Cairo 360
كل سنة بنحتفل بعيد الأم بنفس الطريقة تقريبًا، بنجيب هدية، أو نعزم الأم على خروجة، أو حتى بنكتفي بكلمتين حلوين بنقولهم وإحنا مستعجلين. لكن يمكن عمرنا ما وقفنا شوية علشان نسأل السؤال الأهم: أمي كانت مين قبل ما تبقى “أمي”؟ إيه هي أحلامها وطموحاتها وهمومها.
أمك اللي إنت شايفها دلوقتي، واللي بتفكر فيك قبل نفسها، واللي عارفاك أكتر من نفسك، ماكنتش كدة قبل ما تبقى ابنها.. في يوم من الأيام كانت مجرد بنوتة عندها خطط، وحياتها مليانة أحلام، وقلبها كان شايل حكايات كتير.
يمكن كانت عاوزة تبقى حاجة تانية خالص.. ويمكن كان عندها اختيارات وماوصلتلهاش.
في 2026، إيه رأيك بدل ما تشتري هدية وخلاص، تجرب تعمل حاجة مختلفة: اقعد معاها.. واسألها سؤال واحد بس: لو رجع بيكي الزمن.. كنت هتختاري نفس الطريق؟
اسأل واسكت.. وبلاش تقاطع.. وبلاش تتوقع إجابة معينة.
ممكن ست الكل تضحك وتعدي السؤال، وممكن تحكي لك حكاية أول مرة تسمعها، عن شغل كانت نفسها فيه، أو سفر ما حصلش، أو قرار كان ممكن يغير حياتها بالكامل.
وممكن – ودي أهم حاجة – تكتشف من كلامها معاك إن كان فيه حاجات نفسها تعملها وماقدرتش، لكن الحاجة دي لسه ينفع تتعمل.. أيوه.. مش كل حاجة راحت.
يمكن نفسها تتفسح في مكان معين، أو تتعلم حاجة جديدة، أو ترجع لهواية قديمة، أو حتى تاخد يوم لنفسها من غير ما تبقى “أم”.
هنا بقى ييجي دورك الحقيقي!
مش إنك تشتري هدية وخلاص.. لكن إنك تساعدها ترجع حتة من نفسها.. ويمكن السؤال الصغير ده يفتح باب كبير جدًا.
جرب.. وأكيد التجربة هتغير حاجة في علاقتك بست الكل.
كل سنة وأكل أم بخير.
