The Definitive Guide to Living in the Capital , Cairo , Egypt

الصورة الرئيسة من مشروع تلوين صور سعاد حسني للفنان محمود متولي

مافيش شك أن أكتر أغنية بيحبها المواطن العربي من المحيط إلى الخليج، خاصة مع قدوم فصل الربيع، هي أغنية “الدنيا ربيع” اللي غنتها الفنانة الجميلة الراحلة سعاد حسني وكتب كلماتها الشاعر الراحل الكبير صلاح جاهين ولحنها الملحن المصري الكبير الراحل كمال الطويل.

حوالي نصف قرن، وماقدرتش أي أغنية تانية تزيح أغنية “الدنيا ربيع” من على عرش أغاني الربيع في عالمنا العربي، وأصبحت الأغنية بمثابة الأغنية الرسمية لاحتفالات “شم النسيم” في مصر، أو “عيد الربيع”.

وفي تسجيل صوتي نادر بتحكي الفنانة الراحلة سعاد حسني قصة الأغنية الرائعة دي وبتقول: كنا بنصور في مركب (الأوتوبيس النهري)، وبعدين وأنا رايحة أغير هدومي وأغير تسريحة الشعر بصيت لقيت جنبي في العربية اللي جنبي الأستاذ كمال الطويل (الملحن) فراحت طالعة في مخي أن أنا أقول للأستاذ كمال الطويل أن هو يلحن الأغنية وهو كان بقاله 8 سنوات مبتعد عن المزيكا خالص.

وبتكمل السندريلا وتقول: من العربية وفي إشارة المرور ناديت عليه وقلت له أستاذ كمال والنبي تيجي تعملهالنا وعندنا فيلم أميرة حبي أنا بنصوره دلوقتي، كنا جنب مكان التصوير بالضبط، فقال لي أغنية إيه؟ قلت له أغنية “الدنيا ربيع” وهي تأليف الأستاذ صلاح جاهين والفيلم من إخراج الأستاذ حسن الإمام، وموضوع جميل جدًا تعالى وإحنا هنحكي لك الموضوع.

وبتواصل سعاد حسني الحكاية وتقول: راح ماكدبش خبر وراح نازل وقعدنا حكينا له قصة الفيلم والموضوع والمشهد اللي بغني فيه الأغنية دي. فاندمج جداً في أحداث الرواية وعرف بالضبط الغنوة بتتقال في الموقف ده ليه، وبصينا لقيناه وافق، وما كناش مصدقين إنه هيوافق لأنه مبطل بقاله كتير، وماكدبش خبر وخد الكلام معاه وكان يومها مسافر إسكندرية وقال أنا تحت أمركم أنا هقعد أشتغل فيها شوية وأنتم لما تخلصوا شوية تصوير وتحبوا أن إحنا نقعد نحفظها كلموني في التليفون وأنا آجي لكم على طول.

وبتختتم السندريلا حكاية أغنية “الدنيا ربيع” وتقول: فعلًا أخدها وبعدها بيومين لقيناه رجع لنا تاني وقعد يلحنها وينقر على الترابيزة عند الأستاذ صلاح جاهين وخلصت في ليلة واحدة.

وبتقول كلمات الأغنية:

الدنيا ربيع والجو بديع

قفلي على كل المواضيع

قفل قفل قفل قفل

ما فيناش كاني وما فيناش ماني

كاني ماني إيه دي الدنيا ربيع

الدنيا ربيع.. الدنيا ربيع

الشجر الناشف بقى ورور الله

والطير بقى لعب ومتهور كدة هو

وإحنا حنفرفش إمتى أمال

دلوقت ولا في سبتمبر

قال لك قال لك قال لك إيه قال لك آه