The Definitive Guide to Living in the Capital , Cairo , Egypt

رنا شرف

في شتاء 2025-2026، المخبوزات بتبقى أكتر من مجرد أكل. ريحة العيش السخن، الكرواسون الطري، والفطاير اللي طالعة حالًا من الفرن، كلها تفاصيل صغيرة بتفرق في اليوم وتدي إحساس بالدفا والراحة. القاهرة مليانة مخابز قديمة وحديثة، كل واحد له نكهته وحكايته، من أماكن حافظت على جودتها سنين طويلة، لبيكريز بقت محطات أساسية لعشاق المخبوزات.

لو بتدور على أحلى مخابز في القاهرة، وعاوز تجربة مضمونة ومشبعة، الدليل ده معمول علشانك.

مخبوزات الحرية

هنا الإحساس بيتي بجد. الكيك هناك تحسه معمول في بيت خالتك أو جدتك، طراوة وطعم بسيط ونضيف. الخبز كمان مميز، وكل حاجة تحسها معمولة بحب. للحرية فروع كتير، بس فرع المهندسين من أكتر الأماكن اللي ليها شعبية.

العنوان: 26 شارع الفالوجا، حي العجوزة.

لطيف وسيلي

واحد من أشهر وأقدم أماكن المخبوزات في القاهرة، واسم تقيل في المجال. لطيف وسيلي قدر يحافظ على جودته على مر السنين، وده سر إنه بقى براند حقيقي في عالم المخبوزات. من أول العيش والفينو لحد المخبوزات الحلوة، كل حاجة محسوبة ومظبوطة، وتحس إنك بتاكل حاجة معمولة بإيد حد فاهم شغله.

العنوان: 8 شارع المهدي، بالقرب من البنك المركزي المصري، وسط البلد.

سميراميس

من أكبر وأشهر المخابز في القاهرة، ومكان ليه جمهوره الكبير. مخبوزاته معروفة، وحلوياته خاصة السويسرول ليها حكاية تانية. عن تجربة، الطعم لسه محتفظ بأصالته، والحاجات معمولة على أصولها من غير فذلكة، وده اللي مخلي ناس كتير ترجع له دايما.

العنوان: 72 القصر العيني، القاهرة.

العبد

اسم كبير ومش محتاج تعريف. أحلى كروسان ممكن تاكله مع فنجان قهوة. العبد مش بس مخبوزات، ده كمان حلويات وكافيه وبيتزا. له فروع كتير في القاهرة، وأشهرها وسط البلد، ومكان مناسب لو عاوز تقعد أو تاخد حاجتك وتمشي.

العنوان: وسط البلد، أمام كافيه الأمريكين.

موليس بيكري – Molly’s Bakery

المعادي دايما ليها طابعها الخاص، ومولي بيكري واحد من أشهر البيكريز هناك. الفطاير بالسبانخ وباللحمة المفرومة من الحاجات اللي لازم تتجرب، وطعمها بيحسسك إن المكونات طازة والشغل معمول بعناية. مكان بسيط بس تجربته قوية.

العنوان: 6 شارع 200 دجلة المعادي.

سيموندس

كتير مننا يعرف سيموندس من الجاتوهات، بس المخبوزات هناك تستاهل الكلام. مكان قدر يكمل سنين طويلة وهو محافظ على مستوى كويس وطعم ثابت. لو معدي وعاوز مخبوزات تظبط مزاجك من غير تفكير، سيموندس اختيار آمن.

العنوان: فروعهم كتير، لكن بنرشح لكم فرعي الدقي والزمالك لتجربة مميزة.

حلو الشام

رغم إن شهرته الكبيرة في الحلويات، لكن المخبوزات هناك تستحق الاهتمام أكتر. لو نفسك في فطير مشلتت مظبوط زي ما اتعودنا، حلو الشام اختيار ممتاز. المكان معروف بالنضافة والثبات في المستوى، وده مهم جدا في أي مخبز.

الفرن

نطلع شوية من وسط البلد ونروح ناحية زايد، هنلاقي مخبز الفرن، واحد من أشهر الأماكن في الكحك والمخبوزات. له أكتر من فرع، لكن فرع زايد من أكترهم شهرة. المكان مناسب للي عاوز جودة عالية وطعم متعود عليه في كل مرة.

العنوان: الشيخ زايد – داون تاون مول.