The Definitive Guide to Living in the Capital , Cairo , Egypt

كان لنا تجربة من أكثر من سنة في «لوسيلز – Lucille’s» الموجود في شارع 9 في المعادي
أمام «فيلا 55» لكن كانت فى الفطار الصبح، وده لأنه من الأماكن القليلة المميزة بـ
تقديم وجبات الفطار طول اليوم فيها البوريتو المكسيكي والعيش الفرنسي والبطاطس
والبرجر البيتي اللذيذ وأنواع كثير من التارت والكوكيز. لكن زيارتنا المرة دي كانت
بهدف اكتشاف عالم الـ Tex-Mex
أو أكلات ولاية تكساس الأمريكية والمطبخ المكسيكي الحريف.

المكان من الداخل مساحته مش كبيرة لكن مريح وهادئ، وواخد
تصميم الـ Diners
الأمريكية بالترابيزات اللي وراء بعضها كأنك قاعد في عربية قطار. وكل الديكورات
على الحوائط والعواميد عبارة عن رسومات وبوسترات رعاة بقر ونباتات الصبار وأحذية
تكساس المميزة، وموسيقى الكانتري مسموعة طول ما أنت في المكان لكن بصوت منخفض،
وأبواب البار مستخدمة علشان تكمل الطابع العام للمكان.

البرجر هناك عالمي، أحجام كبيرة وطعم اللحم البقري غني
وفريش وعليه إضافات البصل المحمر والخس وشرائح اللحم البقري والصوص. فيه برجر
بالأحجام العادية بأسعار من 19 لـ 25 جنيه، وممكن تخليها كومبو بمشروب وبطاطس
بإضافة 11 جنيه. وفيه برجر بأحجام خاصة بالمطعم وبـ يُقدم معاها بطاطس ودي أسعارها
من 30 لـ 55 جنيه حسب الإضافات. جربنا المشروم برجر والبيكون تشيز برجر بصوص
الباربيكيو (Bacon Cheese Burger)
مع دريسنج مسطردة العسل والبلو تشيز الوهميين، مش هـ نتكلم كثير عن قد إيه البرجر
كان لذيذ ومكوناته فريش، الملحوظة الوحيدة أن العيش كان واضح أنه لسه متسخن في
الميكروويف مش مخبوز طازج زي ما المفروض يكون. فيه كمان برجر من غير عيش (Bunless) للناس اللي بـ تعمل دايت، وفيه
برجر عملاق (Colossus)
للناس الأكيلة.

المنيو مليان أكلات مكسيكية، تاكو وبوريتو وفاهيتا وورابس
اللحوم والدجاج. اختارنا الإنشيلادس Enchiladas
أو لفائف عيش التورتيا الضخمة المحشوة باللحوم أو الدجاج والخضروات بصوص الفلفل
الحار وبـ يُقدم معاه أرز بالبهارات وصوص الكريمة الي بـ يتحط على اللفائف وصلصة
الطماطم الحارة، وبـ ينزل معاه كمان رقائق الذرة المخبوزة (Mexican Chips) اللي بـ تتغطس في صوص الطماطم.
الطبق كان سعره 56 جنيه، وننصحك بمشروب معاه، وهناك ممكن تملأ المج بتاعك أكثر من
مرة (Refill) بسعر 10 جنيه، وحلقات البصل (25
جنيه) مهمة جدًا جنب الأكل ده وبـ يعملوها هناك حلوة قوي وطعمها بيتي هي كمان.

فيه شوربات اليوم، وكان على حظنا في يوم الزيارة الموجود
شوربة طماطم، ممكن تطلبها في مج أو في طبق كبير بأسعار 12 أو 19 جنيه، لكن كان
نفسنا في حاجة ثانية غير الطماطم فما طلبناش، والمنيو فيه أنواع كثير من السلاطات
زي السيزر والسلاطة اليونانية وسلاطة الدجاج المحمر بأسعار من 15 لـ 30 جنيه، وفيه
مجموعة من المشهيات زي الناتشو وصوابع الموتزاريلا التشيكن ستريبس بأسعار من 25 لـ
35 جنيه.

الموضوع مش شكل وستايل للمكان فقط، الأكل بجد حلو
والكميات مشبعة، والتخصص موجود، يعني تدخل «لوسيلز» وأنت مطمئن، هـ تستمتع بالفطار
أو الغذاء وحتى بالحلويات. لو كنت في المعادي ونفسك في أكلة جامدة وحريفة، توجه
لشارع 9 وخذ مكانك على ترابيزة «لوسيلز».