The Definitive Guide to Living in the Capital , Cairo , Egypt

برنامج كوميدي حصري لقناة «الحياة»،
عبارة عن أسكتشات تقليد منفصلة للشخصيات العامة المعروفة سواء سياسية أو إعلامية
أو فنية. البرنامج مالوش أي مقدمات وبـ يبدأ على الأسكتش مباشرة وبطل الحلقات
الدائم هو الفنان ماجد القلعي وبـ يجسد كل الشخصيات بالصوت والصورة، ولو حد ما يعرفش
ماجد القلعي هو واحد من أفضل المقلدين اشتهر بالأداء الصوتي لمعظم شخصيات برنامج
العرائس «اللي فات سات» وده كان بـ يذاع على التليفزيون المصري من حوالي 10 سنين
وحقق نجاح كبير، وكان ظهر كام مرة في برامج وفوازير على قنوات مصرية محلية في شهر
رمضان في الكام سنة اللي فاتت زي برنامج «اليوم يومك».

رغم أن وزنه زيادة شوية بس بـ يقدر
يتقمص الشخصية كويس جدًا ومش بـ يخليك تركز مع حجمه غير الملائم لبعض الشخصيات
النحيفة، لكن وزنه وملامحه ساعدته بشكل كبير لما قدم شخصيات زي يونس شلبي والشيخ
خالد الجندي.

المشكلة في ماجد القلعي أن نبرة صوته
الحادة والأنثوية شوية مش بـ تتغير من شخصية للثانية، ودائمًا هـ تحس أنه نفس
الشخص علشان البحة الثابتة المميزة في صوته، رغم أنها ساعدته لما كان بـ يقلد
شخصيات نسائية زي ميمي شكيب وأسمهان وسميحة أيوب، بس مع شخصيات زي القذافي والفريق
أحمد شفيق صوته كان نقطة ضعف رغم إتقانه للحركات واللزمات.

شخصية الإعلامي محمود سعد هي أيقونة
ماجد القلعي وغالبًا بـ تبقى محور حلقات «لخبطة» لما الحلقة تقدم في شكل برنامج
حواري، وبـ يقدم الشخصية بمنتهى الإتقان لدرجة أنك ممكن تتلخبط وأنت بـ تسمعها ومش
شايف الشاشة وممكن تفتكره محمود سعد فعلاً.

إنتاج البرنامج يعتبر عادي ودي مش سمة
إنتاج «تليفزيون الحياة» لأنه مش بـ يبخل على برامجه بالمادة والفنيات، بس واضح
أنه اتعمل على عجالة وكان ممكن يتم استخدام الخدع والمؤثرات بشكل أحسن، إنما كل
التركيز كان على الماكياج والسكريبت المكتوب دون الاهتمام بالتفاصيل الفنية الأخرى
زي الخلفيات والديكور والمونتاج والموسيقى التصويرية اللي كانت ضعيفة جدًا، وده
على عكس حلقات «كوميك شو» اللي قدمها «محمود عزب» قبل كده وكان الإنتاج فيها مميز
جدًا.

الحلقات ركزت بشكل رئيسي على الأحداث
السياسية الأخيرة في مصر والعالم العربي ولأول مرة شفنا فقرة تقليد متكاملة
ومباشرة للرئيس السابق حسني مبارك وهو بـ يلقي خطابه، وتقليد لأصوات عمرو موسى وأنس
الفقي وحبيب العادلي. بس كالعادة نبرة صوت ماجد خذلته في تقديم شخصية الرئيس مبارك
بس عوَّض ده بخفة دمه وتعبيرات وشه وتمثيل انفعالات الرئيس السابق، والسكريبت اللي
كتبه بحرفية محمد فتحي وهو بالمناسبة كاتب صحفي ساخر له عدة إصدارات ناجحة زي «مصر
من البلكونة» و«مصر وخلاص».

البرنامج ظريف ومسلي، وأن كان ممكن
تحس بالملل في بعض الأحيان لما تكون الشخصية المقدمة مش غنية بالتفاصيل أو غير
متقنة، أكيد السكريبت مش هـ يعمل كل حاجة.