The Definitive Guide to Living in the Capital , Cairo , Egypt

الخدع البصرية فن موجود من قديم الزمان، وكتير من الناس بيستخدموه بمهارة كبيرة، ورغم إننا بنبقى عارفين إن الأمر فيه خدعة، لكننا بنكون مبسوطين، ودلوقتي في مصر موجود متحف الأوهام اللي بيعتمد بشكل كامل على الخدع البصرية وبيخليك تتعامل معاها باعتبارها حقيقة وهيخليك تعيشوا الخيال والوهم من خلال ألعاب كتير بتعتمد على الخدع البصرية، وكلها مناسبة للأطفال والكبار، في السطور الجاية، هننقل لكم تجربتنا في المكان علشان تعرفوا كل تفاصيله وتعرفوا إيه اللي مستنيكم هناك.

“متحف الأوهام” بيعتمد على خداع حواسكم، وبيدخلكم لعالم مختلف من الألعاب اللي بتعتمد على الوهم، واللي هتحسوا إنها حقيقة لإن المكان بينفذها بإتقان شديد، وهو مناسب لكل الأعمار، وهناك هتستمتعوا بتجربة بصرية وحسية وتعليمية شيقة جدًا وجديدة، ممكن تمشوا في نفق الأرض فيه بتهتز بقوة، أو تقفوا على راسكم في غرفة دوارة، وكمان تلقوا أبو الهول بيراقبكم، أو تتحدوا الجاذبية وغيرها من الخدع الكتير، والمكان مبني بأسس علمية ورياضية ونفسية، وكل خدعة لها حكاية وطريقة، وهتحسوا في كل خدعة بشيء مختلف، وتقدروا كمان تتعرفوا على تفاصيل الخدعة وتفهموها لو حابين تنفذوها في البيت.

تجربتنا كانت بدايتها بالوصول للمكان في Walk of cairo طريق اسكندرية الصحراوي، ودخلنا حجزنا وكان لازم ننتظر ربع ساعة علشان الدنيا كانت زحمة، وبالفعل انتظرنا ودخلنا قطعنا التذاكر وسعر التذكرة للفرد 350 جنيه، أما الأسرة المكونة من طفلين وولديهم فسعر التذكرة 1150 جنيه لمدة ساعة، وكمان عندهم “مرشد” خاص بيهم بيكون معاكم طوال الجولة بسعر 200 جنيه، ولو حابين تزودوا ساعة فبيكون سعر الساعة 200 جنيه.

وبدأنا رحلتنا بالدخول للبوابة واستقبلنا واحد من فريق العمل اللي رحب بينا وشرح لنا هنمشي ازاي وايه اللي هنعمله وبدأنا جولتنا بالتصوير في خدعة ترابيزة الاجتماعات والصور المتعددة، وبعدين طلعنا السلم وشفنا على يمينا صور للعالم اينشتاين بيراقبكم وانتوا طالعين للدور الثاني، وطلعنا واستقبلنا المرشد وبدأ يتحرك معانا ويشرح لنا كل حاجة وهو للعلم تقدروا تستغنوا عنه ولكن كل خدعة هتضطروا تقروا التعليمات وتعرفوا بتعمل ايه وتتصوروا إزاي، فهو وجود مرشد معكم مفيد في أكتر من حاجة، وبدأنا بلعبة الخدعة الدوارة وهي لوحة بتلف على الحيطة لو وجهتهوا ايدكم ليها واتصورتوا هتحسوا ايديكم بتلف وتدخل جوا الدايرة دي.

كمان جربنا غرفة الصغير والكبير بيقف فيها طرفين يتصوروا واحد بيطلع كبير والتاني بيكون صغير، ورغم بساطة الخدعة ولكن الصورة بتطلع حلوة، وبعدها خرجنا ولقينا أبو الهول بيبص علينا في كل خطوة بنعملها، واتصورنا كمان صور خادعة بحيث بيقعد شخص والتاني واقف بيمد ايديه ولما بتتصوروا من زاوية صح بتحسوا أن الشخص الواقف حاطط ايده على رأس اللي قاعد.

أما خدعة المرايا فهي عبارة عن غرفة فيها مراية ومكان مخصص تقفوا فيه، ومجرد ماتقفوا وتميلوا بجسمكم هتلقوا نفسكم في الصورة واقفين بميل كبير وكأنكم هتقعوا، وبعدها اتفرجنا على شكلين هندسيين في واحد وفيها هتلقوا زاوية مثلثة وزاوية مربعة، وخدعة المراية بتخلي صوركم متركبة على بعض ولازم تكونوا فردين علشان تلعبوها، وهي معمولة بخدعة متقنة بحيث تخلي العيون متبادلة بين الطرفين.

كمان عندهم خدعة المرايا واللي بتخليكم تتصوروا بنص واحد والنص التاني متغطي وبالتالي بتركبوا جسمكم على بعض وكل واحد بياخد جزء من الشخص الآخر، وده غير الغرفة الخطيرة بتاعتهم اللي بتتصوروا فيها بكل زاوية “بدون نور أو فلاش” وكل مكان تتصوروا فيها هتلقوا نفسكم وسط نور ألوان مختلف كل مرة.

عندهم كمان خدعة الجاذبية ودي عاوزة ابداع في التصوير علشان تطلع حلوة، وهي عبارة عن مواسير عادية فيها أماكن تمسكوها منها وتسندوا رجلكم على الحيطة وتبدأوا تتصوروا وبعد التصوير تعدلوا على الصور بحيث تبان أنها مقلوبة.

وكمان عندهم خدعة البير ودي بتكون مرايا بتديكم ايحاء بأن البير عميقة سواء فوق أو تحت، كمان ان فيه خدعة انفق اللي بتدخلواه على كوبري حديد وحواليه غطاء بيلف ومجرد ما تدخلوا وتستسلموا هتلقوا نفسكم بتلفوا تلقائي وهتسكوا في الكوبري اللي آخره مراية علشان لو حابين تتصوروا فيها.

وعندهم على الحوائط خدع مختلفة ولطيفة مبنية على أساس علمي وفني وبصري، ولكن أكتر حاجة عجبتنا الحيوانات اللي كل ما تبص لها من زاوية هتشوف شكل مختلف وأكتر حاجة كانت معبرة لينا هي البغبغان اللي في زاوية موجود بيضحك والزاوية التانية حزين.

وأخيرًا كان فيه خدعة المرايا اللي مجرد ما ترفعوا ايديكم تمسكوها بتتكرر الصورة أكتر من مرة ولما تتصوروا هيبان جمال الخدعة.

المتحف مفتوح يوميًا من 10 صباحًا إلى 10 مساءً، والأطفال اللي بتقل أعمارهم عن 5 سنوات بدون تذكرة ومش محتاج حجز، والجولة داخل المكان لمدة ساعة.

العنوان: طريق القاهرة الإسكندرية الصحراوي الكيلو 38 – الشيخ زايد.

تقدروا تعرفوا أكتر عنهم من خلال صفحة الفيسبوك من هنا.