كالما ميزون دارت في الشيخ زايد.. جاليري فني وكافيه هادي ومساحة للشغل والورش في مكان واحد
Calma Maison d’Art أثاث أماكن للعمل أماكن للمذاكرة الشيخ زايد تصميم جاليري خروجات ديكور فن كالما ميزون دارت لايف ستايل هاند ميد ورش فنية
Mohamed Talaat
لو زهقت من دوشة الكافيهات والمولات في الشيخ زايد وبتدور على مكان مختلف تقعد فيه وسط الفن والتصميم، يبقى كالما ميزون دارت يستاهل التجربة. المكان بيجمع بين جاليري لقطع الأثاث والديكور والهاند ميد، ومساحة هادية للشغل والمذاكرة، وكمان بيستضيف ورش وفعاليات فنية.
اسم المكان نفسه بيلخص جزء كبير من فكرته، Calma بمعنى الهدوء والسكينة، وMaison d’Art بالفرنسية معناها “بيت الفن”، علشان النتيجة “مساحة بتحاول تجمع بين الفن والتصميم والحرف اليدوية” وكمان فكرة التوقف للحظات بعيدًا عن دوشة اليوم.
في الدليل ده هنعرفك كل حاجة عن كالما ميزون دارت، من فكرته والمنتجات والأسعار لحد العنوان ومواعيد العمل والتواصل.
إيه المختلف في كالما ميزون دارت؟
كالما مش مجرد جاليري بيعرض ويبيع قطع الأثاث والديكور، لكن كمان بيجمع أكثر من تجربة في مكان واحد، هتلاقي فيه قطع أثاث وديكور مصنوعة هاند ميد، ومجوهرات وإكسسوارات، ده غير مساحة يمكن استخدامها للجلوس والعمل أو المذاكرة، وبينظموا ورش ولقاءات مرتبطة بالفن والتصميم والحرف اليدوية.
الفكرة هنا إنك مش محتاج تدخل المكان وأنت ناوي تشتري حاجة بالضرورة، لأن الزيارة نفسها تجربة فريدة.
مين وراء فكرة كالما ميزون دارت؟
مؤسسة المشروع هي الفنانة رشا يحيى، واللي كانت رؤيتها للمكان “الجمع بين الفن والحرف اليدوية والتصميم”، مع خلق تجربة هادية من نمط الاستهلاك السريع المعتاد للحياة.
ونقدر نقول أن الفكرة قريبة من مفهوم “Slow Creation” واللي بيرسخ مبدأ الاهتمام بالقطعة اللي اتعملت بروقان، ومرت بمراحل من التصميم والتنفيذ اليدوي، بدل الاعتماد فقط على الإنتاج المتكرر والسريع، وده بيظهر في عدد كبير من التفاصيل الموجودة داخل الجاليري، سواء في الأثاث أو الديكور أو الإكسسوارات، مع حضور واضح لعناصر مستوحاة من الفن والتراث المصري ولكن بصياغة معاصرة.
أثاث وديكور مصنوع يدويًا
من أهم أجزاء تجربة كالما مجموعة الأثاث والديكور المعروضة في المكان واللي بتعتمد بدرجة كبيرة على العمل اليدوي، ومنها تصميمات بيتم تنفيذ أو دهان تفاصيلها يدوي، وبالتالي ممكن تختلف اللمسات والتفاصيل بيت قطعة والتانية.
والاختيارات مش بس قطع الأثاث الكبيرة، لكن فيه كمان قطع أصغر للبيت، زي الأطباق والصواني والكوسترات وديكورات الحائط وغيرها، وده بيخلي المكان مناسب سواء كنت بتدور على قطعة أساسية للبيت أو مجرد تفصيلة صغيرة مختلفة.
مجوهرات وإكسسوارات من الأحجار الطبيعية
الفن في كالما مش واقف عند حدود الأثاث والديكور، لأن المكان هتلقى فيه مجموعة من المجوهرات والإكسسوارات المصنوعة يدويًا، وبعض التصميمات بتستخدم أحجار طبيعية، مع التركيز على شكل وتصميم القطعة باعتبارها جزء من التجربة الفنية للمكان، وبالتالي ممكن تكون زيارتك لكالما للتسوق في أكتر من فئة، مش بالضرورة للديكور فقط.
أكثر من جاليري.. مكان للعمل والمذاكرة وسط الفن
واحدة من أكثر أفكار كالما إثارة للاهتمام، لأنك لو بتشتغل Freelance، أو محتاج مكان هادي للمذاكرة، أو زهقت من الشكل التقليدي للكافيهات ومساحات الـCoworking، فالمكان بيقدم مساحة للجلوس والعمل وسط أجواء فنية هادية.
والتجربة قائمة على فكرة A Place to Pause، مكان تقدر تقلل فيه سرعة اليوم شوية، وتقعد وسط أعمال فنية وتصميمات مختلفة بدل الأجواء التجارية المعتادة، وده كمان بيخلي كالما اختيارًا ممكن تفكر فيه حتى لو مش داخل تشتري.
ورش ولقاءات لمجتمع مهتم بالفن
جاليري كالما بيستضيف من وقت للتاني فعاليات وورش متخصصة بالفن والتصميم وشغل الهاند ميد، ومعاها لقاءات تجمع أشخاص مهتمين بالمجالات الإبداعية، وهنا المكان بيلعب دور الـ” مساحة المجتمعية الإبداعية” بجانب دوره كجاليري ومتجر.
ولو هدف الزيارة حضور ورشة أو فعالية معينة، الأفضل متابعة الصفحات الرسمية للمكان قبل ما تروح، لأن مواعيد الأنشطة والورش بتتغير حسب البرنامج المعلن.
أسعار المنتجات في كالما ميزون دارت
الأسعار بتختلف بشكل كبير حسب نوع القطعة وحجمها والخامات المستخدمة فيها.
وهتلقوا قطع منزلية وإكسسوارات صغيرة تبدأ أسعارها من 150 جنيه للكوستر والطبق الصغير، وكمان فيه أغلى من كده وبتوصل الأسعار لأكثر من 30 ألف جنيه لقطعة أثاث كاملة، وده دليل على تنوع المنتجات المنطقي، والأفضل التأكد من سعر كل قطعة وقت الزيارة أو من خلال الموقع الإلكتروني، خاصة إن الأسعار والمنتجات المتاحة ممكن تتغير.
هل كالما مناسب لخروجة من غير شراء؟
أيوه، ودي نقطة مهمة في تجربة المكان، ولو انت مهتم بالفن والتصميم، أو بتدور على مساحة مختلفة تقضي فيها وقت هادي، ممكن تتفرج على الأعمال والتصميمات، وتقعد في المكان، أو تتابع جدول الورش والفعاليات وتشوف لو فيه تجربة تناسب اهتماماتك، وده تحديدًا اللي بيفرق كالما عن فكرة متجر الأثاث أو الديكور التقليدي.
كالما ميزون دارت في سطور
الاسم: Calma Maison d’Art
المكان: Karma 4 Mall – مبنى B2، الدور الثاني، الشيخ زايد، الجيزة.
طبيعة المكان: جاليري فني + مساحة إبداعية للعمل والهدوء + ورش وفعاليات.
المنتجات: أثاث، ديكور، مجوهرات، إكسسوارات وقطع منزلية مصنوعة يدويًا.
مواعيد العمل: يوميًا من السبت إلى الخميس، والجمعة إجازة.
رقم التواصل: 01283331147.
وبيقدموا خدمة التوصيل لمناطق مختلفة، ويُفضل التأكد من تفاصيل ومدة التوصيل مع المكان قبل الطلب.
إزاي تتواصل مع كالما ميزون دارت؟
علشان تتابع أحدث المنتجات والورش والفعاليات، تقدروا تتابعوا حساب Calma Maison d’Art على إنستجرام من هنا:
وكمان تقدروا تعرفوا أكتر عن المنتجات والتصميمات المتاحة من خلال الموقع الإلكتروني: calmamaisondart.com
سواء كنت بتدور على قطعة مختلفة لبيتك، أو مهتم بالفن والتصميم، عايز تحضر ورشة، وحتى لو محتاج مكان هادي تشتغل أو تقضي فيه وقت بعيد عن دوشة الكافيهات المعتادة، كالما ميزون دارت بيقدم سبب مختلف لزيارة الشيخ زايد.
مقترح
تسوق
مهرجان المانجو في القاهرة.. يومين أكل وورش ومسابقات في حديقة الحرية بالزمالك
أطفال أغسطس 2026 +12
فن وثقافة
