“رمضان” على الشاشة!
رمضان 2023 رمضان على الشاشة المصرية رمضان في الدراما شهر رمضان في السينما شهر رمضان في دراما التليفزيون
Cairo 360
زي ما اشتهر عن رمضان المبارك أنه الشهر اللي بتتجمع فيه العائلة أمام المسلسلات اللي بتعرضها شاشة التليفزيون، رمضان كمان كان جزء أساسي من أحداث مسلسلات وأفلام وأعمال فنية كتير. يمكن بسبب الطبيعة الخاصة للشهر الكريم واحتفالاته، واللي كان لازم تجذب انتباه صناع الدراما، وتخلي رمضان بطل أساسي من بعض الأعمال اللي هنحكي لكم عن بعضها.
عسل أسود
فيلم أحمد حلمي الشهير المنتج سنة 2010. اللي بيحكي عن (مصري) الشاب اللي بيرجع من أمريكا لمصر علشان يقضي رمضان مع عيلته، ثم يكتشف حجم الاختلافات بين المجتمع الأمريكي والمصري.
صناع (عسل أسود) اختاروا شهر رمضان كفترة زمنية لأحداث الفيلم لأنهم عارفين أن رمضان في مصر حاجة تانية (بجد مش علشان الأغنية) وبالفعل بيندهش (مصري) من حجم الترابط وحالة الأخوة والمحبة في المنطقة الشعبية اللي بيسكن فيها واللي بتوصل أقصى حد لها خلال رمضان.
بيميز الفيلم تركيزه على أبسط التفاصيل، زي الزينة في الشوارع، ولعب الأطفال ولمة الأسرة حوالين الفطار، وكل الطقوس الرمضانية الجميلة.
رمضان كريم
ماينفعش نتكلم عن الأعمال اللي تناولت شهر رمضان، بدون الكلام عن المسلسل اللي بيحمل نفس الاسم! اتعرض الجزء الأول من مسلسل (رمضان كريم) في شهر رمضان سنة 2017. حاليًا بيُعرض الجزء الثاني من نفس المسلسل.
مسلسل (رمضان كريم) بيحكي عن مجموعة أسر ساكنة في منطقة شعبية، وبيحصل كم من الأحداث الإنسانية والتفاعلات المستمرة بينهم، بينما بيكون شهر رمضان هو العامل المشترك بين كل الأحداث دي.
الميزة في (رمضان كريم) أنه جسد لنا الحياة الرمضانية اليومية بدون كليشيهات الحارة المصرية اللي بنشوفها في أعمال تانية، زي ضرورة وجود بطل واحد المسلسل كله بيدور حواليه، أو وجود تيمة انتقام أو أحداث مش متعودين عليها في حياتنا اليومية التقليدية، بالعكس المسلسل من أفضل ما يميزه أنه دراما اجتماعية حياتية حقيقية. وده اللي خلانا نحب نتابعه.
حكاية مهلة أخيرة
هل شهر رمضان ممكن يكون المهلة الأخيرة قبل انهيار الحياة الزوجية بين شابين؟ هي دي الحبكة اللي اشتغل عليها صناع قصة (مهلة أخيرة) اللي تم عرضها ضمن أحداث مسلسل “في كل أسبوع حكاية”.
القصة بتحكي عن (دنيا) و (حسن) الزوجين اللي بيتشاركا في سوبر ماركت، لكن تراكم الأقساط عليهما مش بس بيهدد حياتهما الاقتصادية، لكن حياتهما الأسرية كمان. ثم بتيجي (مهلة أخيرة) لنهاية شهر رمضان قبل ما يتم الطلاق بين الاتنين. فهل فيه حاجه ممكن تتغير خلال الشهر الكريم؟
طبعًا دي مش كل الأعمال اللي تناولت شهر رمضان في السينما والدراما المصرية، لكنها مجموعة من أشهر الأعمال اللي هتوريكم رمضان بشكل تاني، بدل رمضان اللي بنشوف من خلاله شاشة التليفزيون، المرة دي بيكون رمضان هو اللي بيتم تجسيده على الشاشة.
مقترح
معالم وسياحة
المتحف القبطي بالقاهرة.. هنا أكبر مجموعة آثار قبطية في العالم
المتحف القبطي المتحف القبطي المصري +3
الحياة في كايرو
