The Definitive Guide to Living in the Capital , Cairo , Egypt

كل سنة مع بداية يوليو، تبدأ عربيات التين الشوكي تنتشر في شوارع القاهرة. تلاقيها على النواصي، جنب الكباري، قدام المحطات، أو حتى داخل الحواري. عربية بسيطة مصنوعة من الخشب، بس معاها كنز حقيقي من الطعم والفوايد.

الناس بتحب التين الشوكي لأنه مرتبط بذكريات، بحواديت زمان، وباللمة حوالين البياع وهو بيقشر الثمرة بسرعة ومهارة. لكن اللي ناس كتير ما تعرفوش إن الفاكهة الصبارية دي مش بس بتفرح البطن.. دي بتخدم الجسم من فوق لتحت!

بحسب موقع “healthline” العلمي، التين الشوكي مليان ألياف طبيعية، يعني بيساعدك تحس بالشبع لفترة أطول، وده يخليه صديق مثالي للناس اللي بتحاول تخس أو تنظم أكلها. غير كده، بيحتوي على مضادات أكسدة تحمي الجسم من الالتهابات، وكمان بيساعد في تنظيم مستويات السكر في الدم، وده مفيد جدًا لمرضى السكري.

وكأن كل ده مش كفاية، التين الشوكي كمان فيه فيتامين سي وماغنسيوم وبوتاسيوم ونحاس، يعني بيقوي المناعة، وبينشط الدورة الدموية، وبيقاوم التوتر. والأجمل؟ بيخلي بشرتك أفضل وشعرك ألمع! لدرجة إن شركات كتير بتستخدمه في منتجات التجميل.

كمان فيه مركبات بتساعد في حماية الكبد، وبتحافظ عليه من التلف، وده سر استخدامه من زمان في الطب الشعبي في بلاد زي المكسيك، وحتى في دول البحر المتوسط زي إيطاليا.

كل ثمرة تين شوكي فيها ما يزيد عن 3 جرامات من الألياف وسعرات حرارية قليلة، يعني فعلاً وجبة خفيفة مفيدة ومنعشة، مش بس لذيذة!

وده غير إن سعرها في متناول الكل، وبتتباع ببلاش تقريبًا لو قارناها بأي فاكهة تانية بنفس القيمة الغذائية.

فالمرة الجاية وأنت ماشي في الشارع، وشوفت عربية تين شوكي، ما تفوتهاش. اقف، اتفرج على المهارة في تقشيرها، وكل ببطء.. وخلي الطعم يفكرك إن البساطة ساعات بتخبي وراها حاجات عظيمة!