The Definitive Guide to Living in the Capital , Cairo , Egypt

مصدر الصور: الهيئة العامة للاستعلامات

لو نفسك تشوف تاريخ العمارة المصرية القديمة عن قرب، وتفهم إزاي بدأت فكرة الهياكل الحجرية الضخمة، يبقى لازم تزور متحف ايمحتب في منطقة سقارة. المكان معمول تكريمًا للمعماري العبقري ايمحتب، أول واحد في تاريخ مصر يستخدم الحجر في بناء هرم كامل. المتحف اتبنى سنة 1997، وبيضم 286 قطعة أثرية نادرة من حفائر سقارة.. وكل قاعة فيه بتحكيلك جزء من قصة مصر القديمة بطريقة شيقة وسهلة.

المتحف مقسم لـ6 قاعات، وكل واحدة ليها شخصية مختلفة وتفاصيلها اللي بتشدك من أول ما تدخل.

قاعة المدخل

هنا هتلاقي تمثال الملك زوسر مكتوب عليه اسم ايمحتب وألقابه.. وده شيء نادر جدًا لأن مفيش معماري تاني اتذكر اسمه على تمثال ملك. كمان فيه أربع لوحات جرافيك بتشرح شكل العمارة قبل ايمحتب وبعد ما ظهرت أفكاره.

قاعة بعثات سقارة

القاعات دي بتعرض شغل البعثات المصرية والأجنبية في منطقة سقارة.. وهتشوف اكتشافات مهمة جدًا من حفائر السنين اللي فاتت.

قاعة العمارة

من أهم القاعات في المتحف.. هنا هتلاقي العناصر المعمارية اللي استخدمها ايمحتب في بناء الهرم المدرج للملك زوسر. هتفهم منها عبقرية التصميم وأفكار البناء الجديدة اللي ظهرت وقتها.

ومن أهم المعروضات: تمثال برونزي لإيمحتب، حليق الرأس، ماسك بردية في إيده.

قاعة طرز سقارة

هتشوف فيها روائع فن النحت في سقارة.. تماثيل خشب، وأواني حجرية، وقطع مميزة بتبين براعة الفنان المصري القديم.

قاعة مقابر سقارة

من أبرز القاعات.. فيها نموذج لمقبرة الملك «مري ان رع»، أول مومياء ملكية تم اكتشافها في منطقة سقارة.
كمان هتلاقي واحدة من أهم القطع: لوحة «المجاعة» للملك أوناس اللي بتحكي قصة جيش واجه قبيلة بدوية بتعاني من الجوع، فأمر الملك بإرسال الطعام ليهم.

مكتبة جان فيليب لوير

جزء مهم جدًا في المتحف، مخصص لعالم المصريات الفرنسي جان فيليب لوير اللي قضى 70 سنة في ترميم مجموعة زوسر الهرمية. هتلاقي كاميرته، البوصلة، وصور نادرة لشغله في سقارة.

قاعة التهيئة المرئية

هنا الجولة بتكمل بطريقة عصرية.. نموذج مصغر لهرم زوسر، مع عرض سينمائي صغير بيشرح تطور المنطقة وتاريخها.

أسعار تذاكر ومواعيد زيارة متحف ايمحتب بسقارة 2025

المتحف اتقفل في 2022 للترميم، واتفتح من جديد في ديسمبر 2023 بشكل أحلى وأوضح في العرض المتحفي.

مواعيده من 8 الصبح لـ5 مساءً.

أسعار التذاكر:
30 جنيه للمصريين
450 جنيه للأجانب
وفيه تخفيضات للطلبة.
التذكرة الشاملة بتدخلك منطقة سقارة والمتحف.

وأخيرًا..

لو عاوز تعيش تجربة فيها تاريخ وحضارة ومعلومات مهمة تتشاف بعينك، متحف ايمحتب في سقارة هو المكان المناسب. جولة واحدة هناك هتعرفك مين كان إيمحتب، وليه إبداعه غير شكل العمارة في مصر القديمة.. وهيخليك تبص لمنطقة سقارة بعين مختلفة تمامًا.