The Definitive Guide to Living in the Capital , Cairo , Egypt

الصورة: abdullah ali

قانون الإيجار القديم قرب خلاص يشوف النور، بعد موافقة لجنة الإسكان في مجلس النواب من حيث المبدأ على مشروع القانون الجديد اللي بيهدف لتنظيم العلاقة بين المالك والمستأجر بشكل أكثر عدل وتوازن.

القانون الجديد بيشمل بنود مهمة، زي طريقة حساب القيمة الإيجارية الجديدة، وفترة السماح قبل الإخلاء، وشروط الإخلاء، وكمان حلول بديلة للمستأجرين اللي محتاجين وحدة تانية.

الزيادة في الإيجار.. هتزيد قد إيه؟

حسب مشروع القانون، الزيادة هتكون تدريجية ومرتبطة بتصنيف المنطقة:

• 20 ضعف القيمة الحالية في المناطق المتميزة

• 10 أضعاف في المناطق المتوسطة

• 12.5 ضعف في المناطق الاقتصادية

لكن، القانون كمان بيحدد حد أدنى للإيجار الجديد:

• 2000 جنيه للمناطق المتميزة

• 400 جنيه للمتوسطة

• 250 جنيه للمناطق الاقتصادية

والمستأجر هيدفع 250 جنيه مؤقتًا لحد ما يتم إعلان التقسيم الرسمي للمناطق، ولو فيه فرق في السعر هيتسدد على أقساط.

هتفضل ساكن لحد إمتى؟

• 7 سنين للشقق السكنية

• 5 سنين للأماكن غير السكنية (زي المحلات والمكاتب)

ودي فترة انتقالية قبل تنفيذ قرار الإخلاء الإجباري، علشان الناس تظبط أوضاعها.

إمتى ممكن يتم الإخلاء قبل كده؟

القانون بيقول إن المستأجر لازم يسيب الشقة لو:

• سبها فاضية أكتر من سنة من غير سبب

• أو لو عنده شقة تانية صالحة للمعيشة

وفي الحالتين، المالك يقدر يطلب من المحكمة أمر بالإخلاء الفوري من غير ما يدخل في إجراءات طويلة.

لو حصل إخلاء.. الدولة بتعمل إيه؟

القانون مش ناسي البعد الاجتماعي، وبيسمح للمستأجر يقدّم طلب لوحدة بديلة من الدولة بنظام الإيجار أو التمليك، بشرط يسلّم الشقة القديمة. وأولوية الاستحقاق هتكون للفئات الأولى بالرعاية.

إزاي هيتم تقسيم المناطق؟

المحافظين هيشكلوا لجان لحصر وتقسيم المناطق (متميزة – متوسطة – اقتصادية)، وده بناءً على معايير زي الموقع، المرافق، نوع العقار، قيمة الضرائب… إلخ. والنتائج هتُعلن رسميًا خلال 3 شهور من بداية العمل بالقانون.