The Definitive Guide to Living in the Capital , Cairo , Egypt

ليلة رأس السنة في مصر بقت عند ناس كتير مناسبة للحفلات والسهر والمزيكا لا تقل أهمية عن الاحتفال نفسه. ومع وداع 2025 واستقبال 2026، عدد كبير من نجوم الغناء قرروا يرجعوا بقوة لحفلات رأس السنة في فنادق ومسارح مصر، بحفلات ضخمة بتجمع ألوان موسيقية مختلفة وأسعار تناسب اختيارات متعددة. في الدليل ده، جمعنالك خريطة حفلات رأس السنة 2026 داخل مصر، بالأماكن، النجوم المشاركين، ومتوسط أسعار التذاكر علشان تختار السهرة اللي تناسبك.

خريطة حفلات رأس السنة 2026 في مصر

محمد فؤاد، رامي عياش، مصطفى حجاج، كارمن سليمان

حفلة غنائية كبيرة بتجمع أكتر من نجم، وبتقام في فندق كيمبينسكي بالتجمع الخامس. الحفل بيقدم باقة متنوعة من الأغاني الرومانسية والشعبية والبوب، وبيستهدف جمهور واسع من مختلف الأعمار.

أسعار التذاكر: من 7500 جنيه لحد 25 ألف جنيه حسب الفئة.

تامر حسني، تامر عاشور، إليسا

واحدة من أضخم حفلات رأس السنة 2026، وبتقام على مسرح كابيتال أرينا في العاصمة الإدارية. الحفل بيجمع نجوم الصف الأول، وبيُتوقع له حضور جماهيري كبير.

سعر التذكرة موحد: 750 جنيه للفرد.

صابر الرباعي، رضا البحراوي، رحمة محسن، همام إبراهيم

حفلة بتجمع الطرب العربي مع الغناء الشعبي، وبتقام في فندق سميراميس إنتركونتننتال بالقاهرة، وبتُصنف كواحدة من أغلى حفلات رأس السنة 2026 في مصر.

أسعار التذاكر بتبدأ من 10 آلاف جنيه للفرد، وبتوصل لباكدجات مخصصة للطاولات.

محمود العسيلي ورحمة محسن

حفلة بطابع شبابي وموسيقى معاصرة، مناسبة للي بيدوروا على أجواء احتفالية مختلفة. أسعار التذاكر بتبدأ من 15 ألف جنيه.

نوال الزغبي

النجمة اللبنانية نوال الزغبي بتحيي حفلة رأس سنة في فندق سوفيتيل داون تاون النيل، وبتقدم خلالها مجموعة من أشهر أغانيها، وسط أجواء احتفالية خاصة ومناسبة لمحبي البوب العربي.

مدحت صالح

حفلة كلاسيكية بطابع رومانسي، بيحييها الفنان مدحت صالح على مسرح Theatro Arkan، بمصاحبة فرقته الموسيقية بقيادة المايسترو عمرو سليم.

أسعار التذاكر بتتراوح بين 1300 و5300 جنيه.

نصائح سريعة قبل ما تحجز

بسبب الإقبال الكبير على حفلات رأس السنة، يُفضل الحجز المبكر والتأكد من أماكن الجلوس، وكمان مراجعة شروط الدخول لكل حفل، خصوصا إن بعض الأماكن بتحدد Dress Code أو فئات عمرية.