احكي للعالم: حملة للتعريف بالتراث المنسي بمصر
أثار القاهرة احكي للعالم اكتشف مصر حماية التراث
Cairo 360
من كم سنة بدأ يكون فيه اهتمام خاص بالأماكن التراثية، خصوصًا بين جيل الشباب اللي بقوا عاوزين يعرفوا أكتر عن تاريخ بلدهم ويحموا تراثهم من إن عوامل التعرية أو الإهمال تبوظه. خاصة كمان لأن التراث مش ملك لأصحاب البلد بس ولكنه أرث للعالم كله ومن حق الجميع يعرفه ويستمتع بيه في حالة كويسة.
ومن هنا ظهرت فكرة حملة “احكي للعالم” عن التراث المنسي في مصر، والحملة نشاط خارج من مبادرة “اكتشف مصر” اللي بتهدف للتوعية بالأماكن الأثرية غير المعروفة والمهملة عن طريق التوعية بيها وتوثيقها. بالتعاون مع موقع كايرو 360، وموقع بوابة الحضارات بمؤسسة الأهرام واللي مهتم بشكل كبير بنشر موضوعات صحفية عن التراث والتاريخ، وقسم الثقافة والتراث بمؤسسة ولاد البلد، واللي عملوا حملة باسم عمارة البلد بهدف إنقاذ العمارات القديمة واللي معرضة للهدد.
والحملة هدفها زيادة الوعي بالأماكن الأثرية غير المعروفة والمهملة خاصة الأماكن اللي قربت تختفي، بهدف حمايتها وحفظها سواء بالتوثيق عن طريق كتابة المقالات والفيديوهات أو بعمل جولات ميدانية لها.
الحملة هتبدأ في اليوم العالمي للتراث يوم الأربعاء 18 إبريل 2018، الساعة 4 في مكتبة مصر العامة وهيكون فيه ندوة عن أول مكان هتنشر عنه الحملة وهو مقام الشيخ العز بن عبد السلام، وهو قاضي القضاة وإمام مسجد عمرو بن العاص وحامي العالم من خطر التتار ثم الصليبيين. وتوفى سنة 660 هجريًا والمقام بتاعه ما ترممش من ساعتها. ده غير عمل ورش عن كيفية الحفاظ على التراث، وأفلام تعريفية عن معظم الأماكن.
الحملة هتركز النشر عن 10 أماكن تراثية غير معروفة في نفس الوقت في 3 منصات إعلامية، بمعدل مكان واحد في الإسبوع، علشان توعي بأهمية ومكانة الأماكن دي بالإضافة لدورها في تنشيط السياحة العالمية.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
