The Definitive Guide to Living in the Capital , Cairo , Egypt

حسن الرداد قد لا يكون أفضل أو أكثر نجوم جيله موهبة، لكنه واحد من أذكاهم وأكثرهم قدرة على اختيار أفلامه وأدواره اللي بيقوم بيها علشان يضمن شريحة شبه مضمونة من النجاح.

القصة

فيلم عقدة الخواجة بيحكي عن شاب بينتمي للطبقة المتوسطة بيتعرف على بنت وبيخوض معاها مجموعة كبيرة من المغامرات، واللي بتتشابك مع رغبته في الانتقام لوفاة شقيقه واللي بيعتمد عليها الجزء الخاص بالحركة والأكشن في الفيلم.

فريق العمل

الفيلم من بطولة حسن الرداد وهنا الزاهد ومحمد لطفي وحسن حسني وماجد المصري وشيرين رضا، ومن تأليف هشام ماجد وشيكو وإخراج بيتر ميمي.

الأداء التمثيلي

حسن الرداد زي ما قولنا فنان موهوب وقادر على تقديم أي شخصية يقرر أنه يقوم بها، وقدر يقدم توليفة جيدة بين الأكشن والكوميديا من خلال أحداث الفيلم، أما هنا الزاهد فبنعتقد أن لسه أمامها بعض الوقت والخبرة علشان يكون أدائها التمثيلي أفضل، ولازم نشيد بأداء ماجد المصري واللي قدم دور جميل واستثنائي.

السيناريو والحوار والإخراج

سيناريو الفيلم سريع وغير ممل وده من الأمور اللي تحسب للمخرج، أما الكوميديا في معظم أجزائها فكانت متركزة على الحوار اللي كان سلس وفيه إيفيهات كوميدية كويسة وكتيرة.

الديكورات والموسيقى والأزياء

على الرغم من قوة الفيلم على صعيد السيناريو والحوار لكن الديكورات والموسيقى كانت أضعف حلقاته، وانحاز الفيلم موسيقيًا لأغاني المهرجانات والأغاني الشعبية واللي هتجذب جمهور السينما من المراهقين والشباب.

الخلاصة

عقدة الخواجة فيلم بيحاول يحقق المعادلة والتوازن بين أفلام الأكشن والكوميديا في نفس الوقت. وننصح بمشاهدته لمحبي أفلام حسن الرداد.

علشان تبقى عارف:

أغنية الفيلم (عيدوا رقصتي) حققت حوالي مليون مشاهدة خلال 5 أيام فقط من طرحها على موقع اليوتيوب.