The Definitive Guide to Living in the Capital , Cairo , Egypt

كتير مننا لما بينقل لشقة جديدة بيفكر يقدم على خط أرضي مخصوص علشان الإنترنت، لكن الكارثة بتحصل لما بتقدم وتنهي كل حاجة وفي الآخر يقولك إن الخط بتاعك غير صالح لخدمات الإنترنت! علشان كده نشر الجهاز القومي لتنظيم الاتصالات، مؤخرًا، 3 نصائح مفيدة ومهمة للمشتركين الجدد.. تعالوا نعرفها مع بعض.

 

1 – بحسب نصائح “القومي للاتصالات”، الشركة مقدمة الخدمة ملزمة بالإعلان عن شروط وأحكام باقات الخط الأرضي اللي بتقدمها على موقعها الإلكتروني، وبيطلب منكم الجهاز الحرص على الاطلاع على الشروط والأحكام الخاصة بكل باقة عاوزين تشتركوا فيها وتسألوا عن تفاصيل أكثر عن الأسعار.

2 – في وقت التعاقد على الخط الأرضي، لازم تتأكدوا من الشركة مقدمة الخدمة أن الخط الأرضي مافيش عليه خدمة إنترنت سابقة تخص مالك الخط القديم بدون ما يتم إلغائها، علشان تقدروا تدخلوا خدمة إنترنت خاصة بيكم.

3 – لما تقرروا التعاقد على واحدة من باقات التليفون الأرضي، مهم تعرفوا إن نموذج التعاقد اللي قمتم بتوقيعه للحصول على الخدمة بيحدد كل تفاصيل العلاقة بينكم وبين مقدم الخدمة، علشان كده مهم تحرصوا على الاطلاع بتركيز على بنود التعاقد لمعرفة حقوقكم والتزاماتكم، واحتفظوا بنسخة من التعاقد.

 

جدير بالذكر إن أعداد المشتركين فى التليفون الأرضي في مصر، ارتفعت إلى 11.3 مليون مشترك بنهاية نوفمبر عام 2021 مقابل 11.08 مليون مشترك بنهاية أكتوبر عام 2021 ومقارنة مع 10.22 مليون مشترك بنهاية نوفمبر عام 2020 بنسبة نمو شهري 2.02% ونمو سنوي 10.56%.