The Definitive Guide to Living in the Capital , Cairo , Egypt

الصورة الرئيسية: Rhamely on Unsplash

معرض القاهرة الدولي للكتاب 2026 مش بس أكبر تجمع ثقافي في مصر، ده كمان خروجة كاملة بتبدأ من أول جناح كتب لحد آخر فنجان قهوة قبل ما تمشي. وفي الدورة السابعة والخمسين للمعرض، سنة 2026، آلاف الأسر والشباب بيمضوا ساعات طويلة جوه المعرض، وده طبيعي يخلي سؤال الأكل حاضر دايمًا: ناكل فين؟ وبكام؟ وإيه الخيارات اللي تناسب كل الأذواق والميزانيات؟

كايرو360 جمعتلك في الدليل ده كل اللي محتاجه عن الأكل في معرض الكتاب 2026، من الفطار الشعبي السريع، لحد وجبة تشبعك وتكمل بيها اليوم، وكمان الحلويات والقهوة اللي بتظبط المود وأنت بتقلب في الكتب.

الأكل في معرض الكتاب 2026.. اختيارات تناسب كل الناس

تنظيم منافذ الطعام في معرض الكتاب السنة دي واضح إنه واخد في اعتباره التنوع الكبير في الزوار. هتلاقي أكل شعبي، وأكلات سريعة، وسلاسل معروفة، وكل ده بأسعار متفاوتة تخليك تختار على مزاجك ومن غير ما تحس إنك مضطر تخرج من المعرض علشان تاكل بره.

فطار شعبي واقتصادي

لو نازل المعرض بدري أو حابب تبدأ يومك بحاجة خفيفة وسريعة، عربات الفول والفطار الشعبي موجودة وبقوة. أسعار الفطار بتبدأ من حوالي 30 جنيه للفرد، وده خيار مناسب جدًا للعائلات أو لأي حد عاوز يوفر ويكمل اليوم من غير مصاريف زيادة.

الكشري.. الاختيار العملي دائمًا

الكشري دايمًا حاضر في معرض الكتاب، والسنة دي بأسعار بتبدأ من 40 جنيه. وجبة مشبعة، سريعة، ومناسبة لو بتلف كتير ومش عاوز تقطع الجولة عشان قعدة طويلة.

وجبات مشبعة جدًا

لو نفسك في حاجة تقيلة شوية، هتلاقي شاورما وكريب وسندوتشات لحوم وفراخ، بأسعار بتبدأ من حوالي 100 جنيه وتزيد حسب الحجم والمكونات. الاختيارات دي مناسبة للشباب أو اللي قاعد اليوم كله في المعرض وعاوز وجبة كاملة.

ما يفوتكش كمان: تذكرة بـ10 جنيه بس.. كل اللي محتاج تعرفه عن أتوبيسات معرض الكتاب 2026 وخطوطها

أهم مطاعم معرض القاهرة الدولي للكتاب 2026

لعشاق الكشري

كشري سيد حنفي اسم معروف عند ناس كتير، ومشاركته في المعرض السنة دي مميزة. غير الكشري التقليدي، تقدر تجرب طاجن المكرونة بالفراخ، وجبة تقيلة ومشبعة وبتخليك تكمل اليوم من غير جوع. اختيار مناسب لو داخل المعرض من بدري وعاوز وجبة تحسب.

لعشاق الحواوشي والكفتة

مطعم كوفتة وشيش (Koftaxshish) بيقدملك لحمة وكفتة وحواوشي بطعم مصري صريح، كوفتة وشيش اختيار ممتاز. السندوتشات سخنة وطازة، وبتناسب اللي عاوز ياكل أكل بيتي بطابع الشارع المصري، من غير ما يطلع بره المعرض.

لعشاق الشاورما والتومية

أبو مازن السوري اسم تقيل في عالم الشاورما، ومشاركته في معرض الكتاب دايمًا بتكون زحمة. شاورما فراخ ولحمة، تومية مظبوطة، وخيارات تناسب اللي عاوز وجبة سريعة بطعم مضمون.

لعشاق الفطار الخفيف والقهوة
عندك سيلانترو وأبو عوف، يعني لو محتاج بريك قهوة وسط الزحمة، أو فطار خفيف قبل ما تكمل جولتك، سيلانترو وأبو عوف موجودين. قهوة، مشروبات ساخنة، وسناكس خفيفة تناسب اللي داخل يلف على الكتب بهدوء وعاوز مزاج رايق.

لعشاق الحلويات والآيس كريم

لازم تعدي على العبد، ومن غير العبد، ما تبقاش خروجة كاملة. الآيس كريم والحلويات موجودة لعشاق السكر، وخصوصًا لو معاك أطفال أو عاوز تختم اليوم بحاجة حلوة قبل ما تمشي.

نصائح سريعة لو هتاكل في معرض الكتاب

حاول تاكل في أوقات بعيدة عن الذروة، خصوصًا وقت الظهر، عشان الزحمة، ولو معاك أطفال، الأكل الشعبي والكشري اختيارات آمنة وسريعة.

القهوة بريك مهم، خصوصًا لو ناوي تقضي اليوم كله جوه المعرض. والأهم حدد ميزانيتك من الأول، لأن الاختيارات كتير ومغرية.

وأخيرًا..

الأكل في معرض القاهرة الدولي للكتاب 2026 بقى جزء أساسي من التجربة، مش مجرد حاجة جانبية. تنوع واضح، أسعار مختلفة، واختيارات تناسب كل الأذواق، من الفطار الشعبي لحد الشاورما والحلويات. دليل كايرو360 ده معمول عشان يخليك تستمتع بالكتب وبالأكل من غير حيرة.