The Definitive Guide to Living in the Capital , Cairo , Egypt

اقرأ كمان في سلسلة الهروب من القاهرة على كايرو 360:

الهروب الكبير… دليلك للخروج من القاهرة والحياة في مدينة جديدة

قررت تعيش خارج القاهرة؟ دليلك للبحث عن سكن في مدينة جديدة

كتير من الناس فاكرين إن الحياة خارج القاهرة ممكن تبقى فاضية أو مملة أو ناقصها حاجات كتير، وده بيخليهم ميفكروش في إمكانية الإنتقال منها على الرغم من الضغوط والمشاكل الموجودة داخل القاهرة، وحتى لو ظروف حياتهم تسمحلهم بالمعيشة في مدينة جديدة. لكن الحقيقة هي إنه على الرغم من إنه مفيش مدينة تانية داخل مصر هتقدملك كل اللي موجود في القاهرة، إلا إن حياتك خارج القاهرة ممكن جداً تكون أغنى وأجمل بالتجارب والأنشطة المختلفة الموجودة في المدن التانية وخاصة المدن الساحلية. 

لو بتفكر إنك تعيش فترة خارج القاهرة، ونفسك تنقل حياتك على البحر، بس متردد لأنك خايف حياتك في المكان الجديد تبقى مملة ومتعرفش تقضي وقتك بشكل ممتع ومفيد، إحنا بنقولك متخافش من النقطة دي وبنشجعك على خوض التجربة. وعشان نساعدك بشكل عملي، إحنا هنتكلم في المقال ده عن شكل الحياة في مدينة ساحلية، وهنقولك شوية نصائح لاستغلال وقتك بشكل كويس يخلي حياتك في المدينة الجديدة غنية وممتعة. 

أول حاجة محتاج تعرفها عن حياتك خارج القاهرة هي إنه هيكون عندك وقت فراغ أكتر من اللي إنت متعود عليه. جوه القاهرة فيه ساعات وساعات من يومنا بتضيع في زحمة الشوارع وانتظار المواصلات والوقوف في طوابير ملهاش نهاية. كل الحاجات دي تقريبًا مش موجودة في معظم المدن التانية، ولو موجودة بتبقى بشكل أقل كتير من القاهرة. تخيل يومك بدون كل الحاجات اللي بتضيع الوقت وعدد الساعات اللي هتوفرها وهتقدر تختار تقضيها إزاي، بدل ما تكون مجرد وقت ضايع. بس بما إننا مش متعودين على وجود وقت زيادة، ممكن يكون صعب في البداية إنك تعرف تستغل الوقت ده صح وممكن يكون سبب للملل بالنسبالك. ونصيحتنا ليك عشان ده ميحصلش إنك ترتب وقتك وتخلي في حاجات معينة بتعملها في يومك بدل ما تسيب الوقت يعدي وخلاص. وكمان إنك تجرب أنشطة جديدة ومختلفة عن اللي كنت بتعملها قبل كدة عشان تملي وقتك وتستمتع أكتر.

أبسط نشاط ممكن تقضي فيه وقتك، خصوصاً في أول فترة من انتقالك لمدينة جديدة هو استكشاف المدينة نفسها. اللف والتمشية في الشوارع المختلفة والتعرف على أماكن جديدة شيء ظريف وممتع. ده غير إنه هيخليك تتعرف على المدينة وأماكن الحاجات اللي محتاجها والأنشطة المختلفة اللي ممكن تمارسها. حاول تخصص وقت كل يوم أو كل أسبوع للتمشية في منطقة جديدة وحدد الأماكن اللي عايز تزورها زي المطاعم أو المحلات، وكمان حاول تلاحظ و تسجل عناوين الأماكن اللي بتقدم أنشطة مختلفة زي الجيم والنوادي والمراكز الفنية.

تجربة المطاعم  الجديدة جزء ظريف جداً من مرحلة الاستكشاف. ومع إن المطاعم الموجودة في مدينة أصغر ممكن تكون أقل تنوعاً من القاهرة، لكن أكيد هتلاقي اختيارات مختلفة لأن أغلب المدن الساحلية سياحية. ونصيحة مننا حاول تجرب المطاعم اللي تابعة للفنادق لأنها غالباً بتكون جودتها أعلى في الأكل نفسه ومستوى الخدمة، وكمان معظم الفنادق بيكون فيها مطاعم بتقدم أكلات من المطابخ العالمية زي الهندي والصيني واللبناني. ولو بتفكر إنه صعب تدخل الفنادق بسهولة عشان تجرب المطاعم بتاعتها أو إن المطاعم دي هتكون أغلى، ده مش حقيقي. فنادق كتير بتعمل مداخل منفصلة للمطاعم من بره الفندق ولو مش كدة تقدر تجيب رقم الفندق بسهولة من الإنترنت وتتصل تحجز في أي مطعم داخلي فيه. أما بالنسبة للأسعار فغالباً بتكون زي أي مطعم حلو وساعات كمان بتكون أسعارهم أقل من مطاعم كتير في نفس المستوى.   

والانتقال لمدينة جديدة كمان فرصة هايلة لأنك تبدأ ممارسة أنشطة جديدة. مثلاً لو انت عمرك ما كنت بتلعب رياضة بانتظام تقدر تستغل الوقت الفاضي عندك في نشاط رياضي. ومش شرط إنك تمارس رياضة صعبة أو محتاجة تمرين وإلتزام مرهق، الفكرة بس إنك تختار رياضة ممتعة بالنسبالك وتخصصلها وقت في حياتك، حتى لو كانت الرياضة دي تمشية على الكورنيش أو حاجة هادية زي اليوجا أو البيلاتيز. الهواء النضيف والمناظر الطبيعية الجميلة هتشجعك جداً على الحركة وهتقلل كتير من الإرهاق اللي بتحس بيه بعد أي تمرين. تخيل مثلاً إنك تبدأ يومك بساعة تمشية على البحر أو تنهي النهار بجولة على العجلة، وفكر في الفرق اللي ده هيعمله في حالتك النفسية وطبعاً في صحتك.

الأنشطة والرياضات البحرية كمان وسيلة ممتازة للتسلية وللمغامرة. الموضوع مش مجرد رحلة سنوركلنج أو غطس هتروحها مرة أو اتنين وتزهق. لو إنت هتعيش فترة في مكان قريب من البحر تقدر تختار ما بين مجموعة أنشطة متنوعة وتتعلم واحد منها عشان تمارسه بشكل مستمر. تقدر مثلاً تتعلم حاجات زي الكايت سيرفنج و الويك بوردنج أو السكوبا دايفينج لو انت بتحب التحديات والمغامرات. أما لو بتحب الأنشطة الهادية والروقان تقدر تتعلم ركوب الكاياك أو الويند سيرفنج. 

الطبيعة الصحراوية والجبال، خاصة جبال البحر الأحمر اللي موجودة حوالين مدننا الساحلية زي الغردقة وشرم الشيخ هتديك فرصة أكبر للمغامرة والأنشطة الجديدة لأنك هتقدر تطلع سفاري ورحلات تخييم. وكمان لو عايز تجربة قوية جداً، ممكن تطلع مع مجموعات الهايكينج واستكشاف الممرات الجبلية. كل الحاجات دي تقدر تعملها بشكل منتظم وتتعرف من خلالها على ناس جديدة تشاركك في مغامراتك 

ولو أنت من هواة الفنون أو حتى نفسك تجربها، ممكن تدور على مراكز أو أماكن بتدي كورسات ودروس في الفنون زي الرسم والموزاييك والآلات الموسيقية وأنواع الرقص المختلفة. المدن اللي عايش فيها أجانب كتير زي الغردقة مثلاً هتلاقي فيها أماكن متعددة بتهتم بالأنشطة دي ومدرسين مصريين وأجانب هيفيدوك بشكل كبير.

وحتى لو كان عندك شغل والفترة اللي هتقضيها خارج القاهرة مش مجرد أجازة، الوقت اللي هتوفره بعيد عن الزحمة والطاقة اللي هتكون عندك لما تعيش في مكان جديد أهدى وأجمل هيدوك الفرصة إنك تجرب حاجات كتير جديدة. ونصيحتنا ليك هي إنك متكتفيش بحاجة واحدة وإنك تقسم وقتك بين أكتر من نشاط مختلف. بمعنى آخر استغل الفرصة دي عشان تعيد استكشاف نفسك والحاجات اللي بتحب تعملها عشان حياتك تكون أغنى وأمتع وعشان انتقالك خارج القاهرة يحققلك حلمك بحياة أحلي.