The Definitive Guide to Living in the Capital , Cairo , Egypt

الصورة الرئيسية: Janosch Diggelmann on Unsplash

حديقة الحيوان بالجيزة طول عمرها بالنسبة للمصريين مش مجرد مكان فسحة، دي جزء من ذاكرة أجيال كاملة. من أول الرحلات المدرسية، لحد خروجات الأعياد، الحديقة دي دايمًا كانت حاضرة في حياة المصريين. النهارده الذكريات دي هترجع بشكل جديد، مع مشروع تطوير اللي بيعتبر الأكبر في تاريخها، واللي منتوقع يخليها واحدة من أهم الوجهات الترفيهية والبيئية في قلب القاهرة. ومع زيادة الكلام عن موعد افتتاح حديقة الحيوان بالجيزة 2026، وسؤال الناس هل هتفتح في عيد الفطر ولا لأ، بنرتب لك الصورة كاملة وبالمعلومات الرسمية.

تطوير حديقة الحيوان بالجيزة 2026

مشروع تطوير حديقة الحيوان بالجيزة جاي برؤية مختلفة، تحافظ على روح المكان وتاريخُه، وفي نفس الوقت تواكب المعايير العالمية لحدائق الحيوان المفتوحة. الفكرة الأساسية إن الحيوان يعيش في بيئة أقرب للطبيعة، والزائر يحس إنه داخل تجربة مش مجرد ممرات وأقفاص.

التطوير بيشمل إعادة تصميم بيوت الحيوانات، وتوسيع المساحات، وتحديث الممرات، مع تحسين الخدمات والبنية التحتية بالكامل، من غير ما يضيع الطابع التراثي اللي بيميز الحديقة.

وواحدة من أهم ملامح التطوير هي ربط حديقة الحيوان بحديقة الأورمان، علشان الاتنين يبقوا مع بعض أكبر مساحة خضراء ومتنفس طبيعي في القاهرة الكبرى. الربط هيتم من خلال نفق أو ممر سياحي حديث، يسمح للزوار يتحركوا بسهولة بين الحديقتين في تجربة واحدة متكاملة.

وفي قلب الخطة، الدولة حريصة على الحفاظ على المعالم التاريخية داخل الحديقة، واللي من أهمها: كوبري إيفل، والقاعة اليابانية، والقاعة الملكية، وجزيرة الشاي، والجبلاية، والمتحف الحيواني.

المعالم دي هتفضل موجودة، لكن بشكل مطوّر يحافظ عليها ويبرز قيمتها التاريخية والمعمارية.

ما يفوتكش كمان: رجعت لهم الحياة!.. 3 حدائق في القاهرة يستحقوا الزيارة بعد تطويرهم

موعد افتتاح حديقة الحيوان بالجيزة 2026

مع اقتراب انتهاء أعمال التطوير، انتشرت شائعات كتير عن افتتاح حديقة الحيوان في عيد الفطر 2026. لكن رسميًا، أحمد إبراهيم مستشار وزير الزراعة حسم الجدل وأكد في تصريح خاص لموقع كايرو360 إن الكلام ده غير صحيح.

الافتتاح مش هيكون في عيد الفطر، والموعد الأقرب والرسمي هو خلال النصف الثاني من عام 2026، وده حسب الجدول الزمني اللي أعلنته الشركة المسؤولة عن التطوير.

كمان الافتتاح مرتبط باعتماد الاتحاد الإفريقي لحدائق الحيوان، اللي بيتابع المشروع خطوة بخطوة، وبيتأكد إن كل حاجة جاهزة، من بيئات الحيوانات، للخدمات، لتجربة الزيارة نفسها، علشان التشغيل يكون آمن ومستدام.

تطوير بمعايير عالمية

الشركة المنفذة أكدت إن التطوير تم بالتعاون مع استشاريين وخبراء دوليين في رعاية الحيوانات وتصميم الحدائق المفتوحة. الهدف إن حديقة الحيوان بالجيزة ترجع للخريطة العالمية، مش بس كأقدم حديقة، لكن كنموذج حديث يحترم الحيوان والإنسان والمكان.

حديقة الحيوان بالجيزة مساحتها حوالي 112 فدان، وبتضم أكتر من 3 آلاف شجرة تاريخية ونباتات نادرة، بالإضافة لـ186 فصيل من الثدييات والطيور والزواحف. اتأسست في عهد الخديو إسماعيل، وبتُصنف كثالث أقدم حديقة حيوان في العالم، وأكبر حديقة حيوان داخل مدينة.

أعمال التطوير بدأت رسميًا في 9 يوليو 2023، ومن ساعتها المشروع شغال علشان يرجّع الحديقة لمكانتها، من غير ما يخسرها روحها اللي اتربت في وجدان الناس.