The Definitive Guide to Living in the Capital , Cairo , Egypt

مين فينا ما بيحبش الأكل الإيطالي؟ ومين فينا ما بيتضايقش لما البيتزا اللي طلبها ولا المكرونة تطلع أي كلام، بس إيه رأيكم بقى، لما يكون المطعم اللي أنت رحته مافيش حاجة بيعملها أقل من مذهلة، وكأنك خدت تذكرة لإيطاليا ورجعت بسرعة. والمكان اللي ما بيعرفش يعمل إلا كل حاجة جميلة ده في "دهب" في سيناء. يعني كمان بتكون قاعد وشايف البحر قدامك.  الـ دورادو – Eldorado من الأماكن القليلة اللي بنحلم نرجع لها تاني تمتعنا بأكلها وتقدروا تتابعوا صفحتهم من على الفسيبوك هنا.

المنيو إيطالي من اللألف للياء، بيتزا بكل أنواعها ومكرونة وكالزون وكل اللي قلبك يحبه من حلو وقهوة وعصائر طازة. المكان مقسوم قسمين قسم على اللسان على البحر وقسم مقفول بزجاج شفاف علشان مايحرمكش من جمال المنظر.

طلبنا بيتزا كابريس  capers بـ 65 جنيه ودي عبارة عن بيتزا بالجرجير والجبنة الموتزاريلا، العجينة كانت رفيعة وطرية والغريب أنهم ماحطوش صلصلة مجرد ترانشات طماطم بس لذيذة جدًا وشهية، التركيبة كلها ما تتوصفش غير بكلمة واحدة "خيال". كمان طلبنا سلاطة ميدتيريان بـ 40 جنيه و5 جنيه جبنة بارميزان زيادة عليها. السلاطة عبارة عن طماطم وخس وجبنة وزيتون بس فعلًا نضارة الخضار ماشفناهاش في أي مكان في القاهرة، السلاطة طعمها مختلف. غير أن عندهم في دهب فلفل ألوان أحمر وأبيض وأخضر وأسود بتطحنه طازة وتحطه على الأكل، وزيت زيتون فيه فلفل حار تشيلي مخلي طعم الزيت تحفة خاص لما تحطوه مع "الخل البلسمك". ماقدرناش نقاوم ما نجربش الحلو، فجربنا بيناكوتا بـ 40 جنيه. ودي كانت ملكة الحلويات عندهم غير التراميسو اللي تحفة برضه، البيناكوتا مش أي حد بيعرف يظبتها، فيه اللي بيعملها زي الجيلي واللي بيعملها زي الشوربة بس أنها تكون بقوام مضبوط وطعم مثالي مع صوص التوت اللي مافيش في جماله، لأنهم عاملينه بنفسهم طازة، تحسوا أن الأكل جاي من الجنة يا جماعة!

كمان جربنا اللاتيه ماكياتو بـ 25 جنيه وإكسبرسو بـ 25 جنيه، ودي بقى أجمل ما في الحكاية والرواية، القهوة مش طبيعية في جمالها، خاصة أنهم بيستخدموا لبن فوم، مش لبن عادي، فالجمال والحاوة ما بينتهوش، إحنا خلصنا أكل في ساعة مثلا وقاعدين حوالي ساعتين كاملين بنستمتع بالحلو والقهوة بس. أما التيراميسو بقى يا جماعة واللي كنا جربناه في زيارة تانية وبرضه طعمها حكاية وبـ 40 جنيه. ده كاس كبير فيه من تحت قطع كيك متغرقة في الإكسبرسو مع طبقة الكريمة المخفوقة بالجبنة ورشة شكوكولاتة من فوق، واستمتع بأجمل سيمفونية في بطنك ولسانك. الحقيقة كنا نتمنى مدة إقامتنا في دهب تستمر أكثر من كده علشان نجرب المنيو بتاعهم كله. بس ما باليد حيلة كان لازم نرجع القاهرة للأسف.