The Definitive Guide to Living in the Capital , Cairo , Egypt

الأم بترتب البيت، الأم بتخاف على عيالها، الأم عايزاهم كلهم جنبها، لكن الدنيا صعبة قوي، ومبتديش حد كل اللي محتاجه.

القصة بتبدأ من العيلة المكونة من أرملة وولدين وتلات بنات، كلهم عزلوا لبيت جديد، بعد وفاة والدهم.

إقبال هي الأم اللي بتبين اهتمامها بكل أولادها، وجنبها ابنها الكبير أحمد الشخصية السلبية المترددة، أما آدم اللي شغال في شركة أوبر، فهو كاريزما وشطور، بس خايب في المدرسة.

التلات بنات بقى كل واحدة فيهم عالم غير التاني خالص، الأولى أفنان اللي محاصرة بين كتبها ودراستها والدكتوراه، وعمرها ما اهتمت بحياتها ولا شكلها، أما إنجي بقى فهي الجميلة، الوَدودة، الاجتماعية وصاحبة كاريزما، والصغيرة هي آية البنوتة اللي بتلعب مزيكا، وكمان بتحب أستاذها جدًا.

الممثلين بيخدموا الموضوع بشكل كبير، المسلسل متعوب عليه، وكل ممثل حاسس إن هو البطل، فبيؤدي دوره بقلب وبيعمل حياة للشخصية، مش عارفين نقول إن فيه ممثل أقوى من التاني، أو إن فيه بطل وحيد، كل ممثل عامل دوره بجدية ومذاكره كويس، ومهتم بكل التفاصيل، وكمان القصة هايلة فده بيحتاج لتجسيد الموضوع بشكل مختلف، وده اللي حصل.

الإخراج وترتيب المشاهد هايل، مبتحسش بالزهق، بالعكس محتاج تبقى مركز كل لحظة علشان الكادرات سريعة، وكلها بتحكى عن حكايات متوازية جنب بعضيها، وده طبعًا مهم للتركيز.

الفرق ما بين الرواية الأصلية اللي كتبها إحسان عبد القدوس والمسلسل هو إن الرواية فيها الخيال أعلى بكتير وتفاصيل أكتر للشخصيات، لكن في المسلسل هنلاقي الواقع المر هو اللي مسيطر، وهو اللي بيقول كلمته، في الرواية إحسان بيقول: “الحياة مبادئ.. ابحث عن مبادئك تجد حياتك”، وده ملخص الفكرة اللي عايز يوصلها إحسان، واللي جسدها تامر في السيناريو، وعملها المخرج محمد شاكر خضير في صورة تستحق المشاهدة.

وكل اللي فات كوم، وموسيقى وألحان مدين، مع كلمات أمير طعيمة، وغناء أصالة، اللي عملوا حالة من الحزن والشجن عند المصريين في فيديو عدى المليون مشاهدة، واللي بعنوان (أصالة | الحب – تتر مسلسل لا تطفئ الشمس).

وتقدروا تشوفوه من هنا

لو جربت تعمل بحث بعنوان (لا تطفيء الشمس) على facbook، هتلاقي نتايج كتيرة جدًا لشباب بيتكلموا عن المسلسل وعاملين ليه صفحات خاصة بيه، بيعبروا فيها عن جودة العمل، وكمان الصفحة الرئيسية للمسلسل عليها تعليقات كتير إيجابية، مرصدناش غير تعليق بس على أدء الممثل محمد ممدوح، إنه بينهج كتير والكلام طالع منه مش مفهوم، لكن يمكن ده راجع لشخصيته المترددة اللي بيمثلها في المسلسل.

عمومًا شوفوه واتفرجوا وابعتوا لنا رأيكم، وده لينك صفحة المسلسل على الفيسبوك.

مسلسل: لا تطفئ الشمس

بطولة :   ميرفت أمين، محمد ممدوح، فتحي عبدالوهاب، أمينة خليل، ريهام عبدالغفور،  جميلة عوض.

ﺇﺧﺮاﺝ: محمد شاكر خضير

ﺗﺄﻟﻴﻒ: إحسان عبد القدوس

سيناريو: تامر حبيب

تصنيف العمل: اجتماعي

القناة: سي بي سي.