مدينة نصر
مدينة نصر أقدم حي حديث لو ينفع نقول كده. كان النبتة الأولى لتعمير قطاع كبير من الأراضي الفضاء في شرق القاهرة، ووصل الأمر أن المدن السكنية الجديدة اللي كانت جزء من حي مدينة نصر في بداية عهدها اقتربت بحدودها تقريبًا من مدينة السويس، لدرجة أن مدينة نصر اللي كانت من ضواحي القاهرة لما تم تخطيطها في نهاية الخمسينيات من القرن الماضي أصبحت دلوقتي "وسط البلد" بعد ما وصل الزحف العمراني لعشرات الكيلومترات بعد شوارعها الرئيسية اللي تم تخطيطها في البداية.
مدينة نصر كان اسمها في الأصل "مدينة ناصر" نسبة لجمال عبد الناصر اللي تم إنشاءها في عهده ضمن برنامج التوسع العمراني بعد ما كان اسم المنطقة زمان "صحراء العباسية"، والحي يعتبر الأكبر من حيث المساحة في القاهرة ومساحته حوالي 250 كم مربع وتم إنشاؤه بطريقة جديدة معاصرة وهي الشوارع المتوازية والمتقاطعة بدون أي ميادين. وتم تحريف الاسم فيما بعد لـ "مدينة نصر" ربما لأسباب سياسية، لكن لا يزال فيه ناس من اللي أعمارهم فوق الخمسين أو المعتزين جدًا باشتراكيتهم أو بحقبة عبد الناصر بـ يقولوا عليها مدينة ناصر.
التقاطعات الكثير واللفات الموجودة في كل الشوارع (U Turn) جعلت مدينة نصر مزدحمة بنسبة كبيرة من أول الساعات الأولى في الصباح لحد قبل منتصف الليل، وبـ تزداد الكثافة المرورية عند مواقف الميكروباصات ومحطات الأتوبيس وعند بداية كل شارع رئيسي. طريق النصر أو الأوتوستراد هو الشريان الرئيسي للحي ومنه تقدر توصل لأي شارع كبير في مدينة نصر زي مجموعة الشوارع المتوازية: شارع الطيران وعباس العقاد ومكرم عبيد وحسن المأمون وأحمد فخري.
الحي مقسم لمناطق بأرقام زي الحي السادس والسابع وهكذا، لكن الغريب أن إحنا ما نعرفش فين الحي الأول والثاني مثلًا، البداية من السادس على طول!
المواصلات العامة بـ توصل لمدينة نصر من كل أحياء القاهرة، أشهر أماكن ممكن نقطة تلاقي هناك هم مسجد رابعة العدوية، وأول شارعي عباس العقاد ومكرم عبيد وكلهم على طريق النصر. وفي المقابل فيه مواقف في الحي السابع والعاشر وزهراء مدينة نصر لكل مناطق القاهرة الجديدة والشروق، وبعربيتك ممكن تقطع المسافات على أطراف مدينة نصر بسرعة لأن الكثافة فيها لسه مش زي وسط القاهرة. وفيه ترام بـ يمر بطول شارع مصطفى النحاس قادم من مصر الجديدة وده أبطأ من أن نعتمد عليه أو ننتظره. بس مدينة نصر أرض الميكروباصات؛ بـ تروح أمام كل بيت وفي أي وقت.
الخروج في مدينة نصر يناسب الكل؛ شباب وعائلات وأطفال، الأماكن مش هـ تخرج عن شارعي عباس العقاد ومكرم عبيد وما حولهم، كل الكافيهات والمطاعم المشهورة موجودة هناك، وعدد مهول من محلات الملابس والأثاثات والمفروشات والإلكترونيات، وفي مدينة نصر أكبر عدد من المراكز التجارية في القاهرة: "طيبة مول" و"العقاد مول" و"سيتي سنتر" و"السراج سيتي مول" و"جنينة مول" و"الميركاتو" وعلى الحدود مع مصر الجديدة موجود المول الأهم "سيتي ستارز".
وطبعًا معظم المولات دي فيها دور سينما، وبـ يتميز جنينة مول عن الباقين أنه فيه ساحة تزلج على الجليد. وفي امتداد شارع عباس العقاد فيه الحديقة الدولية اللي كانت أحلى فسحة في القاهرة في بداية التسعينيات وبجوارها مركز «وندرلاند» الترفيهي اللي فيه ملاهي ودور سينما ومحلات ومطاعم.
عدد من أهم المباني والمنشآت الحيوية موجود على أرض مدينة نصر، منها ستاد القاهرة الدولي على طريق صلاح سالم، ومركز القاهرة للمؤتمرات وأرض المعارض والنصب التذكاري للجندي المجهول والمنصة على طريق النصر وعدد من دور ونوادي القوات المسلحة اللي بـ يتعمل فيها المناسبات والأفراح زي دور "المدرعات" و"المشاة" و"المدفعية" ومساجد الشرطة وآل رشدان ورابعة العدوية، ومباني حكومية زي هيئة الاستعلامات ووزارات الدفاع والاستثمار والقوى العاملة، ونوادي رياضية كبيرة زي الأهلي والزهور والجيش ومدينة نصر، وجامعة عريقة هي جامعة الأزهر. والفنادق اللي لها أسماء رنانة مش كثير هنا، الأشهر هو فندق "سونيستا" الموجود في أول شارع الطيران من ناحية طريق صلاح سالم، فيه فنادق تابعة للقوات المسلحة والشرطة زي فندق "الماسة" و"تريومف" و"إيزيس".
المراكز الثقافية والأحداث الفنية قليلة جدًا في مدينة نصر، ونادرًا لما بـ نلاقي حد من المشاهير أو الفنانين عايش هناك، ويمكن ده لأن الحي حديث نسبيًا، لكن بـ يشفع له وجود عدد كبير من ستوديوهات الصوت والمكتبات وفعاليات ثقافية من وقت للثاني في مركز المؤتمرات أو أرض المعارض اللي بـ يُنظم فيها معرض القاهرة الدولي للكتاب في بداية كل عام، وعدد من مهرجانات التسوق ومعارض السيارات على مدار العام.
مدينة نصر مكان جميل تسكن فيه وتتفسح فيه وتشتغل فيه كمان، لسه أسعار السكن معقولة في بعض مناطق مدينة نصر، وفيها عدد لا نهائي من الشركات والهيئات اللي فيها جيوش من الموظفين، يعني أكيد هـ تكون واحد من اللي اشتغلوا في مدينة نصر في يوم من الأيام.