The Definitive Guide to Living in the Capital , Cairo , Egypt

سنة 1891 افتتحت في مصر أول حديقة حيوان، على مساحة 80 فدان، وهي مازالت موجودة في مكانها اللي بيطل على شارع مراد، شارع جامعة القاهرة، ميدان النهضة، في محافظة الجيزة، وبيزورها ملايين المصريين سنويًا لأنها فريدة من نوعها، وسعر التذكرة بتاعتها 5 جنيه بس، وعلشان أهمية الحديقة ومحتوياتها، هنقولكم على 5 حاجات لازم تعملوها لما تزوروا الحديقة علشان الخروجة تكمل وتبقى مميزة.

1- التصوير

الحديقة هي المكان الوحيد اللي تقدروا تتصورا فيه مع مناظر طبيعية خلابة ومنها الجداول والشلالات المائية والجسور الخشبية وبحيرات الطيور، بتصميم مميز وفريد بيجمع ما بين العراقة والجمال، وطبعًا هتتصوروا مع الحيوانات زي الفيل والقرد والتمساح كمان، بس خلوا بالكم منه ومتقربوش أكتر من الحد المسموح.

2- الكشك الياباني

تقدروا كمان تزوروا “الكشك الياباني” وده على هيئة معرض صغير، فيه مقتنيات وصور للحديقة قديمة وجديدة، ومتواجد من سنة 1924، وكان انشاءه تكريمًا لولي عهد اليابان لما زار الحديقة وقتها.

3- الأكل

تقدروا تأكلوا الحيوانات في الحديقة وتاخدوا صور وأنتم بتعملوا ده، بمساعدة حارس كل قفص، ومش بس كده، فيه حيوانات من اللي هتأكلوها، هتشكركم على حسب طريقتها في التعبير عن حبها، فماتنسوش تعملوا ده.

4- الأطفال

وعلشان اللمة ماتحلاش إلا بفرحة أولادنا ففيه نشاطات مميزة للأطفال جوه الحديقة، زي الألعاب، والملاهي، وسينما البعد الثالث، ومراجيح وزحاليق وألعاب تانية كتير، ده غير بقى المسابقات المحفزة لكل الأطفال وبتعملها الحديقة، وماتنسوش الرسم على الوش بالألوان.

5- المتحف الحيواني

المتحف ده بقى حكاية تانية خالص، وله رسم دخول خاص بيه 10 جنيه بس، والمتحف الحيواني فيه 1352 طائراً محنط، و555 حيواناً من الثدييات، و259 من الزواحف، و115 من الجماجم، و35 من الهياكل العظمية، و49 رأس، وفيه منهم اللي عدى عليه 100 سنة ومنهم اللي لسه جديد زي إنسان الغاب، وأكتر، وكمان فيه مجموعات علمية نادرة، ودي مرجعية لتصنيف مملكة الحيوانات، ومكوتة من 536 من الثدييات والقوارض و6254 طائر.

يا ترى بعد الـ5 حاجات دي، لسه ماقررتوش تزوروا الحديقة؟!

بس خلوا بالكم، الحديقة بتشتغل كل يوم من 9 صباحًا حتى 5 مساءً، ويوم الثلاثاء إجازة رسمية لهم، وتقدروا تدخلوا من باب شارع مراد أو جامعة القاهرة، وحتى من بوابة ميدان النهضة، فكل الأبواب تؤدي لعالم حديقة الحيوانات.