على الرغم أن المفروض الفيلم يكون مستواه قوي، بما أنه منحوت بالكامل من مسلسل أجنبى أخد جائزة الجولدن جلوب "Mr. Robot"، وبما أن المشاهد تقريبًا مترجمة من المسلسل الأصلي ومنحوتة كلمة كلمة وحرف حرف مع بعض التعديلات البسيطة.. إلا أن الفيلم على الرغم من كل السهولة دي ما قدرش يقدم فى النهاية فيلم قوي وقابل للمنافسة!
من إخراج بيتر ميمي وبطولة أحمد حاتم وميرهان حسن وتارا عماد بـ نشوف قصة هاكر مصري بـ يحاول ينتقم من الفاسدين فى المجتمع على خلفية وفاة والدته بعد رفض مستشفى استثماري كبير إدخالها المستشفى علشان الشاب معاهوش 5000 جنيه تأمين.
أولاً كده لازم نقول أن الحبكة دي "اتهرست" ألف مرة فى أفلام ثانية كثير، وأن القانون الحالى بـ يسمح لأي شخص يتعالج فى أي مستشفى مهما كان مستواها فى حالة الطوارئ ولمدة 48 ساعة مجانًا بدون دفع أي مصاريف.
ثانيًا وده الأهم.. الشىء الوحيد اللى كان ممكن يميز الفيلم هو أنه بـ يشتغل على تيمة الهاكر الإلكتروني اللى بـ ينتقم من الناس من خلال قدرته على استخدام الإنترنت والكمبيوتر، لكن للأسف صناع الفيلم التزموا بتقليد ونحت المسلسل بالضبط بدون أي زيادة أو نقصان.. وكانت النهاية فشل كبير لكل اللى شاف الفيلم.
أغنية الفيلم كانت سطحية جدًا وفيها كثير من الكلام الطبقى اللى تعودنا عليه فى كثير من الأفلام مؤخرًا، زي فكرة أن المجتمع بـ يضطهد الفقراء و.. إلخ.. كمان الديكورات كان ممكن تكون أفضل وأماكن التصوير كانت محتاجة يتم اختيارها بعناية أكثر.. الحقيقة أن كون الفيلم مقتبس بالكامل بـ يخلينا مش متعاطفين معاه إطلاقًا، بل على العكس بـ نحس بمحاولة القائمين على الفيلم أنهم يبيعوا لنا الوهم ويعيدوا تعبئة مسلسل ناجح فى قالب جديد ومتصورين أن الأمور ممكن تعدي وأن الجمهور مش هـ ياخد باله من التشابه!
صناع الفيلم لو كانوا تعبوا شوية على فكرة أصلية، أو على الأقل بذلوا بعض المجهود فى محاولة تمصير الأحداث على الأقل، الفيلم كان ممكن فى الحالة دي يكون مستواه أفضل أو يستحق مننا تقييم أفضل من نجمة واحدة!