The Definitive Guide to Living in the Capital , Cairo , Egypt

الشاي الشاي الشاي.. أوصفلك يا حبيبي الشاي.. مع الاعتذار طبعًا لكوكب الشرق “أم كلثوم” بس فعلًا الموضوع محتاج أغنية في حب الشاي وفوايده الكتيرة.

مش هنتكلم عن المزاج بتاع كوباية الشاي بتاعت العصاري، ولا كوباية الصبحية في الشغل أو يوم الأجازة، ولا كوباية الشياي على البحر ولا على القهوة وسط الأصحاب، احنا هنتكلم النهارده عن فوايد الشاي عمومًا، أيًا كان الوقت اللي هتشربه فيه، أو المكان اللي هتشربه فيه، بس نقطه مهمة قبل ما ندخل في الموضوع، مهم جدًا علشان تاخد أكتر وأكبر فايده من كوباية الشاي اللي هتشربها إنها تكون من غير سكر.. اتفقنا؟؟

بص يا سيدي، بصي يا ستي، مبدئياً كده الشاي من غير سكر مليان مضادات أكسدة، ودي وظيفتها منع الأمراض المزمنة، والمساعدة على إصلاح الخلايا التالفة في الجسم، وده تحديدًا اللي أكده جراح العظام في توليدو بولاية أوهايو في أمريكا “أنتوني كوري” إن نبات “كاميليا سينينسيس” أو “الشاي” فيه مضادات أكسدة معروفة باسم “الكاتيكين” و “إبيغالوكاتشين غالاتي”.

المضادات دي بقى شغلتها إيه؟؟ شغلتها إنها تقلل الالتهابات، وتقضي على حاجة اسمها “الجذور الحرة” في جسم الإنسان، والجذور دي بتبقى مرتبطة بأمراض كتير منها السرطان وألزهايمر وباركنسون وغيرها.

في تقرير علمي نشره موقع “فوكس نيوز” الأميركي بيأكد على إن للشاي بدون سكر 5 فوائد مهمة جدًا، منها مثلًا:

1- خفض نسبة الإصابة ببعض أنواع السرطان:

وده كلام مديرة الطب النفسي والتغذية ونمط الحياة في مستشفى “ماساتشوستس” العام وكلية الطب في جامعة هارفارد “أوما نايدو” اللي قالت إن الشاي ليه فوايد كتير منها الوقاية من أمراض سرطان الجلد والبروستات والرئة والثدي، وكل نوع شاي بيأثر على نوع سرطان مختلف.

2- بشرة صحية أكتر:

دراسات طبية أثبتت إن شرب الشاي الأسود بانتظام، بيقلل بشكل كبير من خطر الإصابة بسرطان الجلد.

3- الوقاية من النوع الثاني من السكري:

شرب الشاي الأسود كل يوم ممكن يقلل من خطر الإصابة بالنوع الثاني من مرض السكري، وده عن طريق خلال المساعدة في السيطرة على نسبة السكر في الدم بعد الوجبات.

4- أسنان قوية:

طبعًا هتقولوا طاب ازاي؟ ده كثرة الشاي بتصفر الأسنان أو تلونها، لكن صدقني الفايدة منه تستحق زي ما بتقول مجلة “علم أمراض الفم والوجه والفكين” إن الشاي الأخضر مثلًا  له تأثير مضاد للجراثيم، وبيقلل البكتيريا المسببة لتسوس الأسنان، وبالتالي شرب الشاي الأخضر من غير سكر كل يوم، ممكن يقلل تسوس الأسنان، والتجاويف فيها.

5- الشاي هيساعدك على النوم:

على عكس المعتقد السائد بإن الشاي والمنبهات بتخلينا نسهر، لكن الجديد إن الأرق علاجه إنك تشرب الشاي قبل النوم.

فبحسب دراسة  اتنشرت في دورية “أبحاث الطب التكاملي”، قالت إن الشاي بيساعد على تحسين جودة النوم، ونوعية الحياة عند المصابين بأرق خفيف إلى متوسط.، وكمان بيساعدعلى زيادة التركيز، وتسريع عملية الأيض.

لكن الشاي برده ليه عيوبه، منها مثلاً إنه بيمنع عملية امتصاص الحديد، وبيزيد من مخاطر حدوث النزيف، وفي حالة إنك شربت كميات كبيرة من الشاي يوميًا، ده هيعطل الاستفادة من بعض الأدوية لو بتاخد علاج، خصوصًا الخاصة بأمراض القلب وضغط الدم.

طيب السؤال اللي بيطرح نفسه دلوقتي.. أمتى وازاي ناخد أفضل فوايد في الشاي ؟؟ الدكاترة بيقولوا إن شرب ما بين فنجانين لـ 5 فناجين من الشاي يوميًا وبدون سكر هيديك الفوايد الخامسة اللي اتكلمنا عنها، وغيرهم كمان.