The Definitive Guide to Living in the Capital , Cairo , Egypt

المحشي من الأكلات المصرية الأصيلة اللي ليها مكانة خاصة في قلوبنا، وكل واحد فينا بيحب نوع معين حسب ذوقه واستطعامه. ومن كتر ما المحشي محبوب، مش بس عند المصريين والعرب، بقى كمان أي أوروبي يجي مصر ويدوقه بيقع في غرامه! عشان كده، أول ما سمعنا عن زاد للمحاشي قررنا نروح نجربه ونشارككم تجربتنا بكل التفاصيل.

المكان صغير جدًا، فيه ترابيزتين بس يكفوا حوالي 8 أفراد. الديكور بسيط وكلاسيكي من غير أي لمسات مميزة، لكن المطبخ مفتوح قدامك تقدر تشوفه. بصراحة، إحنا شايفين إن المكان مش أنسب حاجة للقعدة، لكنه مثالي للتيك أواي أو الدليفري، خصوصًا إن أغلب إعلاناتهم والريفيوز اللي على صفحتهم معتمدة على الدليفري، وهما بيوصلوا في القاهرة والجيزة.

الأكل:

البداية كانت مع المقبلات. جربنا:

سمبوسة لحمة (3 قطع بـ170 جنيه): طعمها لطيف، لكن العجين كان واضح شوية ومحتاج يتظبط أكتر.

كبه سوري لحمة (3 قطع بـ180 جنيه): عجبتنا، وكانت متبلة كويس.

لكن خدوا بالكم، لاحظنا إن السمبوسة والكبه طعمهم ماكنش مميز وهما سخنين، لكن لما بردوا الطعم كان أحلى وواضح أكتر. وكمان الاتنين كانوا شاربين زيت زيادة، ودي نقطة لازم إدارة المكان تحلها لأننا بنحب الأكل بنكهته مش بالزيت، وأكيد فيه ناس كتير زيّنا.

المحشي:

دخلنا على الأساس: طلبنا طبق مكس فيه ورق عنب مع ملفوف (كرنب) بـ270 جنيه. المحشي بيتقدم بارد ومتبّل بدبس الرمان، وده كان عاجبنا جدًا، بس طبعًا فيه ناس بتحب المحشي سخن، وكل واحد وذوقه. ورق العنب كان ممتاز سواء في التتبيلة أو التسوية أو السمك، أما الملفوف كانت تتبيلته كويسة، لكن كان تقيل شوية في أكله وتسويته محتاجة تتحسن.

الخلاصة:

تجربتنا كانت مقبولة بشكل عام، و”زاد للمحاشي” عنده كمان محشي بصل وكوسة وبطاطس، ومنيو مناسب جدًا للعزومات والتجمعات العائلية أو مع الأصحاب. لو ناوي تطلب محشي جاهز للبيت، ممكن يكون اختيار مناسب ليك.

تقدروا تعرفوا أكثر عنهم من خلال صفحة الفيسبوك من هنا.