وسط البلد
وسط البلد معروفة كمان –خاصة عند الأجانب- باسم "داون تاون"، بـ تعتبر قلب القاهرة التجاري والحضاري. المنطقة بـ يحيط بها القاهرة الإسلامية من الشرق، بولاق وشبرا من الشمال، مصر القديمة من الجنوب والنيل من جهة الغرب. الوصول لوسط البلد سهل جدًا سواء بالعربية أو عن طريق المواصلات العامة، محطة القطار الأساسية "محطة رمسيس" موجودة فى المنطقة لأى حد عاوز يركب قطار ويسافر للإسكندرية، الدلتا، وجنوب مصر لحد أسوان.
وعلى مسافة قريبة من محطة القطار هـ تلاقى موقف أتوبيسات "الترجمان" اللى بـ تخرج منها الأتوبيسات وتسافر لكل المحافظات وداخل سيناء. وفيه كمان منطقة ركوب أتوبيسات وميني باص مشهورة هى "ميدان عبد المنعم رياض" اللى منها ممكن تتجه لأى منطقة فى كايرو، وسط البلد معروفة كمان بزحمتها وتكدس العربيات فيها علشان كده يفضل تروح لها بالمواصلات العامة أو التاكسي. إلى جانب انتشار خطوط مترو كثيرة هناك.
وسط البلد بـ تُعد مركز حياة الحضر منذ تأسيسها فى أواخر القرن التاسع عشر. قبل كده كانت مستنقع ولما حصل فيضان للنيل تحولت إلى بحيرة كان بـ يروح لها القاهريين علشان يركبوا مراكب. منطقة وسط البلد بـ تشمل: باب اللوق، وعابدين، والمنيرة، والعتبة.
تصميم أو تخطيط منطقة وسط البلد تم بناء على أوامر من الخديوي إسماعيل بعد ما رجع من دراسته فى باريس وتأثر بالمعمار هناك وقرر أنه ينقله إلى مصر، وبالتالي هـ نلاقى أن أغلب المباني فى وسط البلد تصميمها على طرز أوروبية مختلفة، الشوارع عريضة والمباني فخمة، والمنطقة أصبحت قريبًا معروفة جدًا لأغنياء المصريين والأجانب، وبعض الأماكن فيها مازالت بـ تذكرنا بالمجتمع الأجنبى زي: النادي اليونانى، والنادي الإيطالي، ومحلات كثيرة مازال اسمها على أسماء فرنسية أو يهودية.
كان فيه أماكن كثيرة للخروج مشهورة وقتها زي: كافيه باريزيانا (داخل فندق ويندسور) وكافيه جروبي اللى مازال موجود ولكنه تدهور بمرور الوقت.
من الأماكن المشهورة كمان هناك "كافيه ريش" في شارع طلعت حرب.
الكافيه ده كان له أهمية كبيرة فى فترة ثورة 1919، الثوار كانوا بـ يستخبوا في قبو الكافيه علشان يكتبوا منشورات سياسية، لما كانت الشرطة بـ تعمل "كبسة" زي ما بـ نقول كان الثوار بـ يجروا على الباب السري المستخبي فى حائط الكافيه واللى لسه موجود لحد الوقت الحالى، وكمان في الكافيه ده الملك فاروق وقعت عينيه على زوجته الثانية ناريمان وقابلها، ومن وقتها والكافيه ده أصبح مشهور خاصة وسط الكتاب والفنانين زي نجيب محفوظ وطه حسين.
على الرغم من إهمال المباني هناك إلا أنها بـ تظل مصدر جذب لو ركزت على تفاصيل تصميم المبنى من التماثيل الكاملة والنصفية وعلامات العائلات الشهيرة، ومن المباني المميزة فى المنطقة: قصر عابدين وفى منطقة جاردن سيتي فيه مناطق كثيرة هـ تشد انتباهك.
وسط البلد منطقة ما بـ تهدأش 24 ساعة، خلال اليوم هـ تلاقى بياعين فى كل مكان بـ يبيعوا كل حاجة بداية من ملابس تقليد الماركات، وموبايلات، وتوك شعر، ولعب، وكتب، أى حاجة ممكن تخطر على بالك هـ تلاقيها بـ تُباع فى وسط البلد، مع أن جودة المنتجات عليها خلاف. المشهد الثقافى هناك مفعم بالحياة بسبب وجود جاليريهات كثيرة ومراكز ثقافية زي: التاون هاوس جاليري، جاليري المشربية، مُصرين، مركز لصورة المعاصرة CIC، وطبعًا أهمهم المتحف المصري.
هناك هـ تلاقى كمان فن الشارع واضح جدًا من الرسم على الجدران (فن الجرافيتي)، ولو ركزنا على عالم المطابخ هناك هـ نلاقى أن وسط البلد مكان ضخم بـ يضم كل أنواع الأكل المصري اللى ممكن تتخيله، فيه محلات معينة زي "فلفلة" بقالها شغالة سنين، ومؤخرًا ظهرت مطاعم كثيرة على الساحة زي: المائدة السويدية (The Swedish Table) في ميدان التحرير والمتخصصة فى الأكل السويدي، من الأماكن المميزة كمان مطعم "فسحة سومية" اللى تقدر تأكل فيه أكل مصري بيتي صميم بسعر على قد الإيد.
بالليل لما المحلات بـ تقفل بـ يظهر وجه آخر لوسط البلد، تجربة الخروج بالليل فى وسط البلد ما ينفعش تفوت حد، أشهر الراقصات وفنانات السينما زي سامية جمال وفيفى عبده كان بدايتهم هنا وكمان الفنان فريد الأطرش كان بـ يعزف هنا فى بداياته الفنية، فيه أماكن كثيرة هنا ممكن تستمتع فيها بقهوة بلدي وشيشة زي قهوة الحرية وفيه كلوب زي أفتر أيت وأرابيسك.
وسط البلد كانت بـ تعد زمان مركز ثقافى وسياسى، الناس من جميع أنحاء العالم بـ ييجوا القاهرة علشان يستلهموا من أحداثها، وخاصة بعد ما اعتلت وسط البلد مانشيتات الصحف وقت ثورة 25 يناير 2011، وأصبح ميدان التحرير نقطة تجمع للمتظاهرين اللى قدروا بنجاح يسقطوا نظام قديم فاسد.
وبصرف النظر عن المعارك والمشاحنات اللى حصلت في البلد بعد الثورة وسط البلد عمرها ما هـ تفقد بريقها ولا عظمتها ومش متوقع أنها تستسلم أبدًا، كفاية أنها قدرت تصمد رغم الزلازل والثورات والإهمال اللى عدوا عليها، ده غير أن جو وسط البلد مش هـ تقدر تلاقيه فى أى مكان ثاني ولا يمكن وصفه.. من الآخر مافيش حاجة بـ تعبر عن مصرية مصر زى وسط البلد.