بيل جيتس يكشف قائمته الذهبية للقراءة في الإجازات: 5 كتب هتغير نظرتك للعالم
بيل جيتس تطوير الذات تغير المناخ روايات سياسة علوم كتب العطلات كتب للتفكير نصائح قراءة
Cairo 360
مع اقتراب رأس السنة وبرودة الجو، بيل جيتس شايف إن أحسن حاجة تعملها الفترة دي هي إنك تقعد مع كتاب كويس. في تدوينة على مدونته، كشف الملياردير الأميركي عن قائمته السنوية لأفضل الكتب للقراءة في الإجازات، وقال إن كل كتاب فيها بيكشفلك جانب مهم في حياتك.
القائمة فيها 5 كتب متنوعة بين الرواية والعلوم والسياسة، وبتغطي مواضيع زي البحث عن معنى الحياة بعد التقاعد، فهم أزمة المناخ، أسرار التواصل البشري، تحولات الصناعات الإبداعية، وأسباب تراجع قدرة أميركا على إنجاز المشاريع الكبيرة.
“بيل” كتب: “كل كتاب من دول بيكشف الستار عن جانب أساسي من حياتنا: إزاي نلاقي هدف في مرحلة متأخرة من العمر، نفكر في التغير المناخي، نفهم الصناعات الإبداعية، ونتعامل صح مع البشر، وليه أميركا فقدت القدرة على الإنجاز الكبير”.
تعالوا نتعرف على الكتب الخمسة اللي اختارها “جيتس”!
Remarkably Bright Creatures – مخلوقات مشرقة بشكل مبهر – شيلبي فان بيلت
رواية بتدور في حوض أسماك، وبتتحكى جزئيًا من وجهة نظر أخطبوط! “جيتس” بيحب الروايات اللي بتخليك تشوف الشخصيات بطريقة مختلفة. القصة عن أرملة في السبعين من عمرها شغالة حارسة ليلية في الأكواريوم وصداقة غير متوقعة مع الأخطبوط “مارسيلوس”، وبتحكي عن الوحدة والبحث عن معنى الحياة بعد التقاعد.
الكتاب مترجم للعربية، وتقدر تشتريه من اللينك ده.
Clearing the Air – هانا ريتشي
كتاب علمي بيجاوب على 50 سؤال عن أزمة المناخ، من الطاقة المتجددة لطرق تجنب الكوارث المناخية. “جيتس” وصفه بأنه أوضح شرح قرأه عن التحدي المناخي، ونبه على النهج الواقعي المبني على بيانات بعيد عن التشاؤم.
Who Knew – باري ديلر
مذكرات قطب الإعلام الأميركي اللي غير صناعة التلفزيون والإنترنت. “جيتس” اللي عنده صداقة طويلة بديلر، اتفاجأ بتفاصيل جديدة عن مسيرة الرجل اللي ابتكر الأفلام التلفزيونية وكان من أوائل المهتمين بالإنترنت.
When Everyone Knows That Everyone Knows – ستيفن بينكر
كتاب عالم النفس الشهير من جامعة هارفارد، بيشرح فيه تأثير “المعرفة المشتركة” على التواصل البشري والتعاون. “جيتس” وصفه بإنه كتاب عملي وسهل القراءة رغم تعقيد موضوعه، وقال إنه غير نظرته للتفاعلات اليومية.
Abundance – إزرا كلاين وديريك تومسون
كتاب سياسي اقتصادي عن سبب تراجع قدرة أميركا على بناء مشاريع كبيرة، من البنية التحتية للابتكارات العلمية، وبيقدم “أجندة الوفرة” لتجاوز العقبات التنظيمية. جيتس أكد إن الكتاب مش بيقدم كل الحلول، لكنه بيطرح الأسئلة الصح، خصوصاً مع بيروقراطية بتعطل تقدم المشاريع الكبرى.
بيل جيتس قال في النهاية: “لو عاوز كتب تفتحلك فضولك وتوريك إزاي العالم بيشتغل، القايمة دي هي أفضل حاجة تبدأ بيها”.
مقترح
كتب
بيل جيتس يكشف قائمته الذهبية للقراءة في الإجازات: 5 كتب هتغير نظرتك للعالم
بيل جيتس تطوير الذات +7
الحياة في كايرو
