Cairo 360
لو ناوي تزور المتحف المصري بالتحرير سنة 2026، فالأكيد إن أول سؤال هييجي في بالك هو سعر التذكرة. وزارة السياحة والآثار أعلنت عن منظومة جديدة لأسعار دخول المتاحف والمواقع الأثرية، والمتحف المصري بالتحرير كان في قلب التحديث ده. في السطور الجاية هنقولك أسعار التذاكر الجديدة للمصريين والأجانب، ونفكرك ليه المتحف ده لسه واحد من أهم المزارات الثقافية في القاهرة والعالم.
ضمن خطة شاملة لتطوير منظومة أسعار التذاكر بالمواقع الأثرية والمتاحف، تقرر تغيير سعر تذكرة الدخول إلى المتحف المصري بالتحرير بداية من يوم الخميس 1 يناير 2026. القرار بييجي في إطار تحسين تجربة الزائر، سواء المصري أو الأجنبي، مع الحفاظ على القيمة التاريخية والثقافية للمكان.
إدارة المتحف أعلنت إن الأسعار الجديدة هتكون كالتالي:
سعر تذكرة المتحف المصري بالتحرير 2026
بالنسبة للزائر المصري، سعر التذكرة هيبقى 30 جنيه، بينما الطلبة المصريين يدخلوا بـ 10 جنيهات بس.
أما الزائر غير المصري، فسعر التذكرة 550 جنيه، والطالب غير المصري 275 جنيه.
الإدارة أكدت إن المتحف جاهز لاستقبال الزوار من كل أنحاء العالم وفق المنظومة الجديدة، مع تقديم تجربة ثقافية وتعليمية مميزة وسط كنوز الحضارة المصرية القديمة اللي بيحتضنها المتحف.
المتحف المصري بالتحرير مش مجرد مبنى أثري، لكنه مساحة حية بتتجدد باستمرار. الفترة الأخيرة شهدت تنظيم معارض مميزة، من بينها معرض من البردي الأخضر إلى الفن الخالد، وكمان معرض صور عن مقبرة الملكة نفرتاري، بالإضافة لعرض قطع أثرية نادرة بتخطف العين، زي قناع ذهبي لمومياء من مقتنيات المتحف.
تاريخ المتحف المصري بالتحرير
حجر أساس المتحف المصري بالتحرير اتحط في القرن الـ19، وافتتح رسميًا يوم 15 نوفمبر 1902 بحضور الخديوي عباس حلمي الثاني. المتحف بيتصنف كأقدم متحف أثري في الشرق الأوسط، وبيضم ممراته آلاف القطع الأثرية اللي بترجع لعصور مختلفة من تاريخ مصر القديم.
تصميم المتحف قام بيه المهندس المعماري الفرنسي مارسيل دورغنون، وجاء على الطراز المعماري اليوناني الروماني، بعد مسابقة عالمية اتعملت سنة 1895. التصميم ده خلا المتحف أيقونة معمارية ومزار سياحي أساسي لكل زوار القاهرة.
أهم مقتنيات المتحف
رغم انتقال قناع الملك توت عنخ آمون الشهير للمتحف المصري الكبير، إلا إن المتحف المصري بالتحرير لسه بيضم مجموعة ضخمة من القطع الفريدة، منها آثار المجموعة الجنائزية ليويا وتويا، ولوحة نارمر الشهيرة، وتماثيل مميزة لملوك وملكات قدماء المصريين، واللي بتخلي الزيارة دايمًا تجربة مختلفة وغنية.
مقترح
معالم وسياحة
أسعار تذاكر المتحف المصري بالتحرير 2026.. كل اللي محتاج تعرفه قبل الزيارة
آثار القاهرة +5
فن وثقافة
