“توت” مستني السلام يعمّ العالم.. تأجيل افتتاح المتحف المصري الكبير للربع الأخير من 2025
Grand Egyptian Museum آثار مصر افتتاح المتحف المصري الحضارة المصرية السياحة في مصر المتحف الجديد المتحف المصري الكبير تأجيل افتتاح المتحف المصري الكبير توت عنخ آمون جيزة موعد افتتاح المتحف
Cairo 360
الصور: الصفحة الرسمية للمتحف على فيسبوك
في ظل التطورات السياسية اللي بتمر بيها المنطقة حاليًا، مصر قررت تأجيل الافتتاح الرسمي للمتحف المصري الكبير، اللي كان المفروض يتم يوم 3 يوليو 2025، وده حرصًا على تقديم حدث عالمي يليق باسم مصر وحضارتها في توقيت مناسب.
الافتتاح الجديد هيتحدد خلال الربع الأخير من 2025، بعد التنسيق مع كل الجهات المعنية، علشان يكون التنظيم على أعلى مستوى، ويحقق حضور دولي واسع زي ما بيستحق المتحف ده.
القرار جاي من إحساس بالمسؤولية، ورغبة في إن الحدث يخرج في أفضل صورة ممكنة. وده مش بس احتفال بمكان أثري ضخم، ده رسالة بصرية للعالم كله عن عظمة مصر وقدرتها على تنظيم فعاليات عالمية في أجواء مستقرة ومشرفة.
المتحف، اللي بيبعد خطوات من أهرامات الجيزة، بيعتبر أكبر متحف في العالم مخصص لحضارة واحدة، بمساحة 500 ألف متر مربع تقريبًا، وبيضم حوالي 100 ألف قطعة أثرية من بينها كنوز الملك توت عنخ آمون اللي هتتعرض لأول مرة كاملة.
رغم إن الافتتاح الرسمي اتأجل، المتحف لسه فاتح أبوابه بشكل جزئي ضمن مرحلة التشغيل التجريبي، واللي بدأت من أكتوبر 2024، وشملت مناطق زي البهو العظيم، المسلة المعلقة، والدرج الكبير. أما قاعة توت، فهتكون مفاجأة الافتتاح الرسمي، ودي لوحدها فيها أكتر من 5,390 قطعة نادرة!
في الشهور اللي فاتت، مصر كانت بتحط اللمسات الأخيرة: من تجهيزات قاعات العرض، لأنظمة التكييف والإضاءة، لتدريب فرق العمل، وكمان تطوير الطرق المحيطة بالمتحف لتسهيل وصول الزوار.
المتحف المصري الكبير مش مجرد مشروع أثري، ده مشروع وطني وسياحي بامتياز، هدفه يعزز مكانة مصر كوجهة ثقافية وسياحية عالمية، وهيستقبل ملايين الزوار، ويوفر آلاف فرص العمل، ويساهم في دعم الاقتصاد بشكل كبير.
نتمنى إن الظروف تهدأ، وإننا نشهد قريبًا افتتاح يليق بحضارة عمرها آلاف السنين.. ونقول وقتها: أهلًا بالعالم في قلب مصر.
مقترح
الحياة في كايرو
من تقديم الطلب لأول حضن: دليلك الكامل لكفالة طفل في مصر
أم بديلة إجراءات الكفالة +9
فن وثقافة
