The Definitive Guide to Living in the Capital , Cairo , Egypt

ذوي الهمم بيعانوا كتير في حياتهم، وخاصة في إيجاد ملابس مناسبة يقدروا يلبسوها بدون إرهاق أو تعب، أو إنهم يقدروا يعتمدوا على نفسهم في لبسها بدون مساعدة من أي حد، لكن من خلال حلم مبتكر أصبح حقيقة، بقى موجود في القاهرة مشروع جديد بيوفر ملابس لذوي الهمم طبقًا لحالتهم.

الفكرة بدأت في 3 ديسمبر 2019، وهو “اليوم العالمي لذوي الهمم”، من خلال أشجان الأبحر، ومحمد وجدي، اللي قرروا أنهم يعملوا مشروعهم طبقًا للقواعد الرئيسية اللي تخدم ذوي الهمم مش مجرد منتج وخلاص، وبالفعل عملوا ورشة عمل شارك فيها 3 مصممين ملابس ومعاهم مجموعة من ذوي الهمم، وبعد عصف ذهني ومناقشات وتفاصيل كتير قدروا يوصلوا لنتيجة مميزة لتوفير احتياجات ذوي الهمم من الملابس اللي تسهل عليهم حياتهم.

أساس المشروع بدء لما صديقة لأشجان من ذوي الهمم واللي بتستخدم كرسي متحرك قالت لها أنها نفسها تلبس فستان سواريه، وطبعًا ده كان حاجة صعبًا جدًا لأسباب كتير، ومن هنا بدأت تفكر أشجان في الموضوع، واللي اتحول لحقيقة بعد الشراكة مع محمد وجدي اللي بدأ معاها المشروع من أوله كتنفيذ، بعد اقتناعه بالفكرة.

أشجان وضحت في تصريحات خاصة لـ”Cairo 360″، أن ذوي الهمم بيعانوا كتير في شراء ملابسهم لأن مافيش مكان في مصر مهما كان حجمه بيوفر بروفات خاصة بيهم علشان يقيسوا، سواء كانوا على كرسي متحرك أو مركبين أطراف صناعية أو حتى قصار القامة وغيرهم، وكل اللي بيحصل أنهم بيدخلوا يشتروا قطعة الملابس اللي بيشوفوا أنها ممكن تكون مقاسهم وبيروحوا بيها، ويلبسوها في البيت لو مظبوطة تمام، لو المقاس مش مظبوط يا إما بيظبطوه عند خياط أو بيرجعوا للمحل يستبدلوه، وده وصفته بأنه شيء “مزري ومر”.

بدء مشروع “آدبتف” “Adaptive Appeal” أنه ينتج أول مجموعة ملابس “الكوليكشن الصيفي”، لذوي الهمم في منتصف 2020، وده كان عن طريق مصممة الأزياء خلود عماد الدين، وكان مختص لذوي الهمم من “قصار القامة – والشلل الدماغي – ومستخدمي الأطراف الصناعية – ومستخدمي الكراسي المتحركة”، وثاني كولكشن ليهم كان “الشتوي” وهو من تصميم مصممة الأزياء سارة فاروق، اللي هو متاح حاليًا.

فكرة “آدبتف” “Adaptive Appeal”، أساسها إن الملابس الخاصة بذوي الهمم تكون مناسبة ليهم بحلول خاصة للديزاين تخليهم يلبسوا بدون تعب وكمان من غير إحراج لو حد منهم له استخدامات خاصة، مثلًا لو حد عنده طرف صناعي بيلاقى أزمة في ادخال البنطلون في الطرف الصناعي، فالتصميم عالج ده، وفيه ناس عندهم بتر من فوق الحوض بيبقى عندهم حزام حديد يمسك الطرف، ومهما كان نوع البنطلون هيتقطع، فتم معالجة ده في التصميم اللي معمول مخصوص له، ولو حد عنده شلل دماغي مابيقدرش يقفل أزرار اللبس بسبب حالته، فأصبح الحل إنه يكون فيه مغناطيس في كل الأزرار تساعد على سهولة اللبس، وهكذا.

تقدروا تشتروا أو تتواصلوا مع “آدبتف” من خلال صفحة الفيسبوك من هنا.