The Definitive Guide to Living in the Capital , Cairo , Egypt

الصور: مصطفى سالم

في قلب العتبة، واحدة من أكتر المناطق الحيوية في وسط القاهرة، بيرجع يبان تاني جمال عمارة تيرنج التاريخية بعد سنين من الإهمال. مشروع التطوير والترميم اللي بيتم حاليًا بيكشف قد إيه القاهرة لسه محتفظة بكنوز معمارية تستحق إننا نسلط عليها الضوء، مش بس علشان قيمتها التاريخية، لكن كمان علشان تبقى جزء من مستقبل المدينة.

تاريخ عمارة تيرنج

العمارة دي اتبنت ما بين 1913 و1915 على إيد المهندس النمساوي اليهودي أوسكار هورويتز، اللي درس العمارة في النمسا وجه القاهرة يبني مشاريع مميزة.

المقاول اللي نفذ المشروع وقتها كان ليون رولين فيلز.

مايفوتكش كمان: عمارة الإيموبيليا.. مبنى في وسط البلد مليان حواديت

العمارة دي مش مجرد مبنى، دي تحفة معمارية مكونة من خمس أدوار، وفي أعلاها كرة ضخمة شايلينها أربع تماثيل، وبيقال إن فيه بس ثلاث مباني في العالم ليها التصميم المميز ده.

أعمال أوسكار هورويتز في القاهرة

هورويتز ما وقفش عند تيرنج، لكن ليه بصمات واضحة في القاهرة، زي فيلا علي إبراهيم باشا، وعمارة الإيموبيليا الشهيرة اللي اتبنت سنة 1895 وسكنت فيها شخصيات يهودية كتير، علشان كده اتعرفت كمان باسم “عمارة اليهود”.

من الأثر للتجارة

مع مرور السنين، عمارة تيرنج اتغير دورها. من تحفة معمارية بواجهة مبهرة، اتحولت لعمارة تجارية، وكل شققها اتقسمت لورش خياطة ومخازن بتخدم محلات العتبة اللي معروفة بالحركة الدائمة. وده كان سبب رئيسي إن تفاصيلها المعمارية اتخبت وسط الزحمة.

العودة من جديد

دلوقتي، مع مشروع تطوير ميدان العتبة، بيتم ترميم عمارة تيرنج وإعادة تنظيم الباعة الجائلين حوالين الميدان بباكيات مرتبة، عشان ترجع العمارة تظهر بجمالها وتاخد مكانها اللي تستحقه وسط مباني القاهرة التاريخية.