The Definitive Guide to Living in the Capital , Cairo , Egypt

كتير مننا بيحب البان كيك واحنا بشكل خاصة بنعشقه كحلو وليس كوجبة إفطار، وخلينا نعرفه بأنه نوع من الفطائر الدائرية مصنوعة من العجيبن وبيضاف لها الصوصات المختلفة والفواكه، وفيه منه الحجم الكبير ومنه “الميني” معشوق الكثيرين، واحنا النهاردة هنقولكم على تجربة لميني بان كيك مميز في الطعم اكتشفناه بالصدفة في Smoothie Paradise، وخلال السطور الجاية هنقولكم على كل التفاصيل لتجربتنا.

البداية Smoothie Paradise له فروع كثير وهما عندهم مشروبات متميزة ومعظمها سموزي، وبيقدموا مشروباتهم تيك أواي في الغالب والدليفري بيكون عن طريق تطبيقات التوصيل، ومعروف عنهم أن فروعهم صغيرة ومفيش مكان للقعدة فيها وبيغلب عليها اللون الأصفر في كل فروعه، وشعارهم “نعنشنا القهوة”.

البداية أننا شفنا فرع لهم في الدقي، وقررنا نجرب من عندهم مشروب موهيتو أناناس وكان سعره 50 جنيه، والحقيقة كان خفيف جدًا ومكتش الأفضل بالنسبة لنا، ولكن واحنا واقفين شفنا أنهم بيعملوا بان كيك وقررنا نجربه.

طلبنا من عندهم بان كيك شيكولاته وواحد لوتس، وكان السعر للعلبة 50 جنيه، وكان عبارة عن 15 قطعة ميني بان كيك متغرقين في الشيكولاته وصوص اللوتس ولو هتضيفوا عليه فواكه هيكونوا 10 قطع بس.

أول ما فتحنا العلبة ريحة الشوكولاتة الغنية واللوتس كانت كفيلة تفتح الشهية فورًا، وقطع الميني بان كيك نفسها كانت ذهبية وهشّة جدًا، مش مجرد عجينة مكلكعة، ومع كل قطعة بتحسوا بقوام العجينة الخفيف وهو دايب في صوص الشوكولاتة اللي طعمه واضح إنه مش مجرد صوص عادي، وصوص اللوتس كان كريمي، والتوازن بين حلاوة الصوص والعجينة نفسها كان احترافي بمعنى الكلمة.

رغم أن الريفيو لمنتج واحد ولكن احنا بنشجعكم جدًا تجربوا البان كيك من سموزي برادايس لان جودتهم تفوقت على أماكن كبيرة جدًا متخصصة وبسعر أقل بكتير منهم.

تقدروا تعرفوا أكتر عنهم من خلال صفحة الفيسبوك من هنا.