The Definitive Guide to Living in the Capital , Cairo , Egypt

الكشري مش مجرد أكلة مصرية، ده طقس كامل من طقوس الحياة في القاهرة. من أول ريحة الصلصة والدقة اللي بتغريك وإنت ماشي في الشارع، لحد أول لقمة بتخليك تحس إنك في حضن البلد. وسواء كنت ساكن في المهندسين أو شبرا أو السيدة زينب، أكيد نفسك تعرف فين أحسن وأجمد كشري ممكن تاكله في القاهرة سنة 2025.

إحنا في كايرو 360 قررنا نلف العاصمة ونجرب بنفسنا علشان نختار لك أفضل 10 محلات كشري في القاهرة مرتبة من الحلو للأحلى.. من أول حمادة لحد الخديوي شبرا الخيمة، واللي فعلاً يستحق لقب “أحسن كشري في مصر”.

حمادة

لسة مش عارفين السر ورا اسم “حمادة” المنتشر في كل حتة، بس اللي نقصده هنا ليه فروع في شارع السودان وجامعة الدول. موقعه ممتاز، والطعم مقبول، بس لسه محتاج تركيز أكتر في التفاصيل. بيقدم مشتملات كتير، والدقة كويسة لكن ناقصها اللمسة الأخيرة.

العنوان: 23 جامعة الدول العربية – المهندسين.

الرقم المختصر: 19713.

الونش

الونش في 17 شارع المحطة – الجيزة، سمعنا عنه كتير، والتجربة كانت كويسة بس مش بنفس حجم الضجة. الكشري مضبوط، بس السعر أعلى من المتوقع مقارنة بطلبات تانية في المنطقة. مناسب لعشاق الكشري الكلاسيكي النضيف.

أرقام التوصيل: 01008215455 – 35717359 – 35730543

الإمبراطور

لو أنت في السيدة زينب أو قصر العيني، الإمبراطور هيكون اختيار متوسط بس مضمون. المحل كبير، الخدمة لطيفة، والموقع ممتاز، خصوصًا لو نفسك في كشري على السريع بعد زيارة السيدة.

العنوان: 329 شارع بورسعيد – السيدة زينب.

الرقم: 23963634

هند

في إمبابة، كشري هند هو النجم الشعبي. المكان دايمًا زحمة، بس الخدمة سريعة والطعم حلو وسعره معقول. عنده فرعين: واحد في شارع المدينة المنورة بإمبابة، والتاني في العباسية.

رقم فرع العباسية: 01127603064

أبو طارق

الاسم الأشهر في عالم الكشري، بس التجربة بقت تعتمد أكتر على السمعة مش الطعم. الكشري حلو بس الكمية قليلة والسعر عالي. مناسب للسياح وللي بيجرب كشري لأول مرة.

العنوان: 16 شارع معروف – وسط البلد.

الرقم: 0225775935

الزعيم كوبري القبة

طبق كشري محترم وشطة ودقة مظبوطين. المكان نظيف والخدمة كويسة، وكمان عنده أم علي ورز بلبن تحفة بعد الأكل.

العنوان: 10 شارع الشيخ حسونة – حدائق القبة.

الرقم: 01096255755

الرحماني شبرا

كشري مظبوط وطعم أصلي يخليك ترجعله تاني. الدقة مظبوطة، والشطة تمام، والمكان مبهج.

العنوان: شارع شبرا الرئيسي بجوار استديو موريس.

الرقم: 01205837746

توم آند بصل

سلسلة محلات عارفة تعمل كشري نظيف وكميات محترمة. الدقة محتاجة شوية دلع، لكن الخدمة والنظافة ممتازة.

الفروع: المهندسين – الرحاب – شبرا – مصر الجديدة – وسط البلد.

الرقم المختصر: 16405

سيد حنفي

لسة من أحسن محلات الكشري، رغم إن مستواه نزل شوية. الطعم ثابت، والابتكار في الخدمة واضح، لكن الكميات أقل من الأول.

الرقم المختصر: 16920

الخديوي شبرا الخيمة

تجربة كاملة بمعنى الكلمة. كشري أصيل وطعم متوازن يخليك تاكل وتقوم مبسوط. من أكتر الأماكن اللي بتحافظ على مستواها بقالها سنين.

الموقع: منطقة المؤسسة – شبرا الخيمة

وأخيرًا..

لو بتدور على أحسن كشري في القاهرة سنة 2025، فالقائمة دي هي دليلك لتجربة مصرية أصيلة. كل محل له طابع خاص، لكن اللي يجمعهم هو إنهم بيقدموا طبق بيحكي حكاية مصر في كل لقمة. وافتكر دايمًا إن الكشري مش بس أكلة… ده مزاج.