“الشاي.. ثقافات وطقوس وحكايات”.. كتاب هيظبط مزاجك!
أدب الرحلات الشاي في اليابان الشاي في مصر القاهرة اليوم العالمي للشاي تقاليد الشعوب ثقافة الشاي دار العربي طقوس الشاي كايرو 360 كتاب الشاي كتب جديدة كريستوف بيترز مشروبات ساخنة
Cairo 360
الصورة الرئيسية: Elin Melaas
النهارده 21 مايو، والعالم بيحتفل بـ”اليوم العالمي للشاي”؛ المشروب اللي ليه سحر خاص بيجمع الناس على طاولة واحدة، من غير أي ترتيب مسبق، وبيفتح باب الحكايات من أول رشفة. وبهذه المناسبة، بنرشح لكم كتاب مميز اسمه “الشاي.. ثقافات وطقوس وحكايات”، للمؤلف الألماني كريستوف بيترز، واللي ترجمته العربية صدرت عن دار العربي للنشر والتوزيع، بترجمة الدكتور سمير منير.
الكتاب ده مش مجرد دليل لأنواع الشاي، لكن كأنه جلسة دافية حواليها صحاب، كل واحد فيهم بيحكي عن علاقتنا بالشاي من أول مصر وتركيا، لحد اليابان وألمانيا وإنجلترا.
وفيه فقرة لذيذة عن علاقتنا – كمصريين – بكوباية الشاي اللي بتتقدم في كل مناسبة، سواء بعد الأكل أو وسط الكلام أو حتى وقت الفراغ!
الجميل كمان إن الكتاب بيحكي بأسلوب فكاهي عن علاقتنا العجيبة بين الشاي وكرة القدم، وحكايات الكاتب مع والده ووالدته والذكريات اللي ارتبطت بكوباية الشاي في طفولته، وكأنها مشروب بيربط بين الأجيال.
الكتاب بيحكي كمان عن الرحلة المثيرة لشجرة الشاي من الهند لإنجلترا، وازاي بدأ تصدير الشاي الهندي الأسود بعد اكتشاف “كاميليا آسام” في غابات الهند سنة 1823.
ووسط كل الحكي ده، الكاتب بيأكد في المقدمة الخاصة بالنسخة العربية إن الشاي في مصر مش مجرد مشروب، لكنه “سحر اجتماعي” بيلم الناس حوالين بعض، ويساعدهم يسمعوا لبعض، ويحكوا، ويشاركون تفاصيل يومهم.
فلو كنت بتحب الشاي، أو حتى بتشربه عشان تهدى من زحمة اليوم، الكتاب ده هيكون رحلة ممتعة ليك.. كأنك قاعد في قعدة شاي مع ناس بتحبهم.
مقترح
معالم وسياحة
جولة وسط الوحوش والمحنطات: اكتشف متحف الصيد في قصر الأمير محمد علي
أماكن تاريخية أماكن مش معروفة +8
الحياة في كايرو
