طقس حار في شوارع القاهرة.. اعرف درجات الحرارة المحسوسة وموعد انكسار الموجة
الأرصاد الجوية الطقس في القاهرة الطقس في يوليو الموجة الحارة حالة الطقس مصر 2025 حر القاهرة حرارة محسوسة درجات الحرارة اليوم رطوبة الجو متى تنتهي الموجة الحارة
Cairo 360
الصورة: ShengGeng Lin
الصيف في القاهرة معروف بحرارته الشديدة، لكن الأيام دي الوضع بقى فعلاً فوق مستوى المواطن اللي عنده في بيته مروحة مش تكييف. الناس في الشارع، في العربيات، حتى جوه البيوت، الكل بيشتكي من الحر والرطوبة اللي مخليين التنفس نفسه تقيل.
ومع ارتفاع درجات الحرارة لحد 43 درجة محسوسة، بقت المراوح والتكييفات مش مكفية، والناس كلها بتسأل: “إمتى الموجة الحارة دي تخلص؟”.
الهيئة العامة للأرصاد الجوية أعلنت إن النهاردة، الأحد 27 يوليو 2025، الجو هيكون شديد الحرارة ورطب على أغلب المحافظات، وخصوصًا في القاهرة الكبرى، والحرارة المحسوسة وصلت فعلاً لـ43 درجة.
كمان ارتفاع نسبة الرطوبة والهدوء النسبي للرياح بيزود إحساسنا بالحر بأكتر من 4 درجات فوق الحرارة الفعلية.
درجات الحرارة النهاردة في مصر:
القاهرة الكبرى والوجه البحري: العظمى 41° والمحسوسة 43°
السواحل الشمالية: العظمى 34° والمحسوسة 37°
شمال الصعيد: العظمى 43° والمحسوسة 45°
جنوب الصعيد: العظمى 45° والمحسوسة 46°
وبحسب دكتورة منار غانم من هيئة الأرصاد، فالموجة دي هتفضل مستمرة لحد يوم الثلاثاء الجاي، بعدها تبدأ درجات الحرارة تنزل تدريجيًا.
يوم الأربعاء: العظمى في القاهرة هتوصل 36°، ويوم الخميس والجمعة: هتوصل لـ35° بإذن الله.
واللي بيزود الأزمة إننا تحت تأثير مرتفع جوي في طبقات الجو العليا ومنخفض الهند الموسمي، اللي بيخلي الشمس ضاربة طول اليوم.
