The Definitive Guide to Living in the Capital , Cairo , Egypt

عارف لما يبقى عندك مكونات تعمل طبخة هايلة، لكن الشيف مش عارف يعمل بيها وجبة كويسة؟ هو ده اللي حصل بالظبط مع فيلم “يوم وليلة”.

يوم وليلة بيحكي عن أمين الشرطة المحترم “منصور الذهبي” اللي بيقوم بدوره “خالد النبوي” واللي بيواجه أزمة مادية بسبب رغبته في إنه يحسن ظروف حياة بنته وده صعب، وفي نفس الوقت بنشوف مجموعة من المشاكل والأزمات اللي بيعيشها باقي أبطال الفيلم، واللي بتلقي الضوء على مشاكل المجتمع المصري بشكل عام، وكل ده بيحصل في “يوم وليلة”.

بنقابل في “يوم وليلة” كل أطياف المجتمع تقريبًا، حتى إننا بنشوف شخصية البلطجي اللي قام بيها “خالد سرحان” وبنحاول نفهم ونشوف هل المشاكل اللي بيقع فيها الشخصيات دي نتيجة سوء تصرفهم هما، ولا ظروف المجتمع.

لكن كالعادة وقع الفيلم في فخ محاولة علاج وتسليط الضوء على كل المشاكل في فيلم واحد، والنتيجة في النهاية بتكون فيلم مش عارف يركز في خط واحد ويكمله للنهاية.

لكن على الرغم من ضعف الفيلم على صعيد السيناريو بنشوف الممثلين نفسهم في أدوار أكثر من رائعة، “خالد النبوي” بيقدم دور ممتاز وأداء صعب، و”أحمد الفيشاوي” هو كمان واضح إن مستواه رجع تاني يبقى قوي زي ما عودنا في أدواره القديمة، أما “درة” فكنا خايفين من أدائها، إلا إنها قدرت تقدم أداء جميل، وحسستنا إنها ماسكة الشخصية ومذاكرة تفاصيلها كويس جدًا.

طبعًا “حنان مطاوع” جمال أدائها حسسنا إنها أكبر من الدور نفسه، وحتى “خالد سرحان” في دور البلطجي “بجاتي” واللي خوفنا يكون أداؤه للشخصية Over طلع في النهاية بأداء جيد جدًا ويستحق التحية.

ديكورات الفيلم وموسيقته التصويرية كمان كانت من أحلى ما يكون، والسيناريو على الرغم من جرأته وتطرقه لكتير من المشكلات اللي أفلام كتير مش بتحب تتطرق لها زي الحب بين ناس من ديانات مختلفة مثلًا، إلا أن تطرقه لمشاكل تانية كتير خلتنا كمشاهدين نحس بالتشتت.