The Definitive Guide to Living in the Capital , Cairo , Egypt

رغم كل أنواع الفسح الجديدة والجميلة الموجودة فى القاهرة واللى ممكن يقع عليها اختيارنا لتقضية أجازة “ويك إند” جميلة وسط زحمة الشغل ومشاغل الحياة تظل السينما محتفظة بموقع متميز على خريطة الفسح وأماكن تغيير الجو، يمكن لأنها خروجة مكتملة الأركان بـ تضمن الاسترخاء وتغيير الجو والوجوه، بالإضافة لمشروب غازى أو باكيت فيشار ممكن تزود إستمتاعنا باليوم.

 

بحكم مشاهدتنا لكل أفلام السينما في القاهرة علشان نقدم لكم مقالات نقدية متجددة باستمرار، لفينا ودورنا على كل سينمات كايرو بأنواعها، وبالتالى نقدر نقدم لكم “دليل حصرى وشامل لدور عرض السينمات في القاهرة”.

 

نبدأ بأفخم وأكبر مجمع سينمات فى كايرو اللى كان حديث الساعة لوقت قريب بسبب افتتاح قاعة سينما IMAX الأولى فى مصر وهو مجمع سينمات مول أمريكانا بلازا فى الشيخ زايد، المكان ما يتوهش ويعتبر الفسحة الأولى لكل ساكني المنطقة، مافيش مشاكل فى ركن العربية لأن فيه أماكن انتظار كثيرة حول المول، والمول بشكل عام فيه مجموعة من المطاعم اللى ممكن تكون فسحة إضافية.

المجمع فيه 13 قاعة عرض، واحدة فقط بنظام IMAX وقاعتين بنظام Cinecomfort وده بـ يتميز أن الكراسى بتاعته أكبر ومريحة أكثر وممكن ترجع للخلف أو الأمام حسب رغبة المتفرج، كمان مسموح للمشاهدين فيها يأخذوا أى أكل أو مشروبات معاهم، وباقى القاعات عادية.

أسعار التذاكر للحفلات الصباحية (9:30 و12:30) 20 جنيه مصرى، ثم ترتفع إلى 35 جنيه فى الحفلات المسائية بداية من 3:30 عصرًا حتى 12:30 مساءً للحفلات العادية، أما حفلات الـ 3D بـ تكون 25 جنيه مصرى للحفلات الصباحية و40 جنيه لحفلات بعد الظهر غير شاملة سعر النظارة (10 جنيه)، أما حفلات الـ IMAX بـ يكون سعر التذكرة فيها 40 جنيه فى الحفلات الصباحية و60 جنيه لحفلات بعد الظهر، والسعر أيضًا لا يشمل إيجار النظارة (10 جنيه) وممكن تحصل عليها فى الكافيتريا الملحقة بالسينما، بالإضافة أنه ممنوع اصطحاب الأطفال أقل من 4 سنوات، وتقدر تحجز تذاكر سينما IMAX من خلال الإنترنت وتدفع بالفيزا أو ماستر كارد بدون رسوم إضافية.

مش محتاجين نتكلم عن مستوى الصوت والصورة أو جودة المقاعد، هى الأفضل فى أمريكانا بلازا، خاصة حجم الشاشات والصوت الأكثر من رائع، أما قاعة IMAX المقاعد بتاعتها كان مستواها عادى، أما الصوت والصورة فكانت تجربة مختلفة بكل المقاييس، تخلينا ننصح الجميع بضرورة تجربتها.

فريق العاملين بالسينما فى المجمع ودودين ومتعاونين، مستوى دورات المياه ممتاز، وكمان مستوى نظافة السينما من الداخل لأن بـ يتم تنظيف القاعات بسرعة بعد كل عرض.

 

ننتقل لمجمع سينمات ثانى ما يبعدش كثير عن أمريكانا بلازا هو  سينمات جلاكسى مول العرب فى 6 أكتوبر، بـ يتكون من 10 قاعات بـ تعرض الأفلام سواء كانت عادية أو 3D.

مواعيد الحفلات الصباحية 10:30 و1:30 وسعرها 20 جنيه للحفلات العادية أو 3D على حد سواء، ثم ترتفع إلى 40 جنيه فى حفلات بعد الظهر اللى بـ تبدأ من 3:30 ظهرًا حتى منتصف الليل مرورًا بحفلة 6:30 و9:30 مساءً والأسعار لا تشمل سعر نظارة الـ3D. الصوت والصورة جودتهم ممتازة، لكن المقاعد جودتها عادية وما حسيناش فيها باختلاف كبير عن باقى السينمات.

الجميل فى مجمع سينمات مول العرب أن ممكن تستفيد بكل الأماكن الترفيهية ومناطق الطعام الموجودة فى المول قبل أو بعد السينما، بالتالى الفسحة فى مول العرب بـ تأخذ شكل مكتمل أكثر من مثيلاتها فى أى مكان ثانى، وممكن الأطفال يدخلوا أى عرض 3D Animation بينما الكبار يأخذوا جولتهم فى المول براحتهم بدون إزعاج.

 

من السينمات القريبة جدًا لقلبنا مجمع سينمات سيتى ستارز، بـ نرشحه كواحد من أفضل المجمعات السينمائية فى العاصمة لأنه شامل لحاجات كثير مش موجودة فى مجمعات ثانية، أهمها وجوده داخل واحد من أشهر مولات القاهرة “سيتى ستارز”، يعنى مافيش أى حاجة ثانية هـ تعوزها كفسحة مكملة للسينما إلا وهـ تلاقيها هناك زى محلات الملابس ومتجر “سبينيس” للمواد الغذائية ومعظم الماركات العالمية فى عالم التكنولوجيا والملابس بالإضافة لأماكن المطاعم وتناول الوجبات الخفيفة بأنواعها، وطبعًا ملاهى الأطفال “بيلي بييز” وغيرها، بالاضافة لوجود جراج ضخم لركن السيارات.

أما اللى بـ يخلينا نحب مجمع سينمات سيتى ستارز على المستوى السينمائى أن موجود فيه 21 قاعة عرض مقسمة على جزءين: الأولى فى الدور الأول وهى سينما جولدن ستارز VIP وفيها 8 قاعات عرض بـ تبدأ عروضها الصباحية من 10:30 بسعر 25 جنيه للتذكرة العادية و35 جنيه للتذكرة 3D بـ ترتفع إلى 40 جنيه للتذكرة العادية فى حفلات الظهيرة اللى بـ تبدأ الساعة 4:15 ظهرًا وتمتد إلى منتصف الليل أو50 جنيه للعرض الـ 3D.

أما باقى الـ 13 قاعة عرض فموجودة فى مجمع السينمات “سينما ستارز” فى الدور الخامس، وهو صاحب الإقبال الأكبر لانخفاض أسعار التذاكر عن الـ VIP، بـ يعرض حفلاته بداية من 10:30 صباحًا بسعر 20 جنيه للتذكرة العادية و25 جنيه للـ 3D بـ ترتفع إلى 35 و40 جنيه لحفلات الظهيرة اللى بـ تمتد من 3:30 حتى منتصف الليل، ولو رايح بالعربية ما تنساش تطلب تخفيض على سعر الانتظار بـ تأخذه من موظف الحجز فى السينما وأنت بـ تحجز.

القاعات فى مجمع سيتى ستارز مقسمة لنوعين طبقًا للحجم: بعض القاعات صغيرة من حيث عدد المقاعد ونوعها وحجم الشاشة، والبعض الثانى كبير ومريح أكثر، لكن فى الحالتين جودة الصوت ممتازة.

موظفى الخدمة فى سيتى ستارز هم الأكثر ودًا من بين باقى كل الموظفين فى تجربتنا السينمائية، بداية من موظفى الحجز اللى ممكن يرشحوا لك أفضل الأماكن لمشاهدة الفيلم، ثم الموظفين المسئولين عن السينمات من الداخل (الريبليسير) اللى ممكن يدردشوا معاك عن رأيك فى الفيلم ويعطوك اقتراحات إضافية عن باقى الأفلام ومواعيد عرضها. الكافتيريا الملحقة بالسينما رائعة رغم ارتفاع أسعارها لكن الخدمة فيها ممتازة. مستوى نظافة السينما من الداخل ممتاز، ودورات المياه كمان مستواها ممتاز، وبشكل عام تجربتنا فى مجمع سينمات سيتى ستارز هى الأفضل من بين كل السينمات.

 

أما مجمع سينمات جنينة مول فى مدينة نصر واللى تم إنشاؤه قبل سيتى ستارز سنة 1999 مكون من 6 قاعات عرض بـ تعرض أفلام عادية و3D بداية من 10:30 صباحًا بسعر 20 جنيه للتذكرة العادية و25 جنيه للـ 3D بـ ترتفع إلى 35 و40 جنيه لحفلات الظهيرة اللى بـ تمتد من 3:30 حتى منتصف الليل. جودة الصوت والصورة متوسطة، لكن المقاعد مريحة وكويسة.

تجربتنا هناك ما كانتش كويسة، المكان كله يتسم بعدم التنظيم على الإطلاق، بالإضافة لعدم تعاون الموظفين وإهمالهم، القاعات صغيرة ومستوى السينما بشكل عام دون المستوى، مش بـ ننصحك بالذهاب إلا لو الفيلم اللى عاوز تشوفه مش نازل غير هناك، هي “حاليًا” مغلقة للتصليحات لحوالي ٣ شهور علشان هـ يضيفوا فيها تقنية الـ3D.

 

من مجمعات السينما الثانية اللى برضه مش بـ نرشح دخولها إلا للضرورة القصوى سينمات السراج مول فى مدينة نصر، بجانب أنه مش بـ يعرض إلا الأفلام العربية واللى مش بـ يتم تغييرها بشكل دورى خدمة العملاء هناك الأسوأ من نوعها، والسينما مش منتظمة فى مواعيد عرض أفلامها اللى بـ تبدأ من 10:30 صباحًا وتنتهى بعد منتصف الليل بواقع حفلة كل 3 ساعات وبأسعار 15 جنيه للحفلات الصباحية و25 جنيه لحفلات الظهيرة والمساء، ومستوى الصوت وحجم الشاشات ومستوى المقاعد غير مُرضى مما يهدد الفسحة كلها بالفشل الذريع.

 

ننتقل من منطقة مدينة نصر إلى منطقة أبعد شوية.. أبراج نايل سيتى عند كورنيش النيل فى بولاق، بـ نشوف هناك مجمع سينمات رائع مكون من 8 قاعات عرض هو مجمع سينمات نايل سيتى واللى بـ يعرض عدد كبير من الأفلام العربية والأجنبية بالنظام العادى أو 3D بداية من 10:45 صباحًا و12:45 ظهرًا بسعر 25 و35 جنيه للـ 3D ترتفع إلى 35 و45 جنيه للـ 3D فى الحفلات المسائية اللى بـ تبدأ من 3:45 حتى منتصف الليل، والأسعار لا تشمل نظارات الـ 3D اللي بـ تتباع بـ 15 جنيه، موظفى الحجز بـ يمتازوا بالألفة، إلا أن مستوى دورات المياه ما كانش بالجودة اللى متصورينها من مول زى نايل سيتى، كمان جودة المأكولات والمشروبات مش كويس خصوصًا الفيشار.

 

مجمع سينمات هيلتون رمسيس لازم نحذركم أن الطريق إليه بـ يكون زحمة خصوصًا فى أوقات الذروة وأيام المظاهرات فى ميدان التحرير، مكون من 5 قاعات عرض للأفلام العادية و3D بحفلات صباحية تبدأ من 10:30 صباحًا حتى منتصف الليل وبأسعار 15 و30 جنيه للحفلات الصباحية والمسائية على الترتيب. حجم الشاشات صغيرة مقارنة بباقى السينمات، كمان المقاعد صغيرة وبعضها غير مريح.

مشكلتنا مع السينما دي طريقة الموظفين السيئة جدًا فى التعامل، وعدم اهتمامهم بالمشاهدين، واشتراطهم لحد أدنى من التذاكر علشان يشغلوا الفيلم لو مش عليه إقبال.. اللى زعلنا أكثر لما تكلمنا معاهم وعملوا لنا استثناء وشغلوا الفيلم، وده ممكن يفتح باب الـ Tips بالإجبار اللى بالتالى بـ يسوأ سمعة صناعة السينما فى مصر في رأينا.

 

وبما أننا دخلنا منطقة وسط البلد فى كايرو -وهى المنطقة الأكثر من حيث عدد السينمات- عاوزين نتكلم عن سينما مترو واللى فيها 4 قاعات ومش بـ تعرض غير أفلام عربية، حجم الشاشة وجودة الصوت والصورة أقل من المتوسط رغم أن سعر السينما مش رخيص مقارنة بباقى أسعار التذاكر، يعنى الحفلات الصباحية اللى بـ تبدأ من 10:30 صباحًا 20 جنيه، أما الحفلات المسائية اللى بـ تمتد من 3:30 عصرًا حتى منتصف الليل 25 جنيه يعنى لو قارنناها بـ سينما أوديون اللى مش بعيدة عنها هـ نلاقى أن سينما أوديون تكسب.

 سينما أوديون فيها 4 قاعات عرض، ومواعيد عرضها تبدأ من 10 صباحًا حتى منتصف الليل بأسعار 15 جنيه للحفلات الصباحية و25 جنيه للحفلات المسائية بحجم شاشة وجودة صوت أكبر بالإضافة لإمكانية عرض أفلام 3D وعرضها أفلام أجنبية وعربية على حد سواء.

 

من السينمات اللى مش كثير يسمع عنها سينما التحرير فى الدقى، ورغم أنها مكونة من قاعة واحدة إلا أنها واحدة من أقدم السينمات فى المنطقة، ومقسمة من الداخل لصالة وبلكون ودى حاجة ما بقيناش نشوفها كثير فى السينمات الحالية، ورغم قلة جودة المقاعد والصوت مش موزع بشكل كويس إلا أن الشاشة الضخمة بـ تعوض المشاهدين عن الباقى.

 سعر التذاكر موحد لجميع المواعيد وهو 25 جنيه للصالة و30 جنيه للبلكون، والحفلات بـ تبدأ من 10:30 حتى منتصف الليل، وبحد أدنى 4 مشاهدين لتشغيل الفيلم!.. الأكل والشرب فى السينما من أسوأ ما يكون، خصوصًا أن السينما تقريبًا بلا موظفين اللهم إلا 3 أو 4 كسلانين جدًا عن خدمة المشاهدين، لكن حسينا فى السينما –خصوصًا مقاعد البلكون– بالحنين للماضى الجميل والقاعات الضخمة رغم عدم جودة باقى عناصر السينما.

 

من السينمات اللى بـ نلاحظ عليها إقبال كبير سينما جلاكسى المنيل المكونة من 6 قاعات بـ تعرض أفلام عربية وأجنبية وإن كان للأجنبية نصيب أكبر فيها. الحفلات بـ تبدأ من 10:30 صباحًا حتى منتصف الليل وبأسعار 20 جنيه للحفلات الصباحية بـ ترتفع إلى 40 جنيه لحفلات بعد الظهر اللى بـ تبدأ من الساعة3:30  ظهرًا غير شاملة سعر النظارة (10 جنيه) ده بالنسبة لأفلام الـ 3D أما الأفلام العادية بـ يكون سعرها 15 جنيه للحفلات الصباحية و30 جنيه لحفلات بعد الظهر. مستوى الصوت والصورة كويسين، والمقاعد مريحة وما شوفناش أى شكاوى منها أو من الموظفين القائمين على العمل فيها .

 

فى شارع فلسطين فى المعادى بـ نشوف مجمع سينمات صغير نوعا ما هو مجمع سينمات بندر المعادى مكون من 3 قاعات فقط بـ تعرض أفلام عربية وأجنبية عادية و3D.

أسعار السينما غالية شوية مقارنة بمثيلاتها، الحفلات الصباحية اللى بـ تبدأ من 10 صباحًا بـ تكون 30 جنيه للعروض العادية و40 لعروض 3D غير شاملة سعر النظارة (15 جنيه)، بـ ترتفع إلى 35 و45 جنيه لحفلات الظهيرة من 4 عصرًا حتى منتصف الليل، حفلات منتصف الليل بـ تشتغل الخميس والجمعة فقط وبـ تبدأ 1 مساءً.

 

الجزء الأخير من موضوعنا هـ نتناول فيه السينمات فى شارع عماد الدين بمنطقة رمسيس، هـ تدخل أول شارع شمال بعد مسجد الفتح، وبمجرد دخولك الشارع هـ تحس أنك معزول عن كل الضوضاء والتلوث فى ميدان رمسيس، وأنك رجعت للزمن الجميل بداية من المسارح والنوادى الليلية والسينمات، فى منتصف الشارع هـ تلاقى مجموعة من السينمات كلها تمتاز بعراقة الشكل من الخارج، أما من الداخل للأسف الأمر سيء جدًا، مثلا سينما كوزموس والمكونة من 6 قاعات عرض بـ تعرض كلها أفلام عربية فقط بداية من 10:30 صباحًا حتى منتصف الليل بأسعار 15 جنيه للحفلات الصباحية و20 للمسائية.

وعندنا كمان سينما داون تاون اللى بـ تعرض أفلام عربية وأجنبية بـ تبدأ حفلاتها من 15 جنيه للصباحية و 25 جنيه لحفلات بعد الظهر ثم 25 جنيه لحفلة منتصف الليل.

المشترك بين كل سينمات شارع عماد الدين أنك هـ تشوف فيها أسوأ معاملة للمشاهدين ممكن تتخيلها! وشوفنا بنفسنا عدد كبير من الخناقات بين رواد السينما والقائمين عليها، أما مستوى جودة الصوت والصورة فكان متوسط، والمقاعد أقل من المتوسط.

 

بكده نكون غطينا لكم عالم السينمات فى كايرو.. الفسحة التقليدية اللى لسه لها شعبية كبيرة رغم انتشار الفضائيات وتحميل الأفلام من على الإنترنت، لسه ظلام قاعة السينما وصوت آلات العرض وأفيشات الأفلام على جدران السينما له تأثير سحرى على عشاق الفن فى كايرو.