The Definitive Guide to Living in the Capital , Cairo , Egypt

لو فاكرين إن سيناء يعني بحر وشرم ودهب بس يبقى فايتكم كتير، علشان النهارده هناخدكم في رحلة مختلفة تماماً، رحلة مش لأي حد، دي للناس اللي بتدوّر على المغامرة، التاريخ، والروحانيات في مكان واحد،  بنتكلم عن “سرابيط الخادم”، المكان اللي بيحكي حكاية عمرها 8000 سنة، لما كان أجدادنا المصريين القدماء بينحتوا الصخر عشان يطلعوا الفيروز، وسابوا لنا وراهم معبد وتاريخ بيخطف الأنفاس، وخلال السطور اللي جاية هنعرف مع بعض إيه الحكاية وليه المكان ده لازم يكون وجهتكم الجاية لو بتدوروا على تجربة سياحية “خام” وحقيقية.

أين تقع “سرابيط الخادم”؟

عشان توصل لسرابيط الخادم “الكنز المجهول” لازم تكون عارف إحداثياتك كويس، ومنطقة “سرابيط الخادم” موجودة في جنوب سيناء، وتحديداً على هضبة صغيرة شمال مدينة الطور التابعة لمحافظة جنوب سيناء، وبتقع المنطقة تقريباً في منتصف الطريق أسفل الساحل الغربي، وتبعد حوالي 40 كيلومتر شرق مدينة أبو زنيمة، على بعد حوالي 10 أميال من “وادي المغارة”.

المكان مش سهل الوصول ليه، وده جزء من سحره، الطريق صعب ومحتاج عربيات دفع رباعي وروح مغامرة، لأن المعبد على هضبة من الحجر الرملي ارتفاعها حوالي 1200 متر فوق سطح البحر، وده بيخلي المنظر من فوق “حكاية تانية خالص”.

سبب تسميتها “سرابيط الخادم”؟

الاسم غريب شوية، بس وراه تفسير منطقي جداً وفقاً لعلماء الآثار، سرابيط: جمع “سربوت”، ودي كلمة عند أهل سيناء بتعني الصخرة الكبيرة القائمة لوحدها (النصب التذكاري)، الخادم: عشان الأعمدة الموجودة في المعبد بتشبه الخدم بملامحهم السمراء.

حكاية “أرض الفيروز” ومعبد حتحور

المكان ده مش مجرد جبل ده كان “مجمّع تعدين” عالمي من آلاف السنين، والقصة بدأت لما المستوطنين الأوائل اكتشفوا رواسب النحاس والفيروز، وبحلول عام 3500 قبل الميلاد، وصلوا للعروق الفيروزية العظيمة هناك، وعشان كده المصريين القدماء بنوا هنا معبد حتحور (سيدة الفيروز)، المعبد الوحيد من نوعه وتاريخه يرجع للدولة الوسطى والحديثة.

مين بنى المعبد؟

البداية كانت مع سنفرو من (الأسرة الرابعة)، وبعده ملوك كتير زي منتوحتب الثالث والرابع، وسيزوستريس الأول، وصولاً لملوك الدولة الحديثة زي حتشبسوت، تحتمس الثالث، ورمسيس الثاني والسادس، ومن أهم المعلومات عن المنطقة الخاصة بالمعبد أنها شهدت ميلاد “الأبجدية السينائية”، اللي بيعتبرها العلماء أصل الأبجديات، نتيجة تلاقي المصريين بالعمال الآسيويين (الساميين) اللي اشتغلوا في المناجم.

تجربة سياحية بنكهة بدوية

الجميل في سرابيط الخادم إنها مش سياحة تقليدية، دي سياحة بيئية بتعيشك “حياة البدو” بتفاصيلها. وفي تصريحات صحفية سابقة، أكد أهالي المنطقة والقائمين على السياحة هناك إن التجربة دي بتغير الروح.

إيه الموجود في سرابيط الخادم؟

• المخيمات البيئية: هتلقوا هناك مخيمات في قلب الطبيعة، كل غرفة فيها شايلة اسم من تراث سيناء زي “وادي مكتب” أو “جبل حزبر”، عشان تعيش الجو الحقيقي مع أكل بدوي وشغل يدوي أصلي.
• الطاقة الإيجابية: تم تصمم واجهة مخيمه بصخور سيناء وزودوا الغرف بملح صخري عشان يدي “طاقة إيجابية” للزوار، ده غير “الرحى” البدوية اللي بتخليك تشوف بعينك إزاي بيطحنوا الحبوب وبيعيشوا يومهم.
• حكايات الليالي القمرية: الرحلة متبقاش كاملة من غير فقرة “الحكّاء”، واللي بيرأسها صالح عيد سليمان – (70 سنة) من قبيلة العليقات، واللي بيرافق السياح ويعرفهم الطرق من النجوم، ويحكي لهم عن مواسم الوسوم وتاريخ الأجداد، في تجربة بيوصفها السياح بإنها بحث عن “البادية المفقودة”.

إيه اللي هتشوفه جوه المعبد والمناطق المحيطة؟

لو قررتوا تطلعوا الهضبة جهزوا نفسكم لشويه معالم أثرية مبهرة، هيكل المعبد اللي بيصل طوله لـ80 متر، وعرضه 35 متر، وواخد شكل حرف (L)، ده غير المغارات المقدسة، زي “مغارة الإلهة حتحور” (من عهد سنفرو) وكهف “سوبدو” (إله الحرب)، وكمان النقوش اللي تقدر بـ378 نقش أثري بيحكوا قصص البعثات التعدينية، ومن ضمن المعالم اللي هتشوفوها بقايا بيوت العمال اللي عاشوا هناك من آلاف السنين، ومنها الدائرية والمربعة.

مش بس المعبد كمان المنطقة حواليكم مليانة كنوز زي وادي الغرندل، وهو عبارة عن واحات وطيور برية ومياه عذبة، وروض العير، وده الطريق القديم للمعبد ومليان نقوش ورسومات صخرية، ومناجم أم بجمة المشهورة بالمنجنيز.

ايه أفضل وقت للزيارة؟

عشان تستمتعوا بجد بما إن المكان على ارتفاع 1200 متر وفي قلب الصحراء، فالمعادلة بسيطة: ابعد عن ” الحر” و” البرد”، والتوقيت المثالي للزيارة في الخريف “نهاية سبتمبر حتى آخر نوفمبر”، لأن الجو بيكون تحفة، نسمة هوا حلوة والسماء صافية، وفي الربيع شهري “مارس – مايو”، وزي ما احنا عارفين الدنيا ربيع والجو بديع، وده وقت مثالي للتصوير والمشي.

وممكن كمان الزيارة تكون مناسبة في الشتاء من ديسمبر حتى فبراير،: الصبح الشمس جميلة، لكن بالليل برد قارس (بتوصل لتحت الصفر أحياناً)، لو بتحبوا التخييم في البرد وتوليع النار، ده الوقت المناسبظ، بس اعملوا حسابكم في لبس تقيل جداً.

أما في الصيف فبداية من يونيو وحتى أول أغسطس، رغم الحر الشديد فهو جو مناسب في الخروج بدري “الفجر” وتنزلوا قبل الظهر.

إزاي تروحوا سرابيط الخادم؟

بننصح تريحوا دماغكم وتشوفوا منظم رحلات موثوق يخلص لكم كل التصاريح ويوفر المواصلات للطرق الوعرة وتكونوا جروب بيحب سياحة المغامرة سواء مع بعض أو تتعرفوا على بعض هناك، المنظم بيظبط كل حاجة من بداية الرحلة لنهايتها، وممكن تلقوهم من خلال البحث العميق ورؤية الريفيوهات وسؤال آخرين قاموا بالرحلة دي قبل كده.

وفيه مجتمعات مشهورة زي Sinai Trail (درب سيناء) أحياناً بينظموا مسارات بتعدي من هناك، وجروبات تانية زي Dune Raider أو Stamp Your Passport لازم تتابع صفحاتهم لأن الرحلات موسمية.

أما لو عاوزين رحلة مستقلة وحابين تروحوا بنفسكم فأول حاجة لازم تعرفوها أن سيارات الدفع الرباعي محتاجة تصريح لدخول سيناء، ولو هتتحركوا من القاهرة فأنتوا هتاخدوا طريق سيناء عن طريق نفق الشهيد أحمد حمدي وهتتجهوا لمدينة أبو زنيمة وهي بعد رأس سدر بـ80 كيلو، ومن أبو زنيمة هتاخدوا “مدق” بيدخل للجبل حوالي 40 كيلو وبعدها توصلوا لمنطقة سرابيط الخادم.

السفر من خلال المواصلات العامة صعب جدًا، ولكن تقدروا تاخدوا أتوبيس من شركات النقل المتجهة للطور أو شرم الشيخ وأشهرهم “شرق الدلتا – Go bus” وتنزلوا في أبو زنيمة، ومتنسوش متخلوش شنط تحت في مكان التخزين علشان ممنوع على السائق الوقوف وتنزيل ركاب، وبما أن مفيش مواصلات مباشرة للجبل لازم تكونوا متفقين مع واحد من البدو بيجيلكم بعربية يوصلكم للمنطقة.

وفيه شوية تعليمات مهمة لازم تاخدوها في الحسبان، اولهم ممنوع حد يطلع الجبل لوحده أمنيًا، وكمان علشان ممكن تتوهوا فلازم دليل بدوي.

نصائح كايرو 360

سرابيط الخادم مش فسحة لحد بيدور على تكييف ورفاهية الفنادق الخمس نجوم، دي رحلة لكل شخص عايز يفصل دماغه عن دوشة المدينة ويرجع للطبيعة ولنفسه، المكان ده هو “منجم الفيروز” الأصلي، ولمسة التاريخ فيه مع سحر الطبيعة بتعمل مزيج مش هتلاقيه في أي مكان تاني في العالم.

والبسوا كوتشي مريح، وخدوا معاك مياه كفاية، ونسقوا مع دليل بدوي من أهل المنطقة (ضروري جداً عشان الطريق)، واستعدوا لرحلة هتحكي عنها لأحفادكم.

وخلوا بالكم شبكة الموبايل هناك ضعيفة جدًا وممكن الموبايل يفصل شبكة نهائي فتعلموا حسابكم وتبقوا على تواصل مع أهلكم أو أصدقائكم في آخر نقطة شكبة وعند عودتكم وتعرفوهم خط السير وتفاصيل الرحلة بمراحلها وموعد عودتكم المتوقع.

أخيرًا لو زرتم سرابيط الخادم قبل كده كلمونا عن تجربتكم والمميزات والعيوب اللي واجهتوها.