من عم بشندي لسوبيا الرحماني.. يوم بطعم التاريخ في السيدة زينب بأقل من 300 جنيه
أكل شعبي أماكن تاريخية في القاهرة ابن حميدو السيدة زينب بشندي بيت الكريتلية خروجة بـميزانية خروجة شعبية سوبيا الرحماني مطاعم القاهرة
Cairo 360
رنا شرف
المرة اللي فاتت أخدناكم في جولة حلوة في الزمالك بميزانية 500 جنيه (لو ماقريتش المقال، شوفه من هنا)، المرة دي بقى هنغير الجو خالص، ونروح لمنطقة قريبة من قلبنا كلنا… السيدة زينب.
المنطقة اللي بتجمع بين روحانيات المكان وعبق التاريخ، واللي مهما زُرتها، لازم تخرج منها بحاجة حلوة… تعالوا نعيش يوم كامل هناك بميزانية 300 جنيه بس، ونشوف نقدر نعمل إيه!
أول محطة: فطار على أصوله عند عم بشندي
بما إننا في السيدة زينب، يبقى لازم نعدي على عم بشندي، واحد من أشهر أسامي الفول والطعمية في المنطقة، واللي لسه محافظ على الطعم والأسعار الشعبية، هتطلب من عنده ساندوتش فول، وساندوتش طعمية محشية، وحاجة ساقعة، وكل ده بحوالي 30 جنيه بس! يعني فطار هيشبعك ويخليك تكمل اليوم!
ما يفوتكش كمان: يوم كامل في الزمالك بأقل من 500 جنيه؟ أيوه.. وهتنبسط كمان!
تاني محطة: زيارة بيت الكريتلية
وإحنا في منطقة تاريخية زي دي، مستحيل مانروحش مكان أثري. اختارنا نزور “بيت الكريتلية” أو “بيت أمينة بنت سالم”، واحد من أجمل البيوت التاريخية اللي فاضل فيها عبق المماليك. تذكرة الدخول: 10 جنيه بس، وهناك هتستمتعوا بالعمارة، التفاصيل، وتصوروا صور تفضل معاكم للذكرى.
الغدا في مطعم ابن حميدو
بعد الجولة، أكيد الجوع هيبدأ! فقررنا نخرج شوية عن المطاعم التقليدية، ونجرب أكلة بحرية من مطعم “ابن حميدو” في شارع بورسعيد، ممكن تطلب من هناك شوربة سي فود وفتة سي فود ابن حميدو، وهتدفع حوالي 170 جنيه بس! يعني غدا فاخر في قلب الحي الشعبي!
وآخر محطة: سوبيا الرحماني
ماينفعش نزور السيدة من غير ما نختم يومنا بحاجة مسكرة. وملناش غير “سوبيا الرحماني” في شارع الكومي… مشهورة بطعمها المختلف ومكوناتها المظبوطة، نرشح لك تطلب من عندهم سوبيا سوبر بسعر 45 جنيه!
وأخيرًا..
الخروجات الحلوة مش لازم تكلف كتير، ومش دايمًا لازم تبقى في أماكن فخمة… أوقات الذكريات الحقيقية بتتخلق في الشوارع اللي ليها روح، وسط الناس الطيبين، ومع أكلة من قلب الزمن. السيدة زينب مش مجرد مكان، دي حكاية بتحسها في كل ركن… وجرب بنفسك، ويمكن تكتشف حكايتك هناك.
مقترح
معالم وسياحة
من غير ما تتحرك من بيتك.. اكتشف أسرار وادي الملوك في جولة افتراضية مدهشة!
آثار فرعونية الأقصر +10
الحياة في كايرو
