The Definitive Guide to Living in the Capital , Cairo , Egypt

لو كنا من حوالي ٥ أو ٧ سنين فاتوا كان زمان فيلم “إنت حبيبي وبس” محقق أعلى الإيرادات، وكان زماننا بنضرب كف بكف، لكن من الواضح إن الخلطة السحرية اللي كانت بتكسر الدنيا في السينمات من كذا سنة مفعولها راح، والجمهور مابقاش يحبها.

فيلم “إنت حبيبي وبس” بيقدم الخلطة السحرية اللي كانت بتجيب نتيجة مع الجمهور زمان، واللي هي عبارة عن رقاصة مع مطرب أو مطربة، وقصة خفيفة وكوميديا معتمدة على الإيفيهات مش المواقف، وكام أغنية على مطاردة، ونبقى عملنا أعلى إيرادات في العيد.

لكن لما تبقى الأفلام المعروضة بقوة الفيل الأزرق والكنز في أجزائهم الثانية، يعني أفلام أثبتت نفسها وكونت قاعدة جماهيرية كبيرة، يبقى طبيعي إن فيلم زي إنت حبيبي وبس ميلاقيش نفس الإقبال اللي كان ممكن يلاقيه في السنين اللي فاتت.

لما بنتكلم عن فيلم بيقوم ببطولته اتنين مطربين (محمود الليثي وبوسي) يبقى لازم نقلل توقعاتنا بخصوص قوة الأداء التمثيلي شوية، وحتى مع درجات الرأفة، الأداء التمثيلي للثنائي الشهير ياخد درجة أقل من أي توقعات. ومش بنشوف الليثي غير علشان ينضرب بالقلم وهي عادة (سبكية) مشهورة مش عارفين إيه الكوميدي فيها بالظبط!

بالنسبة للقصة، فهي بتدور حوالين وصية بمبلغ كبير، لكن صرفها للورثة واقف على بند واحد فقط، وهو زواج الليثي وبوسي من بعض، وهي القصة اللي أتهرست في ألف فيلم قبل كده، لكن حتى مع التكرار ده فشل الفيلم في إنه يقدم لنا أي خيط كوميدي حقيقي يخلينا نبتسم ولو ابتسامة واحده!

إنت حبيبي وبس فيلم ما تدخلوش غير لو عاوز تسمع أغاني جديدة لبوسي ومحمود الليثي، مع العلم إن الفيلم حقق أقل إيرادات في سباق عيد الأضحى 2019.