The Definitive Guide to Living in the Capital , Cairo , Egypt

بعد سلسلة من الإنجازات المحلية والعالمية اللي حققها أبطال مصر في لعبة الاسكواش، جه الوقت أخيرًا اللي يعترف فيه العالم بمكانة مصر في الرياضة دي، واعتبارها ملكة على عرش لعبة الاسكواش فى العالم، بناءً على تصنيف رابطة اللاعبين المحترفين للاسكواش  PSA.

التصنيف العالمي الجديد للعبة جه للرجال والسيدات، وتم في شهر أكتوبر الحالي بعد ما استمر البطل المصري “علي فرج” لاعب نادي وادي دجلة في حفاظه على المركز الأول بفارق 341 نقطة في مارس اللي فات علشان يزيح “محمد الشوربجي” صاحب المركز الثاني اللي كان محتل الصدارة لـ 40 شهر متتالي، وبكده يفضل “فرج” على القمة للشهر الثامن على التوالي.

أما في السيدات فتصدرت البطلة “رنيم الوليلي” لاعبة نادي وادي دجلة التصنيف بعد ما فازت ببطولة سان فرانسيسكو للاسكواش، وبكده تبقى حافظت على صدارتها لمدة 11 شهر متواصلين.

وعن التصنيف العالمي الجديد لسيدات الإسكواش، كشفت رابطة اللاعبين المحترفين للإسكواش   PSAعن استعادة البطلة المصرية “نور الطيب” لاعبة نادي هليوبوليس مكانتها في التصنيف العالمي علشان تبقى في المركز الثالث بعد ما كانت في المركز الخامس.

“نور الطيب” في مسيرتها الرياضية حصدت بطولة الصين الدولية في سبتمبر اللي فات، بعد ما فازت على البطلة المصرية برده “رنيم الوليلي” لاعبة نادي وادي دجلة، وقبل ما تخسر من “رنيم” برده بس المرة دي في نهائي بطولة سان فرانسيسكو، وبكده فضلت “رنيم” محافظة على المركز الأول لمدة 11 شهر.

أما البطلة “نور الشربيني” فجت في المركز الثاني اللي حافظت عليه رغم إصابة في الركبة، اضطرتها تنسحب من بطولة سان فرانسسكو.