The Definitive Guide to Living in the Capital , Cairo , Egypt

على الرغم من أن الشخصيات الشريرة في الأفلام والمسلسلات، بتكون هي العائق اللي بيمنع البطل من تحقيق أهدافه، أو هي النماذج اللي بتأذي المجتمع والناس، لكن على مر التاريخ حظت بعض الشخصيات الشريرة في الأعمال الفنية بحب وتعاطف عدد كبير من المشاهدين. وحتى في الروايات، لو فاكرين شخصية (أرسين لوبين) أو اللص الظريف، اللي بيساعد الشرطة في القبض على المجرمين ويتبرع بالفلوس اللي بيسرقها للجمعيات الخيرية! وطبعًا مش هننسى شخصية الجوكر الشهيرة، اللي ظهرت كشخصية مضادة لبات مان، وسرعان ما أجبر حب الناس لها على تخصيص أفلام كاملة تتكلم عن ماضي الجوكر واللي خلاه يوصل للحال اللي أصبح عليه الأن.

فيلم Bandit المقتبس عن قصة حقيقية، بيحكي عن لص البنوك المحترف (روبرت) واللي قام بدوره جوش دوهاميل. واللي بتضطره ظروف الركود الاقتصادي في أمريكا في الوقت ده، بالإضافة لزواجه وإنجابه لطفل، من أنه يتجه لعالم الجريمة، ويبدأ سلسلة من عمليات السطو على البنوك، باستغلال ثغرة أمنية وبمعاونة مجرم عتيد الإجرام هو تومي، اللي قام بدوره ميل جبسون.

على الرغم من أن القصة تبدو تقليدية، لكن عنصر المتعة الأساسي في Bandit ماكانش القصة بالمقام الأول، لكن الإخراج اللي قدر يختصر في مشاهد قليلة فترات طويلة جدًا من السرد، والمونتاج اللي قدم لقطات خاطفة كوميدية وتحبس النفس من فرط الإثارة في نفس الوقت. وطبعًا الأداء التمثيلي لجوش دوهاميل اللي يعتبر واحد من أحسن وأهم ما قدمه الفيلم.

الأغرب والأمتع، هو الطريقة اللي حكى لنا الفيلم إزاي قدر روبرت يسرق كل البنوك دي في فترة زمنية قليلة، وإزاي الشرطة ماكانتش قادرة تحدد هو مين. ولولا أن الفيلم مستمد من قصة حقيقية فعلًا، كنا قولنا أن ده مجرد خيال. لكن واضح أن الواقع أحياًنا بيكون أغرب من الخيال.

علشان كده عرفنا ليه بنحب شخصية اللص الظريف.. لأنه بيمثل رغبتنا الدفينة في اختراق القانون والتلاعب بالنظام وتحقيق الاستفادة لنفسنا. الرغبة اللي بتجمحها قواعد قانونية ودينية واجتماعية. لكن لابأس لو شوفنا كل ده بيتم اختراقه على الشاشة من خلال أحداث فيلم، ولا سيما لو تم اختيار ممثل كاريزما لدور البطولة.

بمناسبة الكاستينج.. اختيار ميل جيبسون في دور (تومي) كان غير موفق، وكان ممكن يتم استبداله بأي ممثل تاني غير جبسون، لكن واضح أن صناع الفيلم قرروا الاستعانة بيه لأسباب ترويجية، خصوصًا أن تم وضع صورته على البوستر الدعائي للفيلم لضمان أن الجمهور محبي جبسون هيدخلوا الفيلم علشان يتفرجوا عليه، وواضح أنه وافق لأسباب مادية بحتة، أو لأنه بيحاول يعوض كثير من الخسارة والتخطبات اللي تعرض لها مؤخرًا.

فيلم Bandit من نوعية الأفلام الخفيفة، اللي بتجمع الأكشن والكوميديا، ومش بتقدم نظرة فلسفية غامضة أو نظرية متحذلقة. كل اللي بتقدمه هو ساعتين من المتعة والإثارة. وده في حد ذاته سبب كافي يخلينا نرشح الفيلم للمشاهدة.