Mohamed Talaat
لو مامتك قالت لك أوعى تاكل من عربيات الكبدة والسجق اسمع كلامها، إلا لو هتاكل من عند “عز المنوفي”. لازم تاكل من عنده وكمان تاخد معاك تيك أواي وتدوقها. وإحنا في كايرو 360 قررنا إننا ننقل لكم تجربتنا عند أشهر عربية كبدة وسجق في الوطن العربي. عز المنوفي عبارة عن عربية كبدة وسجق بسيطة تحت كوبري الدقي، تقاطع شارع الدقي مع إيران.
هتلاقي تحت كوبري الدقي، في أحد الشوارع الجانبية “فاترينة”، حواليها عشرات من العاشقين للكبدة والسجق. عربية “عز المنوفي” اللي موجودة في مكانها من سنة 1976. أسسها والد أيمن المسئول عن العربية دلوقتي، واللي اتشهرت باسمه. وكل اللي عنده “كبدة – سجق – طماطم – مخلل”.
نبدأ إننا دوقنا الطماطم المخلوطة ببهارات عبارة عن كمون وفلفل وثوم وملح. ودي فعلًا تخلينا نقول “أدي العيش لخبازه”. وممكن تخليك تاكل 10 أرغفة بدون ما تحس، لأنها بتفتح الشهية بشكل غريب.
أما رغيف الكبدة أو السجق، فمش هنعرف نقول حاجة فيهم، بس نحب نعرفك أن طعم زمان وريحة الأكل وشكل الطاسات والجريل اللي بيتسوى عليهم هيبهرك. ونيجي بقى للتتبيلة اللي أكيد هي سر نجاح عربية “عز المنوفي”. على مدار 42 سنة عدت وهو ثابت في مكانه. وفيها “طماطم – بهارات مختلفة مميزة في الطعم منها الكمون والفلفل – ثوم وبصل مبشور – شربات أحمر”. بخلاف سر الطبخة اللي بيحتفظ بيه لنفسه”.
تصوير: إيجبشن فوديز
إحنا جربنا من كل نوع موجود رغيف، علشان نقول لكم رأينا فيه، وكان سعر الرغيف 7.5 جنيه. واتفاجئنا إننا أكلنا 4 من كل نوع، خاصة إنك بتطلب طلبك وبتاخد طماطم زي ما أنت عاوز ببلاش. وهو عنده ثقة في كل الناس، لأنك بتاكل وبعدين تدفع اللي تقول عليه. ولما سألناه طيب الطماطم ببلاش دي خدمة وتسويق ليك. إنما لو إحنا أكلنا ونسينا كام وحاسبنا أقل، أو حتى مشينا وسط الزحمة هيكون إيه موقفك؟ قال “لو أي حد مش معاه فلوس يجي كل يوم ياكل ويمشي، ومافيش حد هيسأله أكلت إيه. لأن الرزق ده بتاع ربنا، وإحنا بنتاجر معاه قبل البشر”.
تصوير: إيجبشن فوديز
وإحنا واقفين عند العربية وبناكل، جه مجموعة إخوة “عرب”، وطلبوا طلباتهم وقالوا له أنهم من طرف “إبراهيم بهزارد”. وده ناشط ومدون إماراتي كان مؤسس حملة “ادعم_سياحة_ مصر” على تويتر. واللي نجحت أنها تجذب السياح العرب لزيارة مصر، خلال الفترة من 2013 حتى 2017 بأعداد كبيرة. وبعد ما الناس أكلت وطلبت تيك أواي، رفض أيمن المنوفي أنه يحاسبهم وقالهم ده واجب ضيافة مصر لكم. وكمان أنتم جايين من عند الغالي “بهزارد”، وطلب منهم الدعاء لهم عند الحرم لما يرجعوا السعودية.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
